OĀ-KE̍K
CHIA̍H IÛN-KÀU
Ông Chhái-kí e̍k
1964.08 939, 940 ha̍p P.20-21
Tī 64 nî chêng ê Kiⁿ-chú nî, sī Tiong-kok in-uī Gī-hô-thoân ê poān-loān tú-tio̍h choè chhiⁿ-chhám ê chai-lān ê nî, hit sî Se-iûⁿ lâng lóng siū chheng-ho͘ choè "Ta-mau-chu"（大毛子）, sìn Chú ê lâng á-sī chia̍h se-iûⁿ thâu-lō͘ ê lâng, lóng siū chheng-ho͘ "Er-mau-chu,"（二毛子）, nā m̄-sī siū thâi, chiū-sī siū lia̍h, siū khún-tio̍k. Tiong-kan ū lâng lāu-bú kap sió-tī, sió-bē lóng siū thâi-sí sûn-kàu, só͘ chhun i pún-sin, kèng-jiân sī kian-á-ji̍t lán Tiong-kok chi̍t ê choè ū seng-bōng ê lāu bo̍k-su.
Chit phiⁿ sī "生命之道" Ge̍h-khan chioh i ê keng-kè phian choè oā-ke̍k. Ông lú-sū kā hoan-e̍k kè-lâi ê. Tī chia kā "生命之道" Ge̍h-khan soeh-siā.
Lāu bo̍k-su tī lo̍h lâm hé-chhia tiong, ū chi̍t ê lú-kheh ki-chhì i "Chia̍h iûⁿ-kàu," "hoat iûⁿ-châi." Lāu bo̍k-su tuì án-ni uī i sū-su̍t 64 nî chêng Kiⁿ-chú kûn-huí chi loān ê chi̍t toāⁿ óng sū. Kûn-huí lia̍h tio̍h lāu bo̍k-su ê sió-tī, sió-bē kap lāu-bú, pek in tio̍h ǹg ngó͘-siōng kuī-pài; pàng-sak Iâ-so͘. Chóng-sī in khiok lēng-khó͘ sí m̄ hâng-ho̍k, kiat-kó sió-tī hō͘ to thâi-sí, lāu-bú kap sió-bē hō͘ tn̂g-chhiuⁿ chha̍k sí, chhù iā tú-tio̍h hé-sio. Lāu bo̍k-su kám-kak lāu-bú, sió-tī, sió bē uī-tio̍h Chú lâi sí, chiū sî-khì chin hó thāi-gū ê thâu-lō͘, chiū-sī chia̍h se-iûⁿ ê bō͘-e̍k-siong ê thâu-lō͘, hiàn-sin thoân-tō, tāi-seng khì bú-chhin, sió-tī, sió-bē tú-tio̍h hoān-lān ê sió chng-siā soan-iông hok-im, khí-thâu chhoan-bîn lia̍h choè i sī beh pò-ho̍k, āu-lâi khoàⁿ-kìⁿ i thiàⁿ Chú, thiàⁿ lâng, khiân-sêng ê kiàn-chèng, chiām-chiām hó kám, chiū lâi chiap-siū Iâ-so͘ phó͘-piàn kàu choân chng-siā.
JÎN-BU̍T
Tân lāu Bo̍k-su 84 hè
Lāu Tiuⁿ (lú-kheh) Tiong-liân
Lāu Ông (lú-kheh) Tiong-liân
Má Toā-thâu (Kûn-huí sió thâu-ba̍k) iok 35 hè
Lāu-io (Kûn-huí Keh Chú-siú) iok 25 hè
Tân Su-bú (lāu bo̍k-su bú-chhin) iok 45 hè
Sió-tī (lāu bo̍k-su sió tī) 17 hè
Sió-bē (lāu bo̍k-su sió-bē) 12 hè
(Im-ga̍k: Hé-chhia khui ê siaⁿ).
Ông: Lāu Sian-siⁿ, lí beh khì tó-uī?
Bo̍k: Tâi-lâm, lín nn̄g ê leh?
Tiuⁿ: iā sī Tâi-lâm.
Ông: Lāu Sian-siⁿ, lí kuì sìⁿ?
Bo̍k: Pè sìⁿ Tân, lín nn̄g-uī leh?
