GOÁ SÓ͘ CHUN-KÈNG SIÀU-LIĀM Ê SU-IÚ
LŪN LÎM HA̍K-KIONG BO̍K-SU
Ông Chiàm-khoe
1964.10.01 943 kî P.15
(2) Lia̍h choâ iā bô siong-hāi: Ū chi̍t ji̍t kàu Tō͘-kun-eng, tī lé-pài-tn̂g hioh mî, in-uī chin joa̍h, thǹg saⁿ teh khùn, ū toā choâ sô lâi tī i ê pak-tó͘-téng, Lîm Bo̍k-su cheng-sîn, kám-kak pak-tó͘-téng tāng-tāng koh chin léng, chi̍t-ē bong, chai sī toā-choâ, chiū ēng chhiú kā lia̍h hiat lo̍h thô͘-kha; kai-chài bô hō͘ kā-tio̍h. Pó-lô iā bat lia̍h to̍k choâ, iā bô siong-hāi. Bô koh-iūⁿ Sat-hu Sun-tāi, iā bat hō͘ in a-chek hiat-lo̍h sí-lâng khut, chia̍h to̍k-io̍h iā bô siong-hāi.
(3) Sì-cha̍p-káu sian pu̍t, boē-oē kiù chi̍t ê un-jîn: Boē kàu kî-āu boē chheh soà pò-tō(sic), ū chi̍t ê thó-hî lâng tuì i kóng, pu̍t-á bô-iáⁿ to tio̍h, in-uī goá kū-nî tī hái-nih khioh-tio̍h chi̍t kha siuⁿ-á, lāi-bīn té 49 sian pu̍t-á, chin-choē lâng lâi khoàⁿ, siūⁿ kóng tī hái-nih to káⁿ sī tuì thiⁿ ka-la̍uh lo̍h-lâi ê, ún-tàng khah siàⁿ, chiū tāi-ke beh kā boé, i siūⁿ boē chîⁿ khah bô kè-ta̍t, sàng lâng khah ū jîn-chêng, chiū sàng 48 sian hō͘ 48 lâng khì ho̍k-sāi, i ka-kī lâu chi̍t sian toā koh suí--ê, tāi-ke chin jia̍t-sim teh ho̍k-sāi. án-ni, goá sī hit 49 sian ê un-jîn, èng-tong tio̍h toā-toā kā goá pó-pì, m̄-nā bô pó-pì, tuì hit sî khí, chai-hō chi̍t chân koh chi̍t chân ti̍t-ti̍t lâi, si̍t-chāi sī bô-iáⁿ-chiah, goá iā beh pài Siōng-tè.
(4) Kè khoe thoat-lī guî-hiám: Tī A-kong-tiàm (Kong-san) ê pak-pêng ū khoe, in-uī lo̍h toā-hō͘, khoe-chuí chin toā, theⁿ pâi ê lâng bô chin láu-liān koh bô kàu la̍t, pâi-ko soà hō͘ pâi kài lo̍h--khì, chiâⁿ cha̍p lâng gōng-gōng khoàⁿ hit chiah pâi tè chuí ti̍t-ti̍t lâu-khì, chuí sè chin hiông, khah khì oē tōng-tio̍h toā chhiū, pâi ún-tàng oē péng, kui pâi ê sìⁿ-miā sī chāi tī sùn-kan, tāi-ke chin kiaⁿ; nā-sī Lîm Bo̍k-su kî-tó kiû Siōng-tè, hut-jiân lâm-hong toā khí, chiong pâi chhe oá hoāⁿ, chèng-lâng chiū kín peh chiūⁿ hoāⁿ tit-tio̍h kiù. In-uī ū chi̍t ê Siōng-tè ê lô͘-po̍k, chiū oē tì-ìm kui pâi ê lâng; Pó-lô chá tī chi̍t chiah chûn ū 276 lâng ê sìⁿ-miā, tuì Pó-lô ê tì-ìm, bô sit-lo̍h chi̍t lâng (Hēng 27: 37). Koh Só͘-to-má Gô͘-mô͘-la̍h siâⁿ sui-jiân chin toā, iáu-kú chiàu Siōng-tè só͘ kóng, nā ū 10 ê hó lâng iā thang siū tì-ìm bián bia̍t-bô.
(5) Káng-tō poàⁿ tiám cheng, siā-lé 8 pah gûn: Boē chheh kàu Kiâm-chuí soà pò͘-tō, ū chi̍t lâng chin hoaⁿ-hí o-ló Lîm Bo̍k-su kóng, lí tāi-thian soan-hoà, chiū ēng sì pah chîⁿ sàng Lîm Bo̍k-su (tng-sî 4 pah chîⁿ, chit chūn sī 8 pah kho͘).
(6) Choè-toā ê tek-sèng: Boē chheh kàu Gû-mā-thâu (Chheng-chuí), hioh tī kheh-koán, poàⁿ-mî ū îm-hū phah-mn̂g ji̍p pâng-keng, iau-kiau mī-thài, pah poaⁿ ín-iú, Lîm Bo̍k-su sim-lāi kiû kî-tó Siōng-tè lâi ê khuì-la̍t hō͘ i oē tek-sèng, Sèng Sîn chhiong-moá i ê sim, chiū ēng giâm-lē ê oē chek-pī i, kiò i tio̍h kín lī-khui chit khoán seng-gâi, tio̍h kè ang siⁿ kiáⁿ, chiong-lâi chiah ū hó bé, nā bô oē jiám-tio̍h to̍k, tài pīⁿ bô chîⁿ, bô tè thang î-oá(sic), oē liân-hoê, bô ì bô-ì chiah chhut-khì.
