Lé-pài-tn̂g Sī Sèng-tiān mah?
Ló-hu
1968.01.15 1022 hō P.3~P.8
Goá thê-khí chit ê sū, chhiáⁿ lán saⁿ-kap lâi siūⁿ, lâi kiám-thó, ǹg-bāng iú só͘ kái-chìn.
Chiàu goá só͘ sìn, lé-pài-tn̂g sī sèng-tn̂g, iā ài pó-siú ū chong-giâm ê sèng-tiān, choè lán ho̍k-sāi Siōng-tè ê só͘-chāi, beh án-ni choè, chhiáⁿ hoē-iú m̄-thang kan-ta kóng, tio̍h ài si̍t-hêng hō͘ lé-pài-tn̂g oē chiâⁿ-choè sîn-sèng.
Goá sî-siông chham-ka lé-pài-tn̂g ê hiàn-tn̂g, tián-lé-sek, ū chin chong-giâm ê tián-lé, chin sîn-sèng ê gî-sek, hit-ê loē-iông chóng kóng, sī goán beh hōng-hiàn chit keng kiàn-tiok-bu̍t choè sèng-tiān, tī chia chèng hoē-iú kèng-pài ho̍k-sāi Siōng-tè, Sîn jîn saⁿ-kap kau-poê, soan-iông kiù-sè ê hok-im, thang chín-kiù jîn-luī chhut sí ji̍p oa̍h; chit hō ê ì-gī ê hōng-hiàn ê lé-bûn. án-ni chèng-bêng lán tong-sî ū koat-sim chiong sèng-tiān, ài hun-piat uī Sèng, m̄-kú kàu chi̍t ê sî, chiū chiām-chiām hut-lio̍k, soà sio̍k-hoà, iā piàn-chit.
Lán lóng ū tha̍k-kè sù Hok-im-su, kî-tiong Iâ-so͘ ê sū-chek ū chi̍t hāng kî-sū, goá thê-khí chi̍t-chām lán lâi saⁿ-kap siūⁿ, "Iû-thài lâng ê Poâⁿ-kè-choeh kūnlah, Iâ-so͘ chiūⁿ Iâ-lō͘-sat-léng, tī tiān-lāi tú-tio̍h ū boē gû, iûⁿ chíⁿ-á, iā ū oāⁿ chîⁿ ê teh chē, Iâ-so͘ ēng soh choè piⁿ, koáⁿ in kap gû, iûⁿ, lóng chhut-tiān, koh chhia-tó oāⁿ-chîⁿ ê lâng ê chîⁿ, péng-lìn-tńg in ê toh; koh kā boē chíⁿ-á ê kóng, toà chiah ê mi̍h khì, m̄-thang ēng goá ê Pē ê chhù, choè boé boē ê chhù,（ū pa̍t só͘-chāi, sī kóng, chiong Pē ê chhù choè chha̍t-siū）. I ê ha̍k-seng kì-tit Sèng-keng ū kì kóng, goá uī-tio̍h lí ê chhù sim lāi chhin-chhiūⁿ hé to̍h"（Iok-hān 2:13-17）. Lán tha̍k chi̍t chām Sèng-keng ū sím-mi̍h kám-sióng?
Taⁿ chit keng Iâ-lō͘-sat-léng ê sèng-tiān, nî kú ge̍h chhim, soà boē kì-tit, hut-lio̍k sèng-tiān ê ì-gī, piàn-chiâⁿ boé boē ê chhù. Sìn-gióng it-ti̍t teh pàin-chit, teh ēng ê só͘-chāi iā teh piàn-khoán. Lán lâi siūⁿ koán-lí sèng-tiān ê chè-si kap kî-thaⁿ ê chek-jīm-chiá, siáⁿ-sū án-ni pàng poàⁿ-ba̍k khui-kheh choè chit hō sū, nā gián-kiù in ê sim-lí, chi̍t hong-bīn kiaⁿ-liáu tek-choē lâng, koh chi̍t hong-bīn kap in hiah ê lâng thò-hia̍p, ū thang tit lī ê-khoán, sī á m̄-sī? In-uī hiah ê lâng kiám-chhái beh án-ni soat-bêng kóng, hō͘ hiah ê chhut-goā lâi hiàn-chè ê lâng khah lī-piān, goán beh án-ni lâi ho̍k-bū, choè piáu-bīn-chiūⁿ ū chin suí ê lí-iû. Boē boē oāⁿ chîⁿ kî-si̍t sī beh thàn-chîⁿ, （lán ū sio̍k-gú kóng, poa̍h-kiáu liông-kun, boé boē chha̍t, só͘-í Chú Iâ-so͘ kóng, chiong Pē ê chhù choè chha̍t-siū, sī hâm-ì chin chhim ê kà-sī）. Chiah ê lâng só͘ choè chioh miâ lâi boán-chiok in ê su-io̍k, boē bián-tit Chú Iâ-so͘ sim chhin-chhiūⁿ hé to̍h. Lán nā siūⁿ, kiám boē khí kiaⁿ-hiâⁿ mah?
Goá sî-siông chham-ka song-sūê lé-pài-sek, í-chêng khiok khah bô án-ni pān, choè kūn ná ián-piàn ná lī-hāi, sèng-tiān piàn bô sîn-sèng, lé-pài-tn̂g piàn-chiâⁿ chòng-gī-tn̂g, lé-pài-tn̂g soà bô sîn-sèng ê chong-giâm, iā boē kì-tit tong-sî teh hiàn-tn̂g-sek só͘ tha̍k ê hōng-hiàn lé-bûn ê soan-giân.
