白話字文學：台灣文學 ê 早春

李勤岸

     白話字文學，也著是用「白話字」所寫ê文學。「白話字」(Pe̍h-uē-jī) 是書寫口語ê文字。 除了日治時期蔡培火因應日語情勢，發展出假名式白話字， koh tī 國府時期因應華語，發展出注音符號白話字以外，主要是基督教長老教會ti7台灣推行ê台語羅馬字，通稱教會羅馬字。教會羅馬字經過杜嘉德 (Carstairs Do uglas)，麥嘉湖 (John Macgowan)、羅啻 (Elihu Doty)、打馬字 (John V. N. Talmage)、甘為霖 (William Campbell)、巴克禮 (Thomas Barclay)等傳教士ê陸續改進，tī台灣使用ê形式逐漸標準化。2006年教育部公告ê「台灣羅馬字拼音方案」就是根據教會羅馬字所整合、演化出來ê，算是最新版ê白話字。

   有關白話字文獻請參考本人主持ê國科會計劃「台灣教會公報白話字文獻數位典藏計畫(1885-1969)」網站「台灣白話字數位典藏文獻館」 (http://pojbh.lib.ntnu.edu.tw/)。（計畫編號：NSC 96-2422-H-003 -004 -）自2007年8月開始進行，今年進入第二年。

壹. 白話字 ê 起源

白話字是以羅馬字字母拼寫ê 一款正字法，原為19世紀時由基督教長老教會tī中國福建廈門創設、推行ê拼音文字，因此也被稱「教會白話字」或「教會羅馬字」（Church Romanization)。台灣因基督教傳入，也將白話字ê書寫方式帶進來台灣。1865年馬雅各醫師（James L. Maxwell,1836-1921）來台，tī台南設立傳教本部，開始白話字ê推行。在台灣推動白話字貢獻siōng大ê人，是蘇格蘭來台ê巴克禮牧師（Thomas Barclay,1849-1935），伊tī 1885年創辦ê《台灣府城教會報》（現在ê《台灣教會公報》），正是使用白話字做為文字媒介，除了傳播福音，mā記錄清領末期、日本時代以及戰後初期ê台灣社會發展、文化現象。

會叫做「白話字」，是為beh區別三種無仝ê書寫方式：第一種是文言ê漢詩、漢文等傳統ê書寫方式，過去稱為「孔子字」；第二種就是中國北京話ê白話文書寫方式，稱做「唐人字」；第三種就是閩南人日常使用ê白話，因為這種語文m̄是高深ê漢文，mā m̄是母語以外ê官話，是日常口語ê書寫，所以共叫做「白話字」。

1880年代是白話字發展ê高峰期，其中重要原因之一是因為清國猶m̄是現代化ê民族國家，因此民間文字ê推廣運動並無受著國家機器ê打壓。台灣tī清領末期，會曉白話字ê人不但無限制tī長老教會信徒，甚且流傳tī一般民眾之間，極盛時期有數十萬人ê讀者人口。Tī台灣，tī 1920年代所謂ê新文學運動進前，已經有bē少用白話字書寫ê文學作品。 戰後國民政府tī 1969年全面禁止教會使用白話字，民間ê白話字也因爲華語ê推行漸漸衰微。「白話字」ê使用者，m̄-nā Holo人，mā有客家及原住民ê語文書寫。因為書寫系統歷史悠久koh普遍，已經hōo通稱做「台灣羅馬字」。

白話字tī台灣，戰前戰後攏bat受官方禁止，譬如：台灣文化協會tī蔡培火熱烈ê建議下，tī 1924年將推廣白話字訂為協會ê重要工作之一，而且決定出版白話字相關書籍；但是蔡培火向日本台灣總督府所申請設立ê白話字研習班，並無得著許可；以白話字書寫發行ê《台灣教會公報》，也因為阻礙著日本官方「國語（日語）運動」ê推行，tī第二次世界大戰中被迫停刊。戰後1969年，國民政府下令禁止教會公報使用白話字；Embree用白話字編ê《台英辭典》tī香港發行，mā tī 1973年hông沒收、禁止進口；天主教瑪利諾會與基督教台灣長老教會新譯ê台語及泰雅語聖經tī 1975年hông查禁；1984年教育部甚至函請內政部阻止教會使用羅馬拼音傳教；其他雜誌若刊登白話字隨查禁。