Tiuⁿ: Sió sìⁿ Tiuⁿ, chit uī sìⁿ Ông.
(Hé-chhia kiâⁿ ê siaⁿ sió-khoá thêng).
Ông: Lí lāu-lâng ê ba̍k-chiu chin hó, hiah soè-jī ê Eng-bûn iā khoàⁿ hiah chheng-chhó.
Bo̍k: iáu khó-í, put-kò the̍h ba̍k-kiàⁿ khí--lâi he tong-jiân chiū boē sái-tit lah!
Tiuⁿ: Lāu sian-siⁿ, hia chi̍t pún kāu-kāu ê sī sím-mi̍h chheh?
Bo̍k: Eng-bûn ê Sèng-keng.
Tiuⁿ: O͘h......
Bo̍k: Jī-uī thiaⁿ-kè Iâ-so͘ Ki-tok ê hok-im mah?
Ông: Thiaⁿ-tio̍h, ū thiaⁿ lâng kóng kè, kan-ta bô sî-kan khì lé-pài-tn̂g.
Bo̍k: Kî-si̍t, khì lé-pài-tn̂g iā m̄-bián huì joā-choē sî-kan, Tiuⁿ Sian-siⁿ, lí thiaⁿ kè hok-im bô?
Tiuⁿ: Goá kap Ông Sian-siⁿ sī tông-hiong, tông-sū, soè-hàn ê sî, siông-siông khì lé-pài-tn̂g chham-ka sím-mi̍h Chú-ji̍t-o̍h, iā pun sím-mi̍h khah-phìⁿ......
Ông: (Lī-khui pún-toê). Lāu sian-siⁿ, lí toà tī Tâi-lâm sī bô?
Bo̍k: M̄-sī, goá toà Tâi-pak, chit pái khì Tâi-lâm, sī kàu chi̍t keng lé-pài-tn̂g chú-niá pò͘-tō-hoē.
Tiuⁿ: Lí kuì-hú iáu ū lâng bô?
Bo̍k: Ū nn̄g ê kiáⁿ, chi̍t ê cha-bó͘-kiáⁿ, iáu ū sun-jî, sun-lú, put-kò chha-put-to lóng bô tī sin-piⁿ.
Ông: Tī Tāi-lio̍k sī bô?
Bo̍k: M̄-sī, tī kok-goā, ū ê tha̍k-chheh, ū ê kang-chok. (Hé-chhia khui ê siaⁿ chi̍t-sî-á chēng-chēng).
Ông: (oá hī-khang kóng), Ué-eh; lāu Tiuⁿ, goân-lâi chit uī lāu sian-siⁿ sī chia̍h iûⁿ-kàu, hoat-iûⁿ-châi ê iûⁿ hê-siūⁿ.
Tiuⁿ: (ÀN tī hī-á soè-siaⁿ kóng), Lāu Ông; bo̍h-tit án-ni kóng, chiah ê oē su-siúⁿ thài lo̍k-ngó͘ lah.
Ông: (Bî-siaⁿ). Lo̍k-ngó͘? Hah-iò, hah-iò.
Bo̍k: (Ná chhin-chhiūⁿ thiaⁿ-tio̍h in teh tuì-oā). Bô chhò, nn̄g uī m̄-thang lia̍h choè kî-koài, goá chia̍h 60 kuí-nî ê iûⁿ-kàu lah, kàu tī hoat iûⁿ-châi, he khiok tú-tú siong-hoán.
Tiuⁿ: Lí lāu-lâng m̄-thang lia̍h choè sím-mi̍h, goá sī teh kóng chhiò--ê.
Ông: (Pháiⁿ-sè ê khoán). Lāu sian-siⁿ, sit-lé.
Bo̍k: Lán ê chhia chē kàu tó-uī lah?
Ông: Sin-tek tú-chiah kè-khì.
Bo̍k: Nā-sī lín boē mâ-hoân, goá chiū chiong goá chia̍h iûⁿ-kàu choè iûⁿ hê-siūⁿ ê keng-kè kóng hō͘ lín thiaⁿ.
Tiuⁿ: Hoan-gêng, hoan-gêng.