Chiàu goá ê koan-kám, si̍t-chāi chhin-chhiūⁿ tī chòng-gī-tn̂g ê khoán, in-uī chhin-pêng chhek-iú só͘ sàng ê hoe-khoân, liân-te̍k, pâi kàu moá pài-tn̂g, liân káng-tâi téng iā pâi kàu chin tông-hông chin nāu-jia̍t, ū pâi koān chhī-tiúⁿ, toā koaⁿ-oân, séng-gī, chhī-gī ê mi̍h, chin pâi-chhiâng, hit ê song-ka chin êng-kng, chin chhut-miâ, hoē-tiong tiàu-lêng（弔靈）ê te̍k, pâi tī káng-tâi ê siāng tiong-ng, iā ū siá chiap ín se-hong（接引西方）ê te̍k, sī chin kî-koài ê piáu-hiān, khoàⁿ-liáu si̍t-chāi thî chhiàu kai hui（啼笑皆非）ê sim-chêng, chit hō sū-si̍t ê chêng-kéng, tho̍k-chiá kok-uī siūⁿ án-choáⁿ?
Khì hù kiat-hun tián-lé ê sî, kūn-lâi iā chin piàn-khoán, sin-lông, sin-hū beh chhut-khì ê sî, ēng choá-liâu á-sī choá-iù teh iā sin kiáⁿ-sài, sin-niû, che kiám m̄-sī o̍h lâng teh iā iân ê tāi-iōng mah, sīm-chì iā pàng-phàu, chit khoán ê chok-hong thang chhui-hêng, á-sī tio̍h kái-chèng? Bat ū bo̍k-su saⁿ-kap tâm, teh hìⁿ-thâu, beh án-choáⁿ pān? iā bat ū lāu-toā-lâng ê chiok-siū, âng-chhái koà kàu chin tông-hông, ēng siū tiùⁿ tiàu tī káng-tâi āu ê tiong-ng, teh êng-iāu ka-kī, khiok boē-kì-tit ū si̍p-jī-kè êng-kng tī hia. Chiah ê sū-si̍t lán nā bô kiám-thó, bô uī-tio̍h sèng-tiān ê chong-giâm lâi tio̍h siūⁿ boē ēng-tit, ná khì ná oē hō͘ sè-sio̍k ê pāi hong-khì ê kńg-lê-á-hong ká lo̍h-khì, phah-loān kàu-hoē ê tia̍t-sū, hō͘ sèng-tiān bô sîn-sèng. Kiám thang án-ni pàng poàⁿ-ba̍k khui-kheh, án-ni lâi kap in thò-hia̍p, khì gêng-ha̍p hiah ê chū-su ê siūⁿ-hoat ê chok-hong? Chá-sî sèng-tiān ū hun-piat sèng-só͘, chì sèng-só͘, suî-jiân hiān-kim bô án-ni, mā tio̍h ài pó-siú ū sèng-hoà ê khì-hun, m̄-thang piàn-chit soà sio̍k-hoà.
Tī Si-phian 96:6 chat án-ni kóng, "Tī I ê bīn-chêng ū chun-kuì kap ui-giâm; Tī I ê sèng-só͘ ū koân-lêng kap êng-kng", Lán bô ēng chit hō sim-chêng pó-siú lán só͘ hiàn ê sèng-tiān, hoán-tńg hō͘ sèng-só͘ sio̍k-hoà. Só͘-í goá koan-khoàⁿ chham-ka chòng-sek ê kàu-hoē goā ê jîn-sū, in ê hoán-èng só͘ piáu-hiān, tuì koan-bo̍k kap kò-jîn ê siōng kiâⁿ kèng-lé, tha̍k tiàu-sû ê jī-kù lóng kap chòng-gī-tn̂g siāng-khoán ê chêng-hêng.
Lô-má 12:2 chat, Pó-lô Sian-siⁿ kā lán kóng, "Bo̍h-tit kap chit sè-kan siāng-khoán." Lán kiám thang kap in tông-liû ha̍p-ù mah? Toàn-toàn m̄-thang. Só͘-í nā bô siūⁿ pān-hoat lâi bán-kiù chit hō piàn-siòng ê chok-hong, it-ti̍t kńg-ji̍p-khì, lâi hām-lo̍h chit khoán sio̍k-hoà ê hong-khì, chiū put-kham siat-sióng.
Goá thê-khí chit ê būn-toê, chhiáⁿ tho̍k-chiá saⁿ-kap lâi siūⁿ, lâi si̍t-hêng, iā ài thê-kióng hō͘ Chóng Tiong-hoē, iú-koan jîn-sū, kap Lé-tián Uí-oân-hoē, chim-chiok gián-kiù, ǹg-bāng iú só͘ sêng àn, hù chu si̍t-si. Sui-jiân chit kiāⁿ sū kap Sîn-ha̍k siōng ê kàu-lí bô ū saⁿ tí-chhiok, iā bô sím-mi̍h lī-hāi koan-hē lâi kóng, lán kiám m̄-sī ài kái-kek chit hō put liông ê si̍p-sio̍k, lâi hun-piat uî sèng, thang êng-iāu Chú ê sèng-miâ chiah tio̍h.
Nā bô sêng-àn lâi hoat-pò͘, chiū bo̍k-tióng beh tuì hoē-iú kái-liông chit ê sū, chin ū iú khió lân giân（有口難言）ê tiám chin-choē; nā siat-sú put-bûn put-būn, thèng ki chū-iû, chiū chit khoán put-sûn ê chok-hong; chhú-āu oē ná lī-hāi, kàu tī put-kham siat-sióng ê toē-pō͘, chiū hō͘-hoé put-ki̍p.