雖然白話字長期受著壓制，suà tī一寡對台灣語言文化保存有熱情kap使命感人士努力之下，繼續以無仝ê面貌發揮影響力。戰後1980年代末期，tuè著台灣社會民主化kap台語文學運動ê展開，以漢羅合用（漢字、羅馬字濫參）ê書寫方式所呈現ê文學作品kap論述，ùi小眾ê讀冊會、刊物等聚集力量，漸漸tī這20年間形成共識kap趨勢，白話字kap漢字ê合作，成就了戰後台灣母語文學書寫ê走向。

貳. 白話字tī 台灣早期ê推行

19世紀來到台灣傳教ê宣教師，為著beh hōo教會堅固進步，必須ài hōo當時大部份攏 m̄-bat字ê信徒會曉讀聖經，決定全面推展白話字，用白話字來進行信徒ê教育（陳慕真，2006：21）。1880年tī台南府城做傳教工作ê馬雅各醫生，奉獻一台印刷機kap其他ê附件，像排字架、鉛字等總共十一箱，tse是台灣第一台活字印刷機。這kuá印刷工具運到台灣了後，創設府城大學（著是tsit-má ê台南神學院）ê巴克禮牧師馬上備辦書房與印刷事工。他先轉去母國學撿字、排版等等ê印刷技術，1884年轉來台南了後著kā印刷機裝配完成，開始印刷工作；巴牧師kā書房號做「聚珍堂」，tse著是現此時ê新樓書房。

這台印刷機siōng大ê貢獻，除了印行白話字聖經以外，著是負責「教會報」ê印刷。1885年7月，tī巴克禮牧師主持之下，第一張出刊，tse是台灣第一份印刷報紙。當時是一份完全用白話字書寫ê刊物，創刊ê目ê是beh宣揚教義kap做教會內底聯絡ê工具。 

參.《台灣府城教會報》ê白話字文學

《台灣府城教會報》內底有bē少ê文學作品，tsiah ê白話字文學作品會當講是台灣siōng早期ê白話文學（陳慕真，2006：119），所以mä會當講是台語文學ê早春。

教會報早期ê文學作品中，小說方面khah濟是短篇小說，siōng早一篇是1886年1月所刊ê〈日本ê怪事〉；散文方面，有bē少ê議論文kap報導文學，議論文方面，親像刊tī 1885年6月到8月ê〈白話字ê利益〉，其他iáu有〈論分囡仔ê風俗〉 (1887.04)、〈論救食鴉片ê人〉(1887.12)......等等；報導文學方面，周步霞所寫〈北港媽ê新聞〉刊tī 1886年2月所出ê第8張，其他iáu有〈Tī恒春縣行遊傳道〉(1887) 等等。算起來教會報ê白話字文學數量實在bē少，尤其伊koh是代表進入近代社會ê白話文學。下面引用1885年6月 《台灣府城教會報》第一張葉漢章所寫ê 〈白話字ê利益〉(原文攏是教會羅馬字，咱tī 遮 kā 改寫做漢羅):

論讀白話字較贏讀中國字，就是會讀，koh m̄ 使另外解說；因為中國字不止濟，解說不止難；稽考康熙字典ê字buē算tit，一字常常有幾若號解說。囡仔對七八歲入學，著讀冊到七八年，十人中聰明ê kiám-tshái有一二人大概會bat較淺ê字，只有bat字音tiānn-tiānn，攏buē曉tit解說；著koh讀十外年才會解說。Kiám-tshái所解有時亦會錯誤，oh tit逐字逐句分明，tse m̄是中國字ê m̄ 好，獨獨是因為學問ê oh-tit精工，koh解說buē一定ê緣故。

