首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 信仰ê準繩
信仰ê準繩
卷期：第881號 本次： 日期：1962/3 刊名：台灣教會公報 頁數：4-6
篇名：信仰ê準繩 [ Sìn-gióng ê chún-chîn ]
作者：楊啟壽 Iûⁿ Khé-siū
  顯示 : 漢羅 全羅 並列  

信仰ê準繩

聖經:希伯來12:2

楊啟壽

1962/3/1   4-6

 

(編者註: Beh用啥物做咱信仰ê準繩，穩當有濟濟ê疑問。楊牧師是佇Gio̍k-san神學書院做先生，所寫這篇毋通用本身著用基督做準繩，有濟濟好ê指點，讀ê人一定beh得著濟濟利益)。

現在是一个無認真ê時代。雖然人對佇世間ê享樂á是趁錢感覺真趣味，甚至熱狂，總是對佇道德á是信仰這款ê事，感覺厭siān凊彩。

初代ê信仰，若是beh做一个基督ê學生，愛有拚命ê決心。beh做一个基督徒，著覺悟in會受社會，國家濟濟ê壓迫，心志有時愛喪失in ê性命。總是現在beh做一个基督徒實在是真簡單。濟濟人趁流行á是家己ê趣味來教會。真少 ê人實在因為信仰來艱苦，無偌濟ê人真實為著信仰teh努力。信仰只有成做好膽ê聲音，總是無閣支配基督徒ê生活。信仰變做死ê文字，人會通隨便講：也無感覺所teh講ê信仰有啥物意思。

  到底咱ê信仰是啥物？到底為著啥物初代ê信徒提出in ê性命來換in ê信仰？咱ê信仰ê準繩是啥物？咱用希伯來12章第2節「著注神看耶穌，就是做信ê源頭kap chhiâⁿ尾ê，」來想這个事。

聖經共咱講，咱著注神看耶穌，無寫講，著注神看「家己。」古早人ê神明是對in家己ê心生出來ê。 In teh拜ê，實在是teh拜家己，也in家己就是對in家己就是上帝。 In ê信仰不過是家己ê思想。咱也常常用家己ê思想teh判斷信仰，對佇家己ê判斷來處理咱人生ê濟濟問題。當咱ê生活有大問題愛咱選擇真重要ê事ê時，咱較常是注神看家己-----家己ê經驗，家己ê良心á是智慧。按呢咱是teh信家己。咱本身成做信仰ê準繩，變做有咱chiah有上帝。

到底咱是啥物？聖經報咱知，人ê心已經是臭去，人ê心充滿顧家己，充滿罪惡。人按怎努力，伊所做出來只有是巴別ê塔，粉白ê墓。

  阿摩士捌一擺看見異象:伊看見一choā城牆是照繩線起ê，閣看見主徛佇hit頂面手也提繩線。伊聽見耶和華對伊講，「我beh牽繩線佇以色列百姓中。」用人ê目睭來看hit-ê牆-kiám-chhái是真直閣媠，以色列百姓也家己想講：in是上帝ê百姓，是聖潔ê，上帝所歡喜ê。總是無拍算佇上帝ê準繩ê下面是bái，是充滿上帝受氣ê百姓。

聖經報咱知，人不過是土粉，是水桶ê一滴水。In ê思想是空空，in ê袂曉悟ê心變做烏暗......人所有ê好，只有將咱ê主送到十字架。咱常常袂記得咱不過是人，是罪人。咱常常用嚴hat ê話來攻擊古早ê法利賽人，也袂記得咱本身也是hit款假好ê人，驕傲kap假好就是咱ê人性。

咱ê手常常舉本身，無舉耶穌。咱常常掠家己kap上帝平等，甚至徛佇頂面批判上帝。咱做教會ê主。咱做咱家己ê主。咱ê腹肚變做咱ê上帝(腓立比3:19)。注神看家己就是咱信仰生活ê中心。咱做生理，工作，讀冊，甚至傳道ê指南針也是家己。佇一切ê一切咱變做主人。這決斷毋是聖經teh講ê信仰。

咱毋若毋通注神看「家己，」也毋通注神看「別个人。」世間ê聖人kap gâu人ê生涯做咱真大ê勉勵，in幫贊咱ê信仰向上；總是in決斷毋是咱著注神看ê。保羅，彼得......不過也是teh注神看hit-ê人。咱毋通用gâu人做信仰ê準繩。In毋是hit-ê光， in只有是反射光ê人。

