GOÁ SÓ͘ CHUN-KÈNG SIÀU-LIĀM Ê SU-IÚ

LŪN N̂G SŪ-BĒNG BO̍K-SU

Ông Chiàm-khoe

1964.04.01. 931 kî  P.12-13

  Tān-sī Tok-sìn chheng-liân, chhin-chhiūⁿ Mô͘-se kap Iâ-lī-bí the-sî kóng, " I bô kháu-châi, bô ha̍h thoân-tō ê lō͘-ēng, só͘-í khì Ji̍t-pún tha̍k khí-kho, tī Khoe-ô͘ khai-gia̍p, choè tiúⁿ-ló, choè khîm-chhiú, ū toā ho̍k-bū kàu-hoē; sui-sī án-ni, N̂g Bo̍k-su só͘ tuì i chai-chèng thoân-tō ê chéng-chí, sui-jiân bô hoat gê seng-tióng, m̄-kú bô phàⁿ-khì, kàu 30 goā nî āu, i ê toā kiáⁿ Bêng-chiau Sîn-ha̍k-īⁿ pit-gia̍p ê sî, Tok-sìn Tiúⁿ-ló kap i ê kiáⁿ Bêng-chiau lia̍h-pâi khiā tī Sū-bēng Bo̍k-su ê siōng chêng, jīn-choē siā-goān kî-tó kóng, N̂g Bo̍k-su, goá tuì lí, tuì Siōng-tè chin-put-chū, siū lí hiah toā thiàⁿ-thàng kap poê-iúⁿ, ū ko͘-hū lí ê sim, goān lí thé-thiap goá ê Ńg-chiáⁿ, taⁿ goá ū ēng goá ê toā kiáⁿ Bêng-chiau lâi thè, hêng goá ê chè, goān Thiⁿ-pē kap N̂g Bo̍k-su hoaⁿ-hí kàm-la̍p.  Hē hó chéng-chí, keng-kè 30 goā nî, boē noā, boē hoa khì, thang chai N̂g Bo̍k-su teh iā chéng m̄-sī hōng-hêng kò͘-sū, sī tāi thian soan-hoà, ū cheng-sîn, ū Sèng-lêng ê koân-lêng.  Koân-soaⁿ thoân-tō kin-á-ji̍t í-keng poâⁿ-kè N̂g Bo̍k-su só͘ kè-e̍k ê.  Nā N̂g Bo̍k-su kin-á-ji̍t iáu tī-teh, khoàⁿ tio̍h ū Thai8-ló͘-kok, A-mi n̄g Tiong-hoē, m̄-chai joā-nih teh hoaⁿ-hí?

  Lūn i teh choè thoân-tō kang-chok, si̍t-chāi sī chin chió lâng tè i oē tio̍h; i tī Oân-lîm ê sî khì Eńg-chēng siat Káng-gī-só͘ ê sî, lé-pài-ji̍t téng-po͘ 8.30 tī Eńg-chēng káng-tō, 10 tiám tī Oân-lîm choè chú-lí; ē-po͘-sî 2 tiám Oân-lîm chú-lí, 3.30 koh tī Eńg-chēng káng-tō; àm-sî 7.30 koh tī Hái-hong-lūn pò͘-tō, ta̍k ê lé-pài-ji̍t, 5 pái soat-kàu, ná teh cháu bé teng.  Hit sî Tāi Tang A chiàn-cheng, m̄-chún cheng siat kàu-hoē, koaⁿ-thiaⁿ chó͘-tòng kóng, Eńg-chēng káng-gī-só͘ tio̍h siu khí-lâi, i chin chhut-la̍t toā kè-kàu, i tio̍h hiah-nih tio̍h-boâ, taⁿ tú-hó koaⁿ-thiaⁿ teh tòng sī chèng-hú m̄-chún, m̄-sī kiaⁿ choè kang, i sī toā kè-kàu, Siā-sī-hē kiâⁿ chin choē choā; tuì i ê pek-chhiat, Siā-sī-hē ê lâng soà kám-sim kóng, che sī téng-si ê bēng-lēng, goán bô sūn lēng to boē ēng-tit, i ko͘-put-chiong chiah tiong-chí.  Kám-siā Chú, thêng-khùn 20 goā nî āu Iûⁿ Sè-chù, Iûⁿ Chok-chiu jī uī Bo̍k-su iā sī uī Chú hia̍p-le̍k ho̍k-heng Eńg-chēng káng-gī-só͘, che sī N̂g Bo̍k-su ê siok-bōng, tong-jiân sī Siōng-tè ê chí-ì.  Chài khai-só͘-sek, nā N̂g Bo̍k-su iáu tī sè-kan, i ún-tàng chin hoaⁿ-hí khoàⁿ-kìⁿ 20 goā nî kú, siū kiông sè-le̍k ap-teh, taⁿ Chú tek-sèng toā siaⁿ gîm Ha-le-lu-iah.

