首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 回憶
回憶
卷期：第1022期 本次： 日期：1968/1 刊名：台灣教會公報 頁數：7-8
篇名：回憶 [ Hoê-ek ]
作者：
  顯示 : 漢羅 全羅 並列  

回憶

（本期屬完） Pat 習所

1968.01.15  1022號P.7~P.8

 

新禮堂落成。校慶等。

台前5年（1916）所起的新校舍，照彼時看，是真合用，若是經過15年後，學生的數額年年加添，若是禮堂的坪數，不時是37。5坪，攏未加添。舊禮堂的長是7.5間，闊是5間，按呢才有37.5坪大，只有會收容250人，極滿等是300人，就差thóng-thóng lah！1935年是傳教佇台灣70年，有-tēng欲佇台南開70週年紀念大會，也是長中開校50年，也有定著欲開祝賀會。所以著有會通容允800外人的禮堂，就定著中學起較闊大的禮堂。建築費按一萬5千箍。這個費用按算對校友佮家長募捐，若無夠，才另外設法。1932年4月，趙天慈先生對東京立正大學高等師範科畢業倒來，伊所負擔教學時間無偌濟，又閣伊佮校友，家長較熟識。所以當局推薦伊出來募捐這條錢。天慈先生拜二，三，四教冊，拜五到拜一出去募捐。倚三月日的奔走，收入現金7千外，佮學校所積聚的，以及教師會特別的寄贈金，合合做伙，就著手興工。到1935年10月，台灣南部教會設教70週年，長中50週年校慶。落成典禮攏做伙舉行。

這間禮堂闊45尺（7.5間），長100尺（16.66間），就是124.5坪大，會得容允800外的學生，較無理會坐得900名。這時萬校長猶佇台灣，這間是伊最後的建設，通講是做好的紀念。為著計劃種種的行事，學校歇睏一禮拜咧準備，3，4日久佇遮開紀念會，音樂會，運動會，展覽會，紀念，感謝，歡喜，予hoān-nā參加的人無未記得。這慶祝引起台灣各方面的興趣，校友，家長，朋友，牧師，長老，代表對台灣倚近各地，以及政府官員，佮濟濟富商來參加。大家真滿足，有這間會通容允800外人的禮堂，實在是真合適的紀念建築。大家to承認咱的學校是有前途的，早日所發生麻煩問題也穩定起來。這時加藤龍太郎做校長，伊也有聲明，學校先生的數額，台，日平濟人。所以日台教師間的chhai-khī也對按呢介紹。師生的感情漸漸完美無事。對這兩個典禮佮行事，所得著的影響真大！感謝上帝。

這間會通容允900名左右的大禮堂，是萬牧師設計，許泉先生製圖。佇這个時陣後尾有鐵筋混凝土（鋼筋混凝土 reinforced concrete）的建築法，所以橫kông，kah-tòng攏是用三角鐵，磚仔壁，厝頂蓋烏瓦，門，窗真濟，連ē-kûn-tó͘也留thoah-chí，會得thoah開得，真向涼秋凊。攏共khai一萬7chheng箍若定，這時陣，錢大圓，物好閣俗，攏無彼號偷工減料的話，厝真勇，雖然風颱地動，安然自在無驚。三年前校友侯全成先生受命做董事長，有閣計畫改造禮堂較大，會得容允1500名以內，做南部教會100週年紀念大會的室場。後來若有機會才講較詳細。

  學寮廢止

有學寮才有好的校風（校風），這是捌toà過宿舍的人所公認的。萬校長真嚴，學生攏著toà宿舍，若無毋收，連先生的囝也著帶toà宿舍。所以全校學生寄宿制度，是長中的特色。師生同起居。長幼相幫贊，疾病相扶持，和藹親像一家的人。早暗吟詩，讀經，祈禱，會得通得著宗教教育，訓練精神，維持學校好的風氣，傳統幾十年，綿綿不絕，獨獨遐的日人，用皇民化做口實。實在是懼怕台胞策動反抗，舍監攏著日人擔當。加收社費，加添學生toà宿舍的負擔，致使學生毋愛toà宿舍，有的帶佇市內的人家厝，有的對遠遠的所在。早起時3，4點鐘，就著起來準備囝兒的早頓佮中午便當。宿舍內也ta̍uh-ta̍uh發生事件，真o̍h得辦，為著台灣人做舍監的時，都真好過日，現時thái會按呢，紲teh僥疑是台灣先生煽動的，佳哉老加藤校長無信in的話才無事。

因為戰時的統制政策，未得自由買物。英國教會的補助金也絕路，著考慮費用的來源，才變宿舍做教室，收卡濟學生，通得著卡濟學費。這個有傳統歷史的宿舍制度，對按呢廢止去lah！

