首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 受難週ê意義
受難週ê意義
卷期：第883號 本次： 日期：1962/4 刊名：台灣教會公報 頁數：2-4
篇名：受難週ê意義 [ Siū-lān-chiu ê ì-gī ]
作者：李雅各 Lí Ngá-kok
  顯示 : 漢羅 全羅 並列  

受難週ê意義

李雅各

1962/4/1 883 期 2-4

這篇ê作者李牧師現時當台北神學院ê教授。伊有留學日本kap美國濟濟年，本篇有用伊豐富ê聖經神學ê智識來闡明，相信會通幫贊大家ê知識kap信心chiah著。

 

咱ê主耶穌ê受難週已經接近到佇咱ê目前。Taⁿ佇這个受難週，自然就是beh予咱數念咱ê主耶穌ê受難佮咱ê關係，也紲想咱做基督徒應該有ê態度。Taⁿ我愛分做3段來想，就是: 1)受難ê彌賽亞。2)榮光ê彌賽亞。3)基督徒ê態度。

1.受難ê彌賽亞。

這个就是耶和華ê僕人。耶和華ê奴僕ê受難，就是根據耶和華本身ê啟示。耶和華ê啟示有記載佇聖經。這个聖經所記ê，就是咱ê信仰kap神學ê根源。咱對舊約聖經來看受難ê彌賽亞ê時，有真濟ê章節thang明明做咱ê證據，也thang幫贊咱ê確信。

a.舊約ê論證。佇原始福音有講婦jîn人ê後裔beh佮魔鬼（就是表現做蛇）來爭戰。伊beh受傷，總是伊ê最後就是勝利(創3:15)。這个預言就是佇上帝攝理ê內面，應驗佇救主耶穌基督。先知以賽亞，預言這个彌賽亞beh出現佇卑微ê形狀佮伊佇曠野ê生活(以賽亞40:3)。佇第2以賽亞書ê內面(40－50章)也有講起這个受難ê彌賽亞，就是耶和華ê僕人，beh用真理ê光來報以色列ê百姓kap「異邦」。通明白這个真光 (以賽亞42:1-7)。伊就是救世主，伊beh受苦閣為著別人ê罪來死(以賽亞42:1-7)。佇49:7有講：伊beh受人看輕，受百姓所厭惡，官長所壓制。佇以賽亞50:5， 6講起雖罔著愛用最大ê犧牲，這个彌賽亞也甘願來做這个工，講：「人拍我ê ka-chiah-phiaⁿ，我出在伊拍;人chhoah我ê喙phoè ê喙鬚，我出在伊chhoah;人凌辱我，kā我phuì-noā，我也無掩面。」這攏總是teh描寫受難ê彌賽亞所beh受ê苦難。也有講「濟濟人為你gông-ngia̍h，伊ê面貌比別人較有損傷，伊ê形狀比世間人較有損害」(以賽亞52:14)。閣講："伊受看輕，予人放拺，受濟濟苦痛，常常拄著憂悶」(以賽亞53:3)。

Taⁿ這个救主實在是無罪，總是伊為著世間ê罪來受苦，甚至到佇死。閣有講："伊實在擔當咱ê憂悶，背咱ê苦痛;總是咱掠做伊受責罰，予上帝拍，閣受苦楚，若是伊為著咱ê過失受傷，為著咱ê罪過受害，伊擔當刑罰，咱得著平安;伊受鞭拍，咱得著醫好。」對chiah-ê聖經章節，咱通知chiah-ê攏是彌賽亞受難ê預言。卻有人kiám-chhái beh講：chiah-ê章節也是teh指起起以色列攏總，á是凡若受揀選攏總ê信徒。總是咱thang講chiah-ê章節是teh指基督，就是彌賽亞。Taⁿ chiah-ê預言佇新約是啥物款？

b.佇新約所講ê彌賽亞是照下面:西門有講這个彌賽亞著受難。伊講：「一个嬰á受設立beh予以色列中濟濟人跋倒，做辯駁ê記號」(Lk 2:34)。行洗禮約翰講：「"上帝ê聖羔"，就是引用以賽亞53:7 ê (約翰1:29)。佇馬太20:28講：「人子來，毋是beh差用人，是beh予人差用;閣獻伊ê性命，來贖回濟濟人。」這句話就是咱伊本身所beh做ê代誌。佇伊佮學生beh去橄欖山ê路中，耶穌有講：「算伊佮不法ê人同列，這句話的確應驗佇我。」耶穌本身有明白伊的確著為著罪人ê緣故，著佮罪人同等來受款待。伊受人phuì-noā，閣予人用拳頭母cheng伊，伊知伊著為著罪人來流出伊ê寶血(馬太26:28)。這是beh赦免咱ê罪ê緣故，伊佇十字架頂有為著罪人來祈禱(Lk 23:24)。照先知以賽亞所講ê，講：伊本身領受咱ê軟弱，擔當咱ê病症(Mt 8:17)。耶穌ê死實在是為著咱ê病症來死ê。