3.  ài chi io̍k kî seng, o͘N3 chi io̍k kî sú:

  Che sī kó͘-chá ê sêng-gú, iā thang khoàⁿ it-poaⁿ ê siā-hoē sī án-ni; nā tuì só͘ thiàⁿ ê lâng sī o-ló kàu oē tak-chi̍h, ti̍t-ti̍t hû beh hō͘ i toā-hàn; nā tuì só͘ oàn ê, chiū kā i hiâm kàu bô uī thang hē chiam, ti̍t-ti̍t kā chhi̍h kàu hō͘ i boē chhut-thâu-thiⁿ.  Thang kî-koài ê, sī tuì siāng chi̍t lâng nā sūn i, i chiū o-ló i, bô só͘ put-chì ê o-ló, ū iáⁿ ê o-ló, bô iáⁿ ê, iā kā o-ló; siāng hit ê lâng, chit-tia̍p bô thàn i ê ì-sù, chiū hiâm i, kóng i chin-choē pháiⁿ-oē, ū iáⁿ ê kóng, bô iáⁿ ê iā kóng; in-uī lâng teh kóng lâng ê hó pháiⁿ bô phiau-chún, sī chiong i ka-kī ê su-io̍k lâi gí-gī lâng, siāng chi̍t ê chhuì, kóng siāng chi̍t ê lâng, thêng bô saⁿ ji̍t, á nn̄g ji̍t, chā-ji̍t kóng i chin hó, kin-á-ji̍t kóng i chin pháiⁿ, hō͘ thiaⁿ ê lâng boē bêng sī chā-ji̍t tio̍h, á-sī kin-á-ji̍t khah tio̍h.  N̂g sū-bēng Bo̍k-su m̄-sī chit khoán lâng, i ēng sêng-si̍t ê gán-kong, tiàm tī Chú kóng-oē chin-si̍t, sī chiū sī; m̄-sī, chiū m̄-sī; bô le̍k-ài iā bô phian-ài; bô thiám-mī(sic), iā bô te̍k-sī.  Che chiàⁿ-sī Siōng-tè bô kiàn-siàu ê po̍k-jîn. Ū chi̍t ê si̍t-lē lâi khoàⁿ-chhut.

  I kài-siāu chi̍t chhù ê chhin-sū hō͘ bó͘ mi̍h Kah-á, sī chin hó, sī siong-tong ê.  Kah-á iā chai, tān-sī Kah-á ū i ê to͘-ha̍p, só͘-í bô sêng; keng-kè bô kú, i siūⁿ beh kài-siāu hō͘ i ê bó͘ mi̍h It-á, i chai It-á kap Kah-á sī chì hó ê pêng-iú, It-á ê sū sī Kah-á chú-ì ū 8, 9 hun, lâi hō͘ Kah-á choè peng-jîn, só͘-í chiū thok Kah-á.  Kah-á chiū kā It-á táⁿ-ha̍p, bô phah-sǹg It-á iā ū i ê to͘-ha̍p boē sêng.  Keng-kè 18 nî āu, N̂g Bo̍k-su choè Tâi-lâm Tiong-hoē ê gī-tiúⁿ ê sî, toā chhut-la̍t kó͘-bú chit ê Kah-á lâi toà Sin-hoà choè bo̍k-su, kóng bêng toē-tiám joā iàu-kín, Kah-á lí joā ha̍h.  Kah-á iū sī boē to͘-ha̍p, sui-jiân 3 hoê lóng sī hó-ì teh kài-siāu bô kā sêng-siū, i iā iáu bô giâu-gî, koh 4 nî āu, i khoàⁿ pīⁿ-īⁿ choè i-liâu thoân-tō choè iàu-kín, i pún-sin beh ji̍p Chiong-hoà pīⁿ-īⁿ choè chong-kàu chú-jīm, i tē 4 hoê koh chio chit ê Kah-á ji̍p Tâi-lâm Sin-lâu choè chong-kàu chú-jīm.  Chit pái Kah-á ū chiap-siū i ê hó-ì.  Lí khoàⁿ i nā m̄-sī sêng-si̍t, ēng lêng ê gán-kong teh khoàⁿ Kah-á, í-keng 3 pái khiok i ê hó-ì, m̄-nā beh khì-sak Kah-á, beh soà kóng Kah-á choē-choē pháiⁿ oē, Kah-á iā chai N̂g Bo̍k-su 3 pái ê kài-siāu lóng sī hó, tān-sī bô to͘-ha̍p thang chiap-siū, sim-lāi ū kám-siā i ê sêng-sim sêng-ì tī Chú teh choè sū.  Ah ! siông-sek(sic) boán thian-hā, tī sim lêng kî jîn.

