THOÂN-KÀU-CHIÁ CHÚ-LÚ Ê KHÓ͘ LO̍K
Ông Chhái-kí
1964.01.15 926 kî P.11-12
Ū chi̍t ji̍t, Kong-pò-siā ê phian-chhip sian-siⁿ kiò goá siá goá choè bo̍k-su kiáⁿ ê sim-tek, lūn goá choè bo̍k-su kiáⁿ ê sī sū-si̍t ê, chóng-sī goá sī ham-bān(sic) kóng, iā ham-bān(sic) siá, só͘-í ū the-sî, nā-sī phian-chhip sian-siⁿ chài saⁿ ê kau-thok, só͘-í goá chiah siá goá só͘ oē kì-tit, só͘ kám-sióng ê choè tāi-ke ê chham-khó.
1. Goá sī tē 7 ê cha-bó͘-kiáⁿ: Lán ê hong-sio̍k sī tiōng lâm kheng lú, nā siⁿ tio̍h lâm ê(sic), chiū kóng kiong-hí; nā siⁿ tio̍h lú--ê, chiū kóng soè-á siaⁿ, iā hó. Goá choè tē 7 ê cha-bó͘-kiáⁿ, goá ê í-chêng bô poàⁿ ê ta-po͘-eⁿ, liân-soà 6 ê lú--ê, goá chhut-sì iā-sī lú--ê, nā phó͘-thong ka-têng, lāu-bú tio̍h háu, lāu-pē tio̍h chhuì-á tū-tū, a-kong, a-má lóng m̄ kā i choè ge̍h-lāi, m̄ chêng-goān hō miâ, chhìn-chhái hō, Bóng-io, Bóng-chhī, Ke-sái, M̄-tihN8, Hūn-á, oàn-á, Chio-tī, á-sī pun lâng choè sim-pū-á siū lâng khó͘-to̍k. Goá ê pē-bú, tuì goá chit ê tē chhit cha-bó͘ gín-ná, kap goá ê a-chí teh thāi-gū lóng sio-siāng, tuì hō-miâ khí, tī io-chhī, tī kàu-io̍k, tuì iù-tī-oân, tiong-ha̍k kàu choè kheh lóng bô hun-piat, só͘-í che goá lia̍h choè tē it hēng-hok.
2.Choè bo̍k-su ê kiáⁿ: Goá sī Siōng-tè siúⁿ-sù ê, Siōng-tè bô chiong goá kau-tāi tī phó͘-thong lâng, sī kau-thok tī I ê lô͘-po̍k. I pún-sin sī choan-bū kî-tó, tha̍k keng, thoân-tō, ka-têng sī Ki-tok-hoà bô͘-hoān ka-têng, m̄-nā ū hó ê thai-kàu, iù-tī-hn̂g, kok-bîn ha̍k-hāu, tiong-ha̍k, tāi choan(sic) ê kàu-io̍k, koh ū chá àm ka-têng lé-pài, sī chiong goán gín-ná choè tiong-sim, gîm goán gín-ná só͘ oē-hiáu ê si, tha̍k gín-ná só͘ ē-hiáu ê Sèng-keng, kóng gín-ná tō-lí, án-ni chi̍t nî ū 365 pái. M̄-sī lāu-pē ê oē, sī ēng Chú ê kéng-kài kap kàu-hùn lâi kà-sī goán, kiò-choè chìm-lūn chi chìm (浸潤之浸), chìm kú oē chhiūⁿ chhiⁿ-thî, thiaⁿ kú chiū oē bat. Goán lóng tī ji̍p kok-bîn ha̍k-hāu í-chêng, chiū oē-hiáu tha̍k Sèng-keng. It-poaⁿ lóng khoàⁿ ha̍k-kho pí bat Sèng-keng khah iàu-kín, khoàⁿ seng-ha̍k choè tuì-tiōng, boē kì-tit Iâ-hô-hoa siúⁿ-sù tì-huī, chai-bat kap chhang-miâ, lóng tuì I ê chhuì chhut I kā chèng-ti̍t ê lâng chek-chū tì-huī (Chim-giân 2:6, 7), che sī tē jī hāng ê hēng-hok.
3.Goán ê ka-têng sī khò-ài(sic) ê: Hoê-sióng tī Kau-phiâⁿ kàu-hoē ê sî, goán ū saⁿ ê soè-hàn chí-bē, chiū-sī 6 chí Tâi-lâm tē jī ko-lú pit-gia̍p, goá sī chho͘-tiong 2 nî, tē 8 ê sió-bē tī kok-hāu. Chiàn-cheng po̍k-kek ê sî toà tī chia ê soaⁿ-lāi kuí hāng sim-sek hoaⁿ-hí ê sū.
