首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 宋尚節博士 (6)
宋尚節博士 (6)
卷期：第926號 本次： 日期：1964/1 刊名：台灣教會公報 頁數：5-7
篇名：宋尚節博士 (6) [ Sòng Siōng-chiat Phok-sū (6) ]
作者：蔡愛義 Chhoà ài-gī
  顯示 : 漢羅 全羅 並列  

話劇

宋尚節博士(VI)

蔡愛義作

1964.01.15  926 期  P.5~7

 

醫生：  宋博士，你ê父母，兄弟姊妹有捌人犯著精神病無？

宋博士：醫生，你是看我做痟人是毋？請你測驗我ê頭腦，就會明白。你通調查我所讀過去ê大學教授，也通看我ê博士論文kap我翻譯ê佛經，道德經kap我所著英國孤兒院ê歷史，佮舊約耶利米ê註解。

醫生：宋博士，你實在真聰明，但是需要休息靜養。

宋博士：醫生，啥物時陣chiah會當出院。

醫生：大概40日就夠額，請毋通著急。(兩人出去，宋博士大聲讀聖經，讀2， 3擺。醫生佮護士閣來)。

醫生：  宋博士，今仔日精神有爽快無？昨暗好睏無？

宋博士：醫生，你精神爽快無？你昨暝好睏無？醫生你實在真無禮，你猶過看我做痟人，滿喙白賊，我來病院hit日，你講40日就會予我出院，現在已經150日，猶過毋准我出院，到底啥物時chiah beh予我出院？

醫生：  宋博士：，前日你若無偷走出去，予人掠轉來，大概已經予你出院lah。

  宋博士：醫生，我蹛這間病房，根本無法度通活lah。幾日前拄好我入院126日，我想beh自殺， tháu了褲帶，想beh吊脰ê時，忽然上帝ê聲臨到我講：「細囝，你是我用寶血贖回ê，怎樣beh行短路自殺neh?」對hit日起，我就加倍敬畏上帝，勤讀聖經。現在新舊約已經讀30遍lah，上帝安慰我講著忍耐，到193日我所背ê十字架就會解除，所以我ê心已經平安lah。

醫生： 宋博士，真恭喜，向望你ê上帝庇佑你，佇hit日通恭喜出院。

 

  第8幕：精神病院ê會客室。

佈置： 椅，桌攏齊備，宋穿整齊ê衣服行入室內，華博士，醫生，護士徛--起來。

  華博士：  (佮宋握手)。

  宋博士平安！無拍算我佮你離別了後去歐洲，到昨日chiah轉來，拄拄是一年，這中間，雖然寫真濟張批予你，但是攏無接著你回批。昨日去協和神學院揣院長，chiah知影你佇遮，聽講已經193日lah。上帝庇佑你平安，真恭喜。

  宋博士：  華教授，真多謝，我予痟院長佮痟醫生關蹛痟人病院，足足193日。但是我佇病院讀新舊約有40遍，予我得著上帝ê恩典kap聖經中ê啟示真大，感覺真快樂kap感謝。痟醫生真多謝。(徛起來佮醫生握手)。

醫生： 華博士，毋知你肯做保證人chhoā宋博士出院無？但--是有一個條件，就是出院後馬上送宋博士坐船轉去中國。

  華教授：院長，我肯做保證人，請你隨時辨理准宋博士出院。

醫生：  (護士提卡片予醫生，醫生簽字。)。

  宋博士，我准你出院，恭喜。

  華夫人：  宋博士恭喜，請來去阮兜行行。(大家握手離開)。

 

 第9幕：宋牧師客廳。

佈置：佮出國前siāng款。

幕後ê放送：宋博士離開鄉里、本國佮父母已經7年半。1927年11月8日，身軀穿一領粗布長衫，手捾行李轉來故鄉踏入客廳。

  宋牧師：你是啥人？

  宋博士：  A-pa，我是約翰。

  宋牧師：  Hò͘!你正正是Chú-un，果然是起khong，啥物你是約翰。

  宋博士：  A-pa，以前ê Chú-un已經死-lah，現在是有活命ê約翰轉來ê。

老母：Chú-un，Chú-un，我所疼ê囝Chú-un，你轉來lah，感謝主！呵咾主！我趕緊來刣你所愛食ê雞，也順紲通知Lîm親家， 親姆佮Kim-hoâ來(老母退出)。

 宋牧師： Chú-un，你這件行李，以外猶有啥物物件無?