  I tī Tiong-o̍h teh choè sià-kam ê sî, Iûⁿ Sè-chù Bo̍k-su khì Tiong-o̍h mn̄g tō-lí, i chiàu chheng-liân lâng ìn-tap ê tō-lí, nā gâu ìn beh kā chiap-la̍p, chóng-sī ài chun-chhûn sià-kam ê ì-sù, in-uī khah chai i ê hêng-uî, i chiū kóng bó͘ lâng tio̍h iân-chhiân, i só͘ toàn ê ū chún, hiah ê sī bô si̍t--ê, sī phàⁿ--ê, lī-khui ha̍k-hāu liáu, chiū lī-khui tō-lí.

  I sī Siōng-tè ê tiong po̍k:  I m̄-sī cheng bêng toa̍t lī ê hu-êng sim, iā bô pîn-toāⁿ kiu-koe̍h lâi bô tuì i ê chhuì kóng chhut só͘ kau-tāi ê hok-im.  I tī Tiong-o̍h 18 nî kú só͘ chai-poê ji̍p sìn-gióng ū 344 ê koat-sim ji̍p kàu-hoē choè Ki-tok-tô͘.  I m̄-nā uī-tio̍h lêng-sèng, iā chin gâu kè-e̍k chiong-lâi.  I uī-tio̍h Tiong-o̍h ê keng-chè, ū lī-iōng chàu-kha ê phun lâi chhī ti, chhī gû, chèng chhài.

  Tī Tang-mn̂g kàu-hoē, uī-tio̍h chiong-lâi ê hoat-tián, boé pài-tn̂g āu ê toē boé bô sêng, āu-lâi boé tuì-bīn lō͘ lâm ê toē, hiān-sî teh choè Iù-tī-hn̂g hiah ê, uī-tio̍h chit tè toē beh pài-thok Lâu Suī-san Sian-siⁿ, tio̍h hō͘ chhiáⁿ kuí-nā tǹg; in-uī Lâu Sian-siⁿ chin bô-êng ê lâng, tio̍h lī-iōng chia̍h-pn̄g khah ū sî-kan thang siūⁿ, thang kóng chiah tit-tio̍h chiâⁿ.

  Koh tī Toā-tō͘ kàu-hoē ê sî, tú-tio̍h tiong-pō͘ toā toē-tāng, pài-tn̂g boē lé-pài tit, ū tit-tio̍h chín-chai pó͘-chō͘ kim, i chiong hit pit chîⁿ lâi khí lîm-sî pài-tn̂g, āu-lâi thang choè Chú-ji̍t-o̍h ê lō͘-ēng.  uī-tio̍h chiong-lâi khí pài-tn̂g ê kè-e̍k, chiū bō͘-chi̍p chîⁿ boé chhân, i pún-sin iā toā chhut-la̍t hōng-hiàn boé 4 hun goā chhân, hiān-sî hoē-iú hiàn kang teh chū-keng, nn̄g nî chêng in khí pài-tn̂g khai kui cha̍p bān kho͘, koh in teh chhiáⁿ bo̍k-su, thang kóng sī i ê só͘ ǹg-bāng.

  I tī Chiong-hoà i-koán ê sî, kám-kak tiûⁿ-só͘ siuⁿ oe̍h, tī pak-pêng kap sai-pêng ê toē ū beh boē, i m̄-káⁿ ti̍t-chiap khì mn̄g, á-sī khì chhē tiong-lâng, i chiū ēng Tiō Khiân-sêng Tiúⁿ-ló, ēng i su-jîn ê bêng-gī lâi kau-sia̍p, kó-jiân tit-tio̍h sêng-kong kàu boē-tō͘-jī siá chheng-chhó ê sî, chiah Châi-thoân hoat-jîn boé hō͘ i-koán, kin-á-ji̍t ū toē thang cheng-kiàn sī N̂g Bo̍k-su ê sian-kiàn. 

  I si̍t-chāi sī chi̍t ê uí-tāi ê chong-kàu ka; goá khoàⁿ i kuí-nā tiám.