Bo̍k: Che sī 64 nî chêng ê tāi-chì lah, hit-sî goá chiah 20 hè, tī Thian-tin Iông-ha̍k-tông tha̍k-chheh, goá ê lāu-pē sī chi̍t uī thoân-kàu ê bo̍k-su, goán chhù chí-ū lāu-bú, sió-tī, sió-bē toà tī chháu-toē, hit nî tú-hó sī Kiⁿ-chú nî.
Ông: Se-le̍k 1900 nî, Kûn-huí chi loān.
Bo̍k: Loān, loān chhau-chhau, Gī-hô-thoân só͘ thâi ê, phah ê sī uī-tio̍h beh hû-khí Chheng-tiâu ê kok-kî, lâi bia̍t-bô se-iûⁿ ê kok-kî, só͘ choè ê khiok sī thâi-lâng pàng-hé, kiat kui tóng chhiúⁿ-kiap, hiàng-tang-sî só͘ ū ê se-iûⁿ lâng, Gī-hô-thoân chheng-ho͘ in Ta-mau-tsu, hoān-nā kap se-iûⁿ-lâng lâi-óng ê, eng-kai choân-pō͘ thâi, sìn iûⁿ-kàu ê Tiong-kok lâng, Gī-hô-thoân kiò in Er-mau-tsu, iā eng-kai thâi(phàu siaⁿ chi̍t hiáng, hoah thâi ê siaⁿ, toā háu ê siaⁿ, chiàn-cheng hāu-kó).
-------------------------------------------------------------------------------------------------------
(Choán tiûⁿ: Kín-kip kiaⁿ-hiâⁿ im-ga̍k, lâng-siaⁿ chô-cha̍p, kiâⁿ ê siaⁿ).
Má: Kiâⁿ, lán lâi khì Sam-ka-kau lia̍h lâng.
Io: Lāu-toā, beh lia̍h sím-mi̍h lâng?
Má: Thiaⁿ kóng Tân--ka ê lâng bih kàu Sam-ka-kau kū-chhù khì lah.
Io: Tân-ka pē-kiáⁿ kiám sī bô tò-lâi?
Má: iáu ū leh, chhut-chāi i, khoàⁿ-tio̍h chi̍t ê, lia̍h chi̍t ê.
Io: Sī, thâi-chīn chiah ê poē chó͘ bông chong ê Er-mau-tsu (kiâⁿ ê siaⁿ, im-ga̍k sió-khoá thêng).
Má: Bîn-á-chài khui sím ê só͘-chāi pò͘-tì hó á bē?
Io: Tāi-khài chha-put-to, tī chng-nih ê Sêng-hông-biō mn̂g-kháu.
(Kha-pō͘-siaⁿ chiām-chiām hn̄g, choán tiûⁿ im-ga̍k put-an).
Sió-tī: Mah-mah, chit nn̄g ji̍t goā-bīn ê hong-siaⁿ m̄ hó, Gī-hô-thoân sì-koè thâi-lâng pàng-hé, goá chin tam-sim pa-pa kap ko-ko ê an-choân.
Lāu-bú: M̄-bián khoà-lū, Thiⁿ-pē oē khoàⁿ-kò͘ in.
Sió-bē: Hūn-boē-tàng pa-pa kap ko-ko oē tàng chím-á tò-lâi chiū chin hó.
Sió-tī: Ū sím-mi̍h hó, lán chit pêng koh-khah guî-hiám.
Lāu-bú: Í-keng bô chá lah, chún-pī thang lâi khùn, lán kuī-teh saⁿ-kap kî-tó, kiû Thiⁿ-pē khoàⁿ-kò͘ pa-pa kap ko-ko, iā pó-siú Chú lāi só͘ ū ê hiaⁿ-tī chí-bē in pêng-an, m̄-bián tú-tio̍h guî-hiám kan-khó͘ sū, khah iàu-kín, kiû Thiⁿ-pē kám-tōng Gī-hô-thoân ê tông-pau in, m̄-thang thâi-lâng, pàng-hoé, chhiúⁿ-kiap, hō͘ in oē hoé-kái, ū chû-pi ê sim (im-ga̍k tuì un-hô choán kiaⁿ-hiâⁿ). (Kha-pō͘ siaⁿ, to̍k, to̍k, tio̍h-kip phah-mn̂g siaⁿ).
(Thāi-sio̍k).