若是按呢，啥物是咱唯一信仰ê準繩？聖經講：是咱ê主耶穌基督。「著注神看耶穌，因為伊是咱信ê源頭kap chhiâⁿ尾。」

世間會變換，總是只有這个準繩永遠袂變換。咱對佇信伊，對佇仰望伊。咱滿滿是烏暗罪惡ê人生，得著人想袂到ê改變。苦楚我ê罪因為基督耶穌ê赦免失落伊ê權勢，愛死也袂通死ê人生，基督用伊ê活命充滿咱！對古早到今á日，耶穌基督通過聖靈，伊ê教會報咱知這个好ê消息。猶太人，羅馬人想beh用in ê刀劍kap世上ê權力拍hoa基督ê光，有ê人用思想，理性ê雲siuⁿ beh遮蓋基督ê光；總是hiah-ê攏過去，也beh過去，到佇今ná日基督ê光猶過teh燦爛，甚至到永遠伊beh指示咱ê路。只有耶穌是永遠ê「是，」也毋是親像世間ê學說，今ná日「是，」也明ná日就變「毋是」(II 哥林多2:19)。

  今ná日咱beh用啥物方法chiah會知耶穌基督ê事？耶穌現在無親像早時閣生活佇人ê中間，猶過咱會當通過聖經，對聖神ê幫贊知耶穌基督ê事。

宗教改革用聖經做in ê權威。聖經所記ê事，有ê kiám-chhái咱現在猶袂理解，總是全本聖經beh報咱知ê，就是hit-ê疼咱ê上帝，為著beh拯救咱，成做肉體，臨到世間ê好ê消息。聖經啟示上帝ê疼，伊ê旨意，伊ê拯救。人若佇聖經袂通揣著這个真理，就雖然講伊暗記了全本聖經，á是聖經學者攏是空空著磨。

  今ná日咱愛較出力研究聖經，因為聖經報咱知咱ê信仰ê準繩同時咱也毋通袂記得開聖經寶庫ê鎖匙就是耶穌，聖經ê中心就是予人釘佇十字架頂ê耶穌。歷代信徒為著beh得著這个耶穌，in歡喜提出in ê性命。

猶過咱今ná日感覺痛苦ê，就是咱雖然知chit-ê真理，總是咱ê生活無氣力。有時愈講起信仰也感覺ná離開信仰。今ná日ê教會雖然常常講起基督，也教會ê數目一直增加，總是予咱感覺無氣力抵抗世間ê歹，領導咱ê社會。初代教會hiah-ni̍h細ê團體，怎樣搖動當時hiah大ê羅馬帝國？是毋是咱ê信仰歪chhoa̍h？

信仰毋是文字，也毋是教義。信仰毋是只有用這个頭殼所理解ê。聖經講：咱著「注神看」耶穌。

親像駛車ê人「注神看」伊頭前ê路，咱基督徒生活ê最大「關心」也應該是基督。因為若失落一切，若行佇耶穌所chhoā ê路咱就beh得著一切。因為按呢，信仰毋是只有知著注神看耶穌，耶穌就是基督；信仰就是咱決心，(雖然是聖神ê幫贊)集中咱ê全生活，日日仰望基督。

注神看耶穌，予咱通學伊， 綴伊ê跤步。耶穌怎樣放拺家己ê榮光，為著疼咱心志到死。咱若信伊，也著按呢放拺咱家己，疼上帝。

信仰因為按呢是向基督奉獻咱家己ê決心。基督徒想獻身是屬佇傳道kap牧師，毋知人若是信耶穌，就是表示beh為著伊獻家己ê一世人，做伊所歡喜ê事。

保羅講：「伊teh活，毋是猶原我，就是基督踮佇我teh活，」閣講：「活，就是基督，」閣講，「咱若活，是為著主來活；死，也是為著主來死。」以前保羅照家己ê意思teh生活；總是對大馬色受揀召hit日起，伊看以前ê生活做損害，做糞埽，也只有用心beh得著基督，beh予伊歡喜。伊毋是伊ê主人，伊家己看本身做耶穌ê奴僕。

  Hit款ê生活毋是teh kún笑，凊凊彩彩ê生活。十字架ê路是放拺家己，是充滿苦痛ê路。咱會為著別个人ê靈魂，人生，為著社會，國家憂傷痛苦。人beh笑你是愚戇，是痟ê，你會為著福音受濟濟ê見笑。這條路oe̍h，細條，孤單。你肯ma̍h？請你注神看耶穌；夯你ê十字架綴伊ê跤步！

咱今ná日怎樣感覺chiah-nih無力？咱真厭siān，信仰常常搖動。因為咱猶毋捌深深體驗伊ê疼；猶毋捌佇主ê面前，佇咱ê心內深深ê所在決心講：主我愛將我ê一生獻予你，雖然予世間人笑做戇，也毋願予你失望。

主願你赦免阮ê自私。願你賞賜你ê心kap你ê疼，予阮會通一世人仰望你，聽你佮阮ê厝邊。

  玉山神學書院: 楊啟壽。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461