Taⁿ基督耶穌為著咱ê罪死，就是"伊佇柴裡親身擔當咱ê罪佇伊ê身軀，予咱向罪hit面死ê人，會向義這面來活;對伊ê傷痕咱得著醫好」(I 彼得 2:24)。若毋是對基督耶穌ê死，咱就袂通得著醫好，通成做義人。有不止濟猶太人毋相信耶穌就是救世主。總是也有一部份ê拉比有相信耶穌就是基督，伊替咱來死。佇舊約詩篇，撒迦利亞，以及其他ê先知ê冊ê內面有讖語關係這个基督beh替咱來死ê事，總是因為都合上，咱袂通來詳細論。總講：基督ê死是為著beh予咱有罪ê人通得著拯救。咱taⁿ愛來相kap討論閣一个方面，就是榮光ê彌賽亞。

2.榮光ê彌賽亞。

Taⁿ這个耶和華ê僕人，伊毋若是受難ê彌賽亞，閣一方面也是榮光ê彌賽亞。這个榮光ê彌賽亞，毋是因為伊是一个完全ê人，佇道德上有完全chiah受高升做彌賽亞。伊ê彌賽亞就是出佇伊ê本性，因為伊原本佮上帝相kap佇leh (約翰1:1)。佇舊約以賽亞52:13講：「看ah，我ê奴僕beh用智慧行代誌，beh受舉起升懸，閣beh成做真懸。」總是咱著愛會記得，就是伊佇順從上帝ê意思來死佮受難後，伊beh得著榮光ê勝利kap高升。因為有講：「耶和華所歡喜ê事beh佇伊ê手中興通，這个彌賽亞ê死佮閣活beh激動濟濟國ê百姓(以賽亞52:15)。連諸君王也beh呵咾伊ê名。佇詩篇22:23有記講：因為伊得勝佮伊所得著ê榮光。詩人忽然beh對悲傷變成做讚美ê聲。彌賽亞因為伊ê死上帝有高升伊，這个就是受難ê奴僕ê榮光。因為上帝佇伊ê攝理ê內面，看受難是最大ê榮光。咱也通看約伯ê受難，總是伊攏無怨言，反轉感謝，益發深信上帝ê攝理。

3.基督徒對佇受難週ê態度。

頭一項咱所著想ê，就是基督徒是啥物？基督徒就是受主揀選來跟綴救主耶穌ê人。Taⁿ每一个基督徒都是受著選召ê，若是按呢，受選召ê意義佇tá-lo̍h？換話來講：上帝揀選咱，紲交代咱ê使命，是beh予咱受揀選來擔帶伊所交託咱重要ê工作。基督徒毋是受揀選來beh享受上帝ê祝福nā-tiāⁿ。咱猶未受祝福ê代先，著愛完成上帝所交託咱ê工作。

基督教是流血ê宗教。閣換話來講：就是犧牲ê宗教。咱ê信仰若毋是對咱ê主ê寶血就無完全。換話來講：咱ê信仰就是建造佇基督耶穌ê犧牲來造成ê。咱ê主有講：「人子來，毋是beh差用人，是beh予人差用。」伊來就是beh做人ê奴僕。Taⁿ予咱通想，伊揀選咱就是beh做伊ê奴僕，就是beh來受難ê。 Taⁿ咱beh佇啥物方面內受難？

a)為著義來受難...：基督是義ê彌賽亞，猶過為著不義來受苦楚，甚至到死。咱beh為著咱ê義來活，就著愛代先佮咱內面ê不義交戰。咱為著這款ê交戰，著愛有堅定ê心志來食苦。換話來講：就是受難。Beh變成做不義ê人是較快，總是beh成做義人是不止困難，所以著愛受苦忍耐。

b)佮罪惡交戰。這世間就是罪惡ê世間。咱ê主講：「我差恁入世間，親像差羊入豺狼。」佇這世間有魔鬼ê誘惑，就是金錢，名聲，地位，歹ê環境等等ê誘惑，予咱致到犯罪，chiah-ê攏是咱內面ê自我，就是人性。這就是對亞當所留落來反逆上帝ê本性。咱著愛拍死這个罪惡ê根源，為著這个咱著愛爭戰。總是這款ê爭戰，是著忍苦chiah會得得勝，按呢chiah有合宜佇受難。

c)信仰ê爭戰。信仰就是咱做基督徒做第一要緊ê要素。咱毋是beh為著啥物款ê報賞來爭戰。若是按呢，是傷過功利的ê信仰。咱只有是為著保持信仰來爭戰，若按呢，後來就會得著報賞。因為有真濟人放拺in ê信仰。著知為著信仰爭戰到路尾ê人，伊beh得著最後ê榮光kap報賞。咱佇這个受難週，只有著知按怎chiah會t通完成咱ê信仰。基督徒就是受揀選來beh做奴僕ê。咱著愛這款犧牲ê精神chiah會通真實適合佇咱ê主ê受難週，按呢chiah是有真ê意義。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461