今大略舉起一兩字做憑據。親像故--字，有所在解做緣故，有所在解做本然，有所在解做所以。Koh親像以--字，有所在解做用，有所在解做thang，有所在解做因為。M̄但án-ni，iáu有濟濟oh-tit解ê字，雖然就博學ê人亦buē會逐字解說到明。看牧師有時請秀才來教聖冊，亦bat解說m̄ 著，m̄ 是因為伊m̄-bat字，抑是buē曉--tit解說，獨獨是因為字義ê解說buē會一定ê緣故。今hit號有學問ê人尚且buē會解說到tú好，何況淺學ê人thài-thó會解說聖冊到無錯誤ah？若buē會解說聖冊，beh thái會明白道理ah? 所以有心設教ê人愛傳道理tī 逐國，的確著將聖冊翻譯hit所在ê字到明，hōo 人thang讀。
    總是中國字不止oh-tit解說，所以才做這個白話字hōo攏總ê人thang學；koh將聖冊kap逐號ê冊翻譯白話字讀，家己講究冊內ê道理。設使無這號白話字，就不止少人會曉tit讀聖冊。Tse是顯明讀白話字有較贏讀中國字。

肆. 《芥菜子》ê 白話字文學

大量ê白話字文獻陸續出土，對整個台灣文學史ê重新詮釋有真大ê意義，包括語言、文化、思想ê傳播現象kap媒介，扮演著顛覆性ê角色。

副標為「北部台灣基督長老教會教會公報」、由被稱做「台灣橄欖球之父」、「台灣合唱之父」、bat擔任淡水中學校長ê陳清忠（1895-1960）創刊ê《芥菜子》月報，自1925年7月始，以季刊、白話字書寫、每期約50頁ê形式發行；第4號後（1926.5）改為月刊，各期約14頁，獨立發行至22期，tsiah併入南部長老教會主導ê《台灣教會公報》。《芥菜子》創刊者兼發行人陳清忠，mā是刊物主筆，其中刊載內容補足bē少仝時代北部ê傳教情形，也收錄真濟文學kap翻譯作品。

雖是宣教性刊物，但是創刊前就發出「宗教小說」、「翻譯」及「兒童科學」等稿件ê徵求，可見陳清忠tī編輯《芥菜子》已經有伊獨到ê思考，伊是有意識想beh提供一个創作園地，而且ùi實務性ê工課來推廣「白話字」ê「白話文創作」。伊甚至提出beh設立「Hū-jîn-nôa」（婦人欄），雖然落實上有所差距，不過tī第17號（1927.6.25）以後有出現「兒童欄」（作者為Soat-hong Ia̍t-lâm,漢文試譯為「雪風逸嵐」，應為女性）。

自第1號起，就有署名為「Soat-hong Ia̍t-lâm」發表〈論白賊〉，伊後來亦常有文章出現，而且攏kap家庭教育、女性相關，如第2號〈慈愛ê結子（聖誕ê故事）〉、第3號〈自高ê會議〉、第5號〈故事：仁愛ê報償〉、第7號〈自由女ê誤解〉、第8號〈好歹境遇攏有利益〉、第9號〈虛榮心ê淒慘〉、第10號〈智識ê源頭〉、第11號〈Tī飢糧1日久ê感想〉、第12號〈2个恭喜〉、第15號〈造化ê奧妙〉、第17號〈兒童欄　上帝ê摮〉、第20號〈感觸〉等等。

伍. 白話字文學集ê成就

白話字文學除了tī教會報內底不斷teh累積，到1924年koh有長篇ê小說來出版，he著是賴仁聲ê《Án-niá ê Ba̍k-sái》。《Án-niá ê Ba̍k-sái》這本小說包括〈Án-niá ê Ba̍k-sái〉(阿娘ê目屎) kap〈Si̍p-jī-kè ê Kì-hō͘〉(十字架ê記號) 兩卷，分別lóng有18章。賴仁聲ê小說創作量驚人，m̄-nā tī戰前有長篇小說《Án-niá ê Ba̍k-sái》（1925），戰後iáu有小說《Chhì-á-lāi ê Pek-ha̍p-hoe》（1954）、《Thiàⁿ-lí Iâⁿ-kòe Thong sè-kan》（1955）、《Khó-ài ê Siû-jîn》（1960）等等。

賴仁聲tī伊ê 小說《刺仔內ê 百合花》內底藉著S.J.牧師ê長篇演講稿，講出伊ê 愛情觀kap婚姻觀，應該是代表當時基督教ê 愛情觀kap婚姻觀，因為每個觀點提出了後，攏有引證聖經ê 內文。Tī 二、三0 年代，西方文化影響之下ê 台灣教會相當程度是進步ê ，比如講會tàng公開討論愛情、婚姻kap性。雖然咱這個時代來看賴仁聲ê 觀念，已經真保守，不過當時ê 賴仁聲牧師是比當時ê 台灣教會khah 進步ah。