國語講習會

光復後除去袂使得開支基本金10萬以外，學校無偆偌濟錢。趙天慈，李國澤，李國良3位先生就想出趁錢的法度。對34年10月1日起開國文（趙），國語佮pèng-jī（二李）的講習會，有趁淡薄錢做救濟燃眉之急（燃眉之急）。咱教會學校佇予日本控制50年久的中間，猶留漢文佇-leh，也有精通國語的先生teh教冊，chē會堪得予咱驕傲（Pro͘d）。講習會男女兼收，卡濟是機關公司的職員，有的刁工對高雄，嘉義來通學。真熱心，有興趣。

師生之愛

學費是照政府所規定，袂使得加收，況兼光復後，米珠新桂（米珠薪桂），一個先生所得著的有限定，入不敷出，學生體貼老師的苦痛，創設愛校會，每月每一個學生獻交白五 5 chin，這攏是對學生的誠意，無人無交。學生中揀出委員來收集，然後照教職員家族的濟少，分配到先生的家內。有一擺趙天慈先生對台北欲倒來台南，車中拄著李年春局長，請伊將食米，配售予私立學校員工。伊有答應，隨時叫佇siāng車內的秘書會記得設法。對遮起私立學校員工對in 的申請會通對糧食局買卡俗的米，學生的獻米運動才停止。

長中的校友也不止愛敬先生。80所bat去彰化，高雄，西螺，新營，北港，竹山，朴子遮的所在，攏受校友開會歡迎。幾年來每年都有幾若擺學生倒來開in 的同班會（同班會）。用市內的校友做發起人，發信招集各地方的級友來訪問母校開會。雖然in無攏信主，開會的時，猶原吟詩讀經祈禱。閣一擺想出早前做lé-pêng的快樂。聽「母校的經過」，「講各人的狀況」有的已經做阿公，有的猶未做老爸，有的是官，有的是民，三教九流，無所不有。舊年11月23日所開的，是民國24年入學的同學會，有的對台東，台北，台中來赴會。也有豐富的筵席，送禮物予5 位老師來表示in 的感謝。

終身名譽校長

日本降服，台灣光復，kiám有比這卡歡喜的事mah？加藤校長吩咐趙天慈先生著趕緊佮吳Chhiu-bî，侯全成2位先生參詳善募的事情，若無會予人接收去。Ta̍uh-ta̍uh佇吳家議論代誌過 12，3點才tò來，拄著憲兵巡邏，擋毋人過，欲搜身軀，佳哉身上有黨證，兩人才安全突破警戒線。

三十四年10月10日，本校閣開，來報到的學生600外名，分做高，初級兩班。隔年7月有舉行舊制中學做後一擺的畢業式。學校雖是無直接受炸，若是大戰中攏無修理，椅，桌也損失，扑歹真傷重。36年得著家長會長顧溫Chiàm-khoe先生的好意，佇台南縣下對家長募款，佮屏東縣下幾所在，得著16萬4千外（舊台幣），開支後，猶偆一萬9千外。預算這兩萬銀會得變做200萬，無扑算，到38年的一早起，變做5 角銀若定。

有一日，趙，王以及幾若個日本老師，坐佇舊禮堂樓頂的前面走廊teh聊天。 茄籘(Ka-tîn)校長講，我看恁chiah 的人，只有趙君一人是做長的階級，總是欲 怎樣oē 做長 leh! 伊是台灣人，政府無欲用做校長，扑算著入實業界，較有向望。趙君講我bat做過級長，宿長，現時是高三的級主任嘛是長，又閣是阮兜的家長，按呢就到額lah！

無扑算幾年後，上帝的安排，日本敗戰，台灣光復，董事會聘請趙先生做校長。伊擔當校長的工6年。因為年歲濟，身軀漸衰才辭職，後來有發見佇頷頸生瘤，經過手術，才閣復原。董事會毋甘伊離開學校，贈送伊終身名譽校長。一sî 金以外，閣送伊每月俸給的三分一，予伊養老。海外的傳教師會，也有寫批共伊說謝。

校歌   趙天慈作詞

堂皇大廈，威鎮城東，歷史悠久，美麗稱雄，

桃李盈門，化雨春風，螢雪苦幹，學海爭強。

隆隆校運，與世同長，隆隆校運，與世同長。

長榮中學，萬世流芳，長榮中學，萬世流芳。

長榮，長榮，長榮。

「Pat習所對55年7月到taⁿ，頭尾3年久，佇報上佮大家saⁿ見面，taⁿ「回憶」到遮為止。向望對3月起會得用我所知bat聖地Pa-le̍k-su-thêng的事報恁知。