  宋博士：  A-pa，我所有ê物件就是這个行李，內面是破閣舊ê衫褲nā-tiāⁿ，因為我所讀過去ê冊一切都燒了lah。

  林親家：Chú-un恭喜，你平安轉來。(兩人握手)。

  宋博士：  A-pa，平安！恭喜！

  林親姆：Chú-un，恭喜！

  宋博士：  A母，平安！(大家握手)。

  宋博士：  Kím-hoâ平安，真多謝，我出國中父母得著你ê幫忙，真多謝。(兩人握手，Kím-hoâ流目屎，吳校長行入來)。

  吳校長：  宋博士恭喜！

  宋博士：  吳校長平安，(握手，siāng時老母捧飯菜入來，Kím-hoâ馬上kā幫忙，大家坐做夥，宋牧師起來感謝)。

  宋牧師：多謝天父上帝，阮ê喙著稱讚你ê權能，你ê thiàⁿ-thàng，你ê憐憫予阮袂測度得，你賞賜我ê囝兒Chú-un， 7年半久出國，今仔日平安轉來，全家歡喜相見，阮深深感謝不盡，今後一切ê事求你kā阮安排。現在阮beh享受ê代先靠耶穌ê名感謝。À-bēng。  (大家盡力食，食了後博士徛起來)。

  宋博士：敬愛ê校長，a-pa， a母佮諸位。我佮恁離別7年半，今日平安轉來，看見大家平安，真快樂，感謝上帝ê鴻恩。我雖然佇美國得著化學博士，也得著金匙獎章。但--是博士ê博士ê文憑佮獎章已經kā tìm落去太平洋lah，我所讀過ê冊全部kā燒了lah，只有帶一本，是我讀40遍ê聖經轉來而已。以前ê Chú-un已經死lah，現在是救主耶穌kā我改名ê約翰teh活。今後一切攏是趁主ê命令，指示來活而已。

  宋牧師：Chú-un，你已經提博士轉來，也著替我趁一點仔錢來幫贊家內ê生活費，因為現在我ê月給 chiah有35箍nā-tiāⁿ。

  宋博士：  A-pa，我得著化學博士ê時，北京大學ê醫學院長有拍電報來beh請我去教冊，年俸beh一萬箍，我有kā伊拒絕lah。我畢業ê大學叫我去北京大學，專攻化學，我有kā伊拒絕。世間一切ê名，lī我無緣，只有為主傳福音是我一生ê使命。

  吳校長：  宋博士，你ê名聲傳遍美國，我攏知-影，不過現在你猶未決定方針，暫時來母校教化學好無？自然我袂阻止你向學生傳道ê事。

  宋博士：既然校長ê好意，我歡喜接受，自然我也有意思向學生傳道。

老母：Chú-un，你今仔日轉來，大家都是真歡喜，你已經25歲， Kím-hoâ也是25歲，我想近日中來舉行結婚典禮是最好，最要緊ê事。

  宋博士：  A母thiàⁿ-thàng 恩深無極，雞煮了真好食。結婚ê事請a-pa， a母設法就是，我無意見。

老母：毋知親家，親姆怎樣，啥物意見？

  林親姆：當然阮無異議，贊成，也會盡量趕緊幫贊Kím-hoâ備辦嫁妝。

  林親家：  親家， 親姆真多謝，予恁請真飽，請Chú-un你chiah常來阮兜thit-thô，阮先失禮。Kím-hoâ你chiah遮幫忙親姆， khang-khè做了chiah轉來。你請。

 

(待續)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461