散文ê部份，1926年有蔡培火ê《Cha̍p-hāng Kóan-Kiàn》（十項管見）出版。這本散本集應該是日本時代唯一一本議論性ê散文集（essay)，內底對台灣人以及台灣ê特殊性有做全面koh深入 ê論述，mā引入tī 當時算是真先進ê社會觀、文明觀、性命觀、仁愛觀等等普世ê價值觀。蔡培火tī論述中大量運用譬喻，運用這款寫作策略來達成伊教育當時智識水準偏低ê廣大台灣常民，提昇台灣ê國民水準。

羅馬字ê倉庫門khah好開

「大家已經bat羅馬字ê列位，我信列位也是時時teh掛心台灣ê進步，所以深深 祈願kap大家合氣力，暝日認真普及羅馬字。咱大家若m̄是緊緊先來bat這二十四字ê羅馬字，台灣是ê確真正oh得救。台灣現今是在知識大飢荒ê時代，大家ê頭殼碗已經空空，gō 到beh 倒落去，咱tann tio̍h緊緊tāi-sing來開這個羅馬字 ê倉庫門，這間khah好開。咱iau-gō了無力，別間倉庫門是開bē來，tio̍h對這間 先開，咱ê頭腦tsiah 會得tio̍h淡薄飽tīnn。對án-ni，咱就會thang積蓄些少ê氣力，thang koh來開國語ê倉庫，漢文ê倉庫，á是英語，以及其他種種外國話ê倉庫門。列位同胞！咱tio̍h緊緊來學羅馬字，ia̍h咱濟濟人tio̍h用羅馬字來寫濟濟ê好冊，hōo咱濟濟ê兄弟姐妹讀；hōo in thang醫好in ê精神ê iau-gō。若是án-ni，台灣就會向上，台灣就會換新，台灣就會活--起來！！」(引自〈第二項新台灣kap羅馬字ê關係〉

另外，1926年koh有鄭溪泮ê長篇小說：《Chhut Sí-sòaⁿ》（出死線）出版。《Chhut Sí-sòaⁿ》有出版上冊，寫到家族第二代總共40回。另外iáu有下冊，已經接近完稿，可惜t„太平洋戰爭hit陣美軍空襲中被炸掉去。

陸. 白話字文學hōo 咱ê啟示

白話字khah要緊是「白話」m̄是「字」。伊ê重要性在tī伊內容所呈現ê現代性以及伊tsiânn做台灣「白話文學」ê歷史意義。

Tī《Án-niá ê Bak8-sái》kap《Chhut Sí-sòaⁿ》這兩本真有代表性ê長篇小說出版ê時陣，漢字台語小說猶bē看tioh8，而且漢字書寫ê台灣新文學也tú beh起步，直接證明白話字書寫ê利便，以及母語書寫siōng ha̍h咱台灣人ê筆路。文學寫作若m̄是用家己siōng會當掌握ê語言，真明顯會阻礙文學創作ê進展。只有用母語書寫ê文學，tsiah有可能展現民族文化精神，產生世界級ê文學成就，tse是白話字文學hoō咱ê啟示。

比較著中國ê胡適、魯迅等人tī 20世紀初期tsiah開始鼓吹、進行白話文ê改革運動，1885年《台灣府城教會報》ê發刊，一開始著是白話文ê書寫，證明台灣比中國koh khah早teh做白話文「我手寫我口」ê實踐，而且tse白話文m̄-nā是口語ê，同時又koh是本土ê語言，m̄是模仿中國ê白話文。以魯迅(1881-1936)來講，1918年5月，伊tī《新青年》發表第一篇時代性ê白話文小說〈狂人日記〉，tsiânn做五四運動kap文化革命ê頭聲，tī 1923年出版伊第一本小說集，這個時陣，《台灣府城教會報》已經出刊38冬ah。Án-ni比較起來，白話字文學實在會使講是台灣文學真早真早ê一个春天。