Siàu-liām Kò͘-jîn
1964.11.15 946 kî P.14-15
Kò͘ Lîm Kî-chiong sian-siⁿ
Kò͘ Lîm Kî-chiong Sian-siⁿ sī Ka-gī Tang-mn̂g ê tiúⁿ-ló, tī 10 ge̍h 15 hō kè-sì, hióng-siū 66 hè.
Lîm Tiúⁿ-ló sī Ka-gī chhī ê chhut-miâ ê i-seng, chū Bîn-kok 9 nî pit-gia̍p I-ha̍k-īⁿ khai-gia̍p choè i-seng kàu kè-sì, 40 goā nî kú, i-su̍t iā hó, i-tek iā hó, kiù lâng ê sìⁿ-miā hui-siông choē.
Lūn i ê choè lâng só͘ kòng-hiàn hō͘ lâng siàu-liām ê, m̄-nā tī kàu-hoē lāi ê kang chin hián-tù, chiū-sī tī kàu-hoē goā siā-hoē kài chin hián-tù, hō͘ lâng koh-khah khim-gióng. Chhin-chhiūⁿ tī kong-ho̍k ê sî, Ka-gī chhī siū tio̍h po̍k-kek sún-sit chin tāng, jî-chhiáⁿ chhân-hn̂g sit-siu, bí-niû toā khí-kè, peh-sìⁿ lâng ti̍t-ti̍t beh bô thang chia̍h ê lâng hui-siông choē, Kî-chiong Tiúⁿ-ló khoàⁿ-kìⁿ án-ni, tī kong-ho̍k keh tńg nî chhun-thiⁿ, sim-lāi te̍k-pia̍t iu-būn, chio-chi̍p Ka-gī ê sin-sū kuí-nā lâng lâi cho͘-chit bí-niû ê pêng-thiò-hoē, pún-sin hō͘ lâng kéng tio̍h choè chú-jīm uí-oân, lâi siat-hoat thiò sio̍k bí ê sū-gia̍p, sui-jiân kang-chok chin pháiⁿ choè, iáu-kú jīm-lô jīm-oàn, hō͘ Ka-gī chhī chi̍t sî ê niû-si̍t ê lân-koan oē thang táⁿ-khai, kàu i kè-sì iáu-kú hō͘ lâng teh siàu-liām.
Siāng hit nî ê nî-bé, Ka-gī chhī beh siat kiù-chè-īⁿ thang kiù-chè bô i-oá ê lāu-lâng, pīⁿ-thiàⁿ ê lâng. Kiù-chè-īⁿ sêng-li̍p liáu, soà chhē bô lâng thang chú-chhî, kiat-kio̍k tio̍h chhiáⁿ Lîm Sian-siⁿ choè īⁿ-tiúⁿ, liáu-āu koh tam-tng chit ê Kiù-chè-īⁿ châi-thoân ê koán-lí-jîn. Kàu 38 nî chio Ka-gī Chham-gī-hoē ê gī-oân téng 9 ê lâng chhòng-siat Su-li̍p Phok-ài Kiù-chè-īⁿ, chiū siū soán choè Táng-sū-tiúⁿ kiam ĪN-tiúⁿ, tuì án-ni, hō͘ chit ê ki-chhó͘ po̍k-jio̍k ê Kiù-chè-īⁿ ti̍t-ti̍t hoat-tián, lāi-bīn siat-pī kàu ū an-ló-só͘, si-i-só͘, si̍p-gē-só͘ lâi kiù-chè chiah ê bô thang i-oá ê lāu-lâng, gín-ná, khit-chia̍h téng.
Chū tam-tng táng-sū-tiúⁿ kiam īⁿ-tiúⁿ liáu, keng-kè 10 nî kú chiah sī īⁿ-tiúⁿ ê kang, koh kàu kin-nî ê 5 ge̍h bé, in-uī sin-khu ê khiàm-an sî khì táng-sū-tiúⁿ ê kang, ài beh choan-sim ióng-pīⁿ, tī ióng-pīⁿ ê tiong-kan, iā sī sim-sim liām-liām koan-sim kiù-chè-īⁿ ê sū, khó-sioh pīⁿ-thé boē thang khoe-ho̍k, kàu 10 ge̍h chiū kè-sì.
Lîm Tiúⁿ-ló chū siàu-liân ê sî tit-tio̍h tō-lí, kàu Bîn-kok 29 nî chiū siū soán choè Ka-gī Tang-mn̂g kàu-hoē ê chip-sū, kàu 34 nî koh siū soán choè tiúⁿ-ló, jia̍t-sim ho̍k-bū kàu-hoē, kàu 4 nî chêng chiah thè-hiu, án-ni chêng-āu 22 nî kú tng-chit tī kàu-hoē.
I chi̍t ke thang kóng iā sī chi̍t ê Ki-tok-hoà ka-têng, jî-chhiáⁿ kiáⁿ-jî lóng chin chhut-tioh.
Sian-siⁿ-niû tī kuí nî chêng bat siū soán choè bô͘-hoān bú-chhin. Toā kiáⁿ sī Ji̍t-pún ê I-ha̍k Phok-sū, hiān-sî tī Ji̍t-pún khui goā-kho pīⁿ-īⁿ.
