Sèng-tē Hóng-būn-kì (18)
1962.05.01 885 kî p.14
Lâu Hoâ-gī
13) Sèng-tiān
V. Goân Sèng-tiān ê khu-he̍k (HaramArea)
Khiā tī Chio̍h-giâm ê îⁿ chhù-téng ê sī-īⁿ ê kiā-á ǹg tang, sai, lâm, pak lâi khoàⁿ chit phiàn khoan-khoah ê lāi-tiâⁿ ê sî, ū kám-khài bû-liōng ê cheng-sū[sic.] hoat chhut-lâi. Í-sek-lia̍t ê n̂g-kim chhàn-lān ê sî-tāi, taⁿ tī tó-uī? Iû-thài lâng só͘ khoa-iāu, bîn-cho̍k cheng-sîn ê tiong-sim, éng put-bia̍t Siōng-tè ê chhù.....Hit ê chun-kuì êng-iāu tī tá-lo̍h? Taⁿ sī chiâⁿ-choè kè-khì ê kì-e̍k nā-tiāⁿ.
"Ū lâng kóng-khí tiān-tn̂g sī ēng hó chio̍h kap só͘ hiàn ê mi̍h lâi chng-thāⁿ, hit sî Iâ-so͘ kóng, Lín só͘ khoàⁿ-kìⁿ hiah ê mi̍h, ji̍t-chí beh kàu, tī chia beh bô chi̍t tè chio̍h lâu tī chio̍h ê téng-bīn" (Lō͘-ka 21:5, 6). Kàu-gia̍h thang kiaⁿ-hiâⁿ ê, chiū-sī Chú Iâ-so͘ ê oē, kó-jiân èng-giām, kàu chiah-nih chèng-khak kap thiat-té. Hiān-sî tû-khì Hoê-kàu ê sī-īⁿ í-goā, chit phiàn lóng sī khàng-tē. Chú ê oē éng-oán boē lo̍k-khong, chiàu I kóng, "Thiⁿ kap toē beh bô khì, goá ê oē boē hoè-bô" (Lō͘-ka 21:33). Sióng-siōng tī chit phiàn khàng-tē, chá-sî ū tông-hông ê tiān-tn̂g, chòng-giâm ê gî-sek, hô-hoa[sic.] ê chè-sū; chè-si bí-lē ê i-ho̍k... Tuì pún-kok á-sī tuì sì-soàⁿ khiā-khí tī pa̍t ê kok-ka tńg-lâi siú choeh ê kuí-nā bān ê Iû-thài lâng, í-kip kái-kàu ê goā-pang lâng só͘ chhēng kok iūⁿ, kok hoe-sek ê i-ho̍k, tī chia kheh-lâi kheh-khì, chǹg-lâi chǹg-khì nāu-jia̍t ê kong-kéng, hit ê hâng-ngó͘, taⁿ sī pìⁿ-chiâⁿ ná chhin-chhiūⁿ àm-mî chi̍t kiⁿ ê bîn-bāng teh kè-khì lah. Nā m̄-sī ū tha̍k Sèng-keng, á-sī bat Iû-thài bîn-cho̍k ê le̍k-sú ê lâng í-goā, bô lâng káⁿ siong-sìn tī chit phiàn ê toē ū chiah-nih toā ê sū-kiāⁿ bat hoat-seng kè. Goá tī chia lâi pîn-tiàu chiah ê kū-choa̍t Siōng-tè ê Kiáⁿ Bí-sài-a, ngī-sim soà kā I tèng sí ê Iû-thài lâng só͘ tú-tio̍h chhiⁿ-chhám ê chô-gū. Chú-āu 70 nî liân Sèng-tiān ê toē-ki iā siū Lô-má peng ku̍t péng khí-lâi; kok phoà bîn sàn, Iû-thài lâng liû-lōng tī tē-kiû siōng, 2000 nî kú pìⁿ-chiâⁿ bông kok peh-sìⁿ, khiā-khí tī lâng ê nî-chîⁿ ē, só͘ tú-tio̍h kiâm, sng, khó͘ loa̍h ê seng-oa̍h: - siū pâi-thek siū chân-sat ê khó͘-kéng.....Si̍t-chāi Siōng-tè boē bú-bān tit (Ka-lia̍p-thài 5:7). Siūⁿ tio̍h Chú siū sím hit ji̍t, in Iû-thài lâng toā siaⁿ chi̍t choê ìn Pí-lia̍p-to kóng, "I ê huih kui tī goán kap goán ê kiáⁿ-sun" (Má-thài 27:25). Chit nn̄g-chheng nî lâi, iû-thài lâng chiū-sī teh siu-sêng in ka-kī só͘ iā ê; chiap-siū só͘ iok-sok ê pò-èng.
Chit phiàn ê thó͘-toē ū 34 acre (英甲) chiu-uî hō͘ siâⁿ-chhiùⁿ[sic.] kap kiàn-tiok-bu̍t[sic.] pau-uî teh, chiah ê siâⁿ-chhiûⁿ ū pō͘-hūn iā í-keng chin kó͘ lah. Tang-pêng kap lâm-pêng sī sūn siâⁿ-chhiûⁿ choè kài. Siâⁿ-chhiûⁿ ê ē-chàn sī Lô-má thóng-tī sî-tāi, téng-chàn sī 500 goā nî chêng ê kiàn-tiok[sic.]. Pau-uî chit ê khu-he̍k ê tang-pêng siâⁿ-chhiûⁿ ū 154 tn̄g, lâm-pêng sī 167 tn̄g tn̂g. Pak-pêng kap sai-pêng sī khí chhù lâi kap chhī-ke keh-lī. Chiah ê kiàn-tiok[sic.] hiān-sî ēng choè ha̍k-hāu, á-sī choè koán-lí ê pān-kong-thiaⁿ ê lō͘-ēng, ū 13 ê mn̂g thang chhut-ji̍p. Lâm-pêng in-uī ū chi̍t keng Hoê-kàu ê sī-īⁿ khí tī siâⁿ-chhiûⁿ téng, só͘-í bô chhut-ji̍p mn̂g í-goā, tang-pêng ū 3 ê, sai-pêng 7 ê, pak-pêng 3 ê. Chóng-sī tang-pêng kap pak-pêng ê mn̄g[sic.] lóng koaiⁿ khí-lâi, chí-ū tuì sai-pêng teh chhut-ji̍p. Tang-pêng ê chhut-ji̍p mn̂g ê chi̍t ê, sī kiò-choè N̂g-kim ê mn̂g (Golden gate). Lán ê Chú khiâ lû tuì chia ji̍p sèng-siâⁿ. Kàu Hoê-kàu chiàm-kù í-āu, chiū koaiⁿ khí-lâi. Tī si̍p-jī-kun chiàm-niá ê sî, ū chún chi̍t nî khui nn̄g pái. Chóng-sī Hoê-kàu-tô͘ ū koh kā i koaiⁿ khí-lâi kàu hiān-chāi.
Tû khì Îⁿ-chhù-téng ê sī-īⁿ í-goā, tī chia ū chiah ê kó͘-chek. (Thāi-sio̍k).