(1) Lia̍h hî-á: Bu̍t-chu khoat-ha̍t ê sî, ū chîⁿ bô tè thang boé mi̍h ê sî, lāu-pē chiū ēng hê-lāng, ēng bí-khng chhiau-pn̄g choè oân, chhin-chhiūⁿ îⁿ-á hiah toā lâi pû hō͘ phang, chiah hē tī hê-lāng lāi, khǹg tī khoe-nih, ē-po͘-sî khì hē, bîn-á chá-khí khì siu, goá kap lāu-pē khì hē, ēng chio̍h-thâu-á choè kì-hō, goá iā oē-hiáu. ēng tek-ko-á lâi chhng hê-lāng, taⁿ kàu khoe-á khì hē, khì siu; lāu-pē bô-êng goá iā bat khì hē, siu iā tek-khak pún-lâng khì chiah siu oē chiâu-tio̍h, sio̍k-gú kóng, "Chi̍t lâng khǹg, chèng lâng chhē." Che sui-jiân sī khǹg, m̄-sī chhàng, m̄-kú khoe sī khoah bóng-bóng, koh iā ū pa̍t-lâng teh hē, nā m̄-sī pún-lâng khì siu, kiaⁿ-liáu ka-kī ê bô siu tio̍h, tuì lâng ê ti̍t-ti̍t siu; siu tò-lâi, tò tī iân-tháng chin hoaⁿ-hí, lia̍h pí chia̍h khah hoaⁿ-hí; tāi-seng teh chia̍h chin hó chia̍h, in-uī chin chhiⁿ, chia̍h kàu kú, in-uī chha̍k chhuì, chha̍k phīⁿ, ū lâng pò goán liāu-lí hoat kóng, ēng chìⁿ--ê āu-lâi lām tāu-iû-thn̂g, chiū so͘ koh chhè, chin phang; liân khak to bô phah-sńg. Lâng choè bī kóng, "Thâu chhì chhang, bé thoa phâng, chāi-siⁿ tn̄g huih-sek, sí liáu piàn sin âng." Koh chheh-nih kóng, Hū chok chi chú sut7 chi (父作之術子術之). Kiám-chhái ū lâng kóng lia̍h hê-á iā kóng hiah kang-hu, chāi hit sî goá choè gín-ná chin chhù-bī, m̄-sī lāu-pē kah--ê, sī goá ka-kī ài--ê; iā m̄-sī o̍h lia̍h hê-á sī pang-chān lāu-pē. I khì pò͘-tō, sûn hoē-iú, iā ài khoàⁿ, ài o̍h. Goán chí-bē-á choè thoân-kàu-ka ê ū chi̍t-poàⁿ í-siōng; nā m̄-sī lāu-pē lia̍h thoân-kàu choè ko-siōng, choè khoài-lo̍k, o-ló si̍p-jī-kè hok-im ê pó-kuì, sui-jiân bat chia̍h khó͘ lâi o̍h I ê sí choè hok-khì lâi hoaⁿ-hí, chiū goán boē hoaⁿ-hí ài tè i ê kha-pō͘.
(2)Bán lêng-géng: Kau-phiâⁿ sī lāi-soaⁿ, lāu-pē ba̍uh 10 kho͘ gûn ê lêng-géng, goán pē-kiáⁿ ē-po͘-sî chiūⁿ soaⁿ khì bán, lāu-pē peh khí-khì bán, goán toà chhiū-kha khioh, bán chin-choē pái, bán kuí pah kun, chia̍h boē liáu, ū pha̍k lêng-géng-koaⁿ-bah, ū sî tú-tio̍h sai-pak-hō͘, ak kàu tâm-lok-lok, beh tò-lâi khoe-chuí toā, teh liâu oē kiaⁿ, ū lāu-pē kā goán khan chiū bô kiaⁿ. Chiah siūⁿ-tio̍h lán teh kiâⁿ thiⁿ-lō͘, sui kiâⁿ-kè sí-ìm ê soaⁿ-kok, iā m̄-kiaⁿ chai-hāi, in-uī Lí kap goá tī-teh.