Jī kiáⁿ iā sī i-seng, chiap-soà lāu-pē ê uî-gia̍p choè Tiông-chhun i-īⁿ ê īⁿ-tiúⁿ.
Saⁿ kiáⁿ sī Hoà-ha̍k kang-thêng-su, hiān-sî tī Tek-kok tha̍k phok-sū khò-thêng.
Sì kiáⁿ sī Ji̍t-pún ê Hoà-ha̍k se̍k-sū, teh-beh koh khì Bí-kok chhim-chō.
Toā cha-bó͘-kiáⁿ sī i-seng-niû, tē jī cha-bó͘-kiáⁿ sī kang-thêng-su ê thài-thài.
Kiáⁿ-sun chin-choē, thang kóng sī ū tit Chú chiok-hok.
Goān i ê hó kha-pō͘ lâu kàu kú-kú thang kó͘-lē lâng.
Kò͘ N̂g Hiàn-chiong thoân-tō
Bîn-kok chêng 34 nî 10 ge̍h 24 ji̍t chhut-sì tī Tâi-lâm chhī Hú-chêng-lō͘ (kū-miâ sī Thiāu-á-hāng koe), N̂g Goa̍t-tek Tiúⁿ-ló ê ka-têng. Bîn-kok 53 nî 8 ge̍h 28 ji̍t tī Tâi-tang siū Chú kéng-tiàu kui-thian, hióng-siū 87 hè, 8 ge̍h 31 ji̍t tī Tâi-tang kàu-hoē kú-hêng kò-pia̍t-sek; 9 ge̍h 28 ji̍t tī Tâi-lâm ê Lâm-mn̂g kàu-hoē kú-hêng tui-tō lé-pài, kò͘-hiong ê chhin-lâng kap pêng-iú chin-choē lâng lâi hù, chin-chiàⁿ hō͘ lâng oē thang siàu-liām i ê seng-gâi.
N̂g Goa̍t-tek Tiúⁿ-ló sī Thài-pêng-kéng kàu-hoē ê tē it tāi tiúⁿ-ló, i ū gō͘ ê hāu-siⁿ: Teng-chhàn, Teng-ōng, Hiàn-chiong, Jîn-êng kap Kah-êng. Só͘-í N̂g Hiàn-chiong Sian-siⁿ sī pâi tē saⁿ ê, hiaⁿ-tī tiong i ū hiàn-sin choè Chú ê kang, tuì tī 25 hè ê sî pit-gia̍p Tâi-lâm Sîn-ha̍k-īⁿ, chiū siū phài tī Jī-chuí kàu-hoē bo̍k-hoē nn̄g nî kú, āu-lâi tī Goân-táu kàu-hoē 4 nî kú, tī Soa-san kàu-hoē (hiān-chāi sī Hong-oán) chi̍t nî kú, tī Táu-la̍k kàu-hoē 4 nî kú, tī Chó-tìn kàu-hoē 3 nî kú, tī Lâm-chú kàu-hoē 4 nî kú, tī Koan-á-niá kàu-hoē 6 nî kú, tī Moâ-tāu kàu-hoē 6 nî kú, lóng-chóng ho̍k-bū 8 keng kàu-hoē ū 30 nî kú. Tong-sî Lâm-pō͘ Tāi-hoē kui-tēng, thoân-kàu moá 30 nî tio̍h thè-hiu, i thè-hiu ê sî sī 55 hè, lán thang chai 60 goā nî chêng ê kau-thong put-piān, thoân-kàu-chiá ê hù-jīm kap choán-jīm ū chin-choē khùn-lân kap kan-khó͘.
I pit-gia̍p Sîn-ha̍k-īⁿ liáu, chiū kap Lîm Kim-loân lú-sū kiat-hun, hu-hū nn̄g lâng ēng jím-nāi, khek-khó͘, khûn-khiām ê seng-oa̍h, jīm-lô jīm-oàn, chīn-tiong chit-siú, tiong-sêng ho̍k-bū, choè thoân-tō ê kang 30 nî kú, āu-lâi chiū thè-hiu, ū tit-tio̍h Siōng-tè chin toā ê chiok-hok, tī Tâi-lâm keng-êng bo̍k-tiûⁿ, boē gû-lin lâi ióng-io̍k chú-lú. Siōng-tè chiok-hok hō͘ i ū saⁿ lâm gō͘ lú. Tiong-lâm Iú-siù（酉秀）kè-sio̍k keng-êng bo̍k-tiûⁿ ê kang, chhù-lâm Iú-bûn（酉文）tī Tâi-tang khui se-io̍h-pâng, saⁿ lâm Iú-hui（酉輝）tī Tâi-tang khui goā-kho i-īⁿ. ia̍h 5 uī lú-jî lóng chhut-kè, tit-tio̍h hó ê phit-phoè. Hiān-chāi i ū lāi-goā sun 28 lâng, goā cheng-sun 36 lâng, Siōng-tè án-ni hó khoán-thāi i, ia̍h i uī Chú khûn-bián choè-kang m̄-sī khang-khang, thang kóng hok, lo̍k, siū, i lóng ū tit-tio̍h. Chit ê chiū-sī hó ê kiàn-chèng, hō͘ lán ta̍k lâng thang hāu-hoat ê.
