Kóng-tó(Hi-ro-si-ma) po̍k-chà-kì
(Chiap téng goe̍h tē 18 bīn)
1962.2.15 880 18
(5)Pī-lān.
Nn̄g chàn ê hāu-sià tó lo̍h-lâi ê sî, Si-kha-ma Bo̍k-su chin kî-koài, chí-ū seng-khu tām-po̍h lù liù-phoê nā-tiaⁿ. Tng ta̍k lâng piàⁿ miā tuì chhī-lāi teh cháu chhut-lâi ê sî, i ka-kī chi̍t ê teh piàⁿ. Kàu uī ji̍p-khì chi̍t-ē khoàⁿ, lé-pài-tn̂g í-keng tó! Siok-sià iā tó! Lóng teh to̍h hoé! Bo̍k-su-niû kap 2 ê toā-hàn kiáⁿ lóng bô khoàⁿ-kìⁿ, m̄-chai tó khì. I chiū piàn kiâⁿ chhin-chhiūⁿ tē-ge̍k ê chhī-lāi, sì-koè khì chhoē. Kàu keh-ji̍t tiong-tàu chiah tú-tio̍h thâu-khak tio̍h-siong ê bo̍k-su-niû; koh kàu beh àm chiah chhoē-tio̍h toā-kiáⁿ A-iông(揚 14 hoè), thâu-khak iā chit(sic.) khang chin chhim.
Chóng-sī toā cha-bó͘-kiáⁿ iū-chú(佑子17 hoè) chhoē bô. I sī ko-lú ê ha̍k-seng, tōng-oân khì tī Thih-tō Kiám-cha-khò ho̍k-bū. I tī hia siū tāng-siong, lâu chin chē huih hiám sí; chóng-sī kiông-kiông thoa-miā lâi kàu pêng-iú ê chhù......u tī hia. Kàu tē 5 ji̍t chiah hō͘ bo̍k-su-niû kā i chhoē-tio̍h. 4 ê lâng tī hia lâu ba̍k-sái saⁿ-kìⁿ. iū-chú ê thâu-khak, chhuì-phoè, chhiú, lóng ū tāng-siong, koh teh hoat jia̍t.
8 ge̍h chhe 10, 4 ê lâng chiū pī-lān lâi kàu 2 ê sè-hàn kiáⁿ chá í-keng so͘-khai khì ê Hô-tiân chhoan. Tī hia kā chi̍t ê lông-ka chioh chi̍t keng ióng-chhâm ê liâu-á lâi chiām-tō͘. Tuì hoé-hu-sek ê chhī-lāi lâi kàu chhiⁿ-chhuì ê chhân-chng; chit ke 6 ê lâng, tit-tio̍h chiām-sî un-loán ê thoân-oân.
(6)àm-àm ê hong-siaⁿ
Chóng-sī keng-koè bô chi̍t lé-pài kú, ū kî-koài ê sū hoat-seng. Chiū-sī tuì chng-ni̍h khì tàu chéng-lí chhī-lāi ê siau-hông tuī-oân, tńg-lâi kàu-tè nn̄g-saⁿ ji̍t, chiū chi̍t-ê chi̍t-ê sio-soà ti̍t-ti̍t sí-khì. àm-àm ū hong-siaⁿ, chi̍t chhuì thoân koè chi̍t chhuì kóng,"Hō͘ hit hō kng chiò tio̍h ê lâng, lóng bē oa̍h! It-tēng ē sí! Chù-siā, chia̍h-io̍h lóng bô hāu......"Keng-koè 20 jit(sic.), pī-lān lâi tī chng-ni̍h ê chai-bîn, iā sio-soà ti̍t-ti̍t sí-khì. In ê chèng-chōng lóng sio-siāng; koân ê jia̍t, lut thâu-mn̂g, choân-sin ê pan-tiám, (âng, chheⁿ, chí-sek) í-ki̍p tuì khí-kha, téng ê chhut-huih. Hit-ê huih bô âng, ko-ko chhàu-chhàu. Hit ê huih bô âng, ko-ko chhàu-chhàu. Jia̍t, chin koân bē thè, it-ti̍t kàu sí uî-chí.
8 ge̍h 30,ē-po͘ 4 tiám, Jū-chú hut-jiân 40 tō͘, kui seng-khu sng-nńg bô la̍t. Tuì thâu-khak ê siong teh lâu lâng. Keh-piah chng ê i-seng lâi, khoàⁿ i ê khí-kha piàn chí-sek, chù chi̍t ki siā, hàiⁿ-thâu chiū khì. 9 ge̍h chhe 1, chiū lut thâu-mn̂g, seng-khu hoat chí-sek ê pan-tiám. Chhe 2, S bo̍k-su lâi thàm, sūn-soà kā iū-chú kú-hêng sìn-gióng kò-pe̍k-sek. Chhe 4 chi̍t ke uî tī iū-chú ê chhn̂g-piⁿ kú-hêng choè-āu ê boán-chhan. ēng tho-má-toh ê thng tāi-lí phû-tû-chiú, tò 2 thng-sî ji̍p i 6 ji̍t kú bô chia̍h poàⁿ-hāng mi̍h ê nā-âu(sic.). Hit mî 11 tiám 57 hun, i chiū pêng-an siū Chú kéng-tiàu lī-khui sè-kan.
(7)iū-chú ê bōng
Si-kha-ma Bo̍k-su hiān-sî iû-goân sī Hi-to-si-ma kàu-hoē ê bo̍k-su. Kin-nî 6 ge̍h, i ū tāi-piáu Hi-ro-si-ma Hô-pêng hōng-sū-hoē khì Chia̍t-khek (チェッコ) hù Ki-tok-tô͘ Hô-pêng hoē-gī. Toā-kiáⁿ A-iông, pit-gia̍p tāi-ha̍k ê Lí-ha̍k-pō͘ liáu-āu, koh ji̍p Sîn-ha̍k. Kin-nî 29 hoè,iû-goân teh chò bo̍k-su.
Tī Hi-to-si-ma chhī-lāi, Gû-tiân-san ê Ki-tok-kàu bōng-tē, ū iū-chú ê bōng tī hia. I ê bōng-pâi siá kóng.
"Hō͘ lâng hô-pêng ê lâng, ū hok-khì!"