(3)Ka-kī chi̍t ê tuì Tâi-lâm kàu Kau-phiâⁿ nn̄g ji̍t kú. Toā po̍k-kek ê sî bô chhia thang chē, tī Tióng-êng Lú Tiong chho͘ 2 hân-kà chin ài khì chhē lāu-pē, sin-khu bô chîⁿ, lō͘ iū hn̄g, in-uī sim ê pek-chhiat, chiū m̄-kiaⁿ uî-lân, khì mn̄g N̂g Tek-kok Sian-siⁿ, i bat khì, pò goá ê lō͘. Goá chiū pē chi̍t ê su-pau ū chheh, ū i-ho̍k, keng-kè Kui-jîn, Koan-biō, kàu Liông-chûn beh àm lah, ū chi̍t uī sìn-tô͘ sìⁿ Siau ê lāu a-peh, í-chêng goá ê lāu-pē bat khì hia, ū sio-bat, goá tī hia hioh-khùn, lâu goá hioh mî, tit-tio̍h chin hó chiau-thāi, kám-kak tī Chú lāi ê thiàⁿ, Chú ín-chhoā goá, pó-hō͘ goá, ū tú-hó ê só͘-chāi, moá-sim hoaⁿ-hí kám-siā Siōng-tè. Tē jī ji̍t chiū koh khí-sin ti̍t-ti̍t chiūⁿ soaⁿ, ná kiâⁿ ná bô tú-tio̍h lâng, lō͘ iā ná soè tiâu, ná khi-khu. Tī bô liâu ê sî, chiū siūⁿ-tio̍h téng-bīn só͘ kóng Si-phian 23:4, "Goá sui-jiân kiâⁿ-kè sí-ìm ê soaⁿ-kok, iā m̄-kiaⁿ chai-hāi, in-uī Lí kap goá tī-teh, Lí ê thuî, Lí ê koáiⁿ an-uì goá..." iā siūⁿ-tio̍h iù-tī-hn̂g ê sî só͘ chhiùⁿ ê koa kóng, タダヒトリ野原ヲ歩イテヰル時デモ神様ハ我ラノナカデス、シロデス, chiū-sī kóng, goá sui-jiân ka-kī chi̍t-ê tī khòng-iá teh kiâⁿ ê sî, Siōng-tè choè goá ê khuì-la̍t; tuì án-ni chiū ū ióng-khì, ná kiâⁿ ná chiùⁿ, ū sî gîm Iâ-so͘ thiàⁿ goá saⁿ-tâng kiâⁿ, tī goá sin-piⁿ bián kiaⁿ-hiâⁿ; chiū bô kám-kak ko͘-to̍k, poâⁿ soaⁿ kè niá, liâu khoe; soaⁿ-nih lâng kā mn̄g lō͘ chin chhin-chhiat. Bô siūⁿ siān, chiū kàu Ba̍k-sa lé-pài-tn̂g, Lô Iok-pek Bo̍k-su hó-lé chhiáⁿ goá tê, lâu goá hioh-khùn, sui-jiân kha oē sng, nā-sī koh kè chi̍t ki soaⁿ chiū kàu uī, beh koáⁿ-kín khoàⁿ-tio̍h chhin-ài ê lāu-pē kap la̍k-chí, kap sió-bē, chiū hoaⁿ-hí koh peh soaⁿ; lo̍h soaⁿ chiū kàu Chio̍h-mn̂g-khiⁿ, hia ū hoē-iú tī Kau-phiâⁿ lé-pài, khoàⁿ-tio̍h chiū hoaⁿ-hí, kóng bo̍k-su ê kiáⁿ, lí ka-kī bô phoāⁿ, lí chin hó-táⁿ. Goá kóng, "Goá m̄-sī ka-kī, Chú kap goá choè phoāⁿ." Beh kàu uī ê sî tio̍h kiâⁿ-kè chi̍t ê iân-soàⁿ tiàu-kiô, nā bô lâng teh kiâⁿ sī bô siáⁿ iô, nā ū lâng kiâⁿ chiū chin iô, choē-choē lâng m̄-káⁿ kiâⁿ, kî-si̍t sī hán-tit tn̄g, bô táⁿ ê lâng teh kiaⁿ nā-tiāⁿ. Lán kiâⁿ thiⁿ-lō͘ sī choa̍t-tuì bián kiaⁿ ê; m̄-kú sió-sìn ê choē-choē lâng teh kiaⁿ.
Kàu uī, kìⁿ-tio̍h só͘ siàu-liām ê pa-pa, la̍k chí kap sió-bē, sui-jiân ū kha sng, ià-siān, lóng bô--khì. Siūⁿ-tio̍h lán kiâⁿ thiⁿ-lō͘ sui ū kan-khó͘, kàu ji̍p thiⁿ-siâⁿ kìⁿ-tio̍h un Chú Iâ-so͘ kap só͘ thiàⁿ ê chhin-lâng, i ê hoaⁿ-hí ún-tàng koh-khah toā. Khoàⁿ-tio̍h lé-pài-tn̂g ê si̍p-jī-kè, tuì chhuì gîm-si o-ló "Bān-kun ê Chú, thang thiàⁿ ê chhù, Sī Lí ê sèng tiùⁿ-pâng, Chú Iâ-hô-hoa, Lí só͘ khéng toà, hit uī goá toā ǹg-bāng." iā ū koân-koân ê soaⁿ, chiū Si-phian 121 phiⁿ só͘ kóng, "Goá beh kia̍h ba̍k ǹg soaⁿ, goá ê pang-chān tuì toh-lo̍h lâi, goá ê pang-chān tuì Iâ-hô-hoa lâi....." Moá-sim kám-siā Siōng-tè, saⁿ-kap choè ka-têng lé-pài; ià-siān, ko͘-toaⁿ lóng siau-soàⁿ, pêng-an hó khùn, kè khoài-lo̍k chhù-bī ê hân-kà seng-oa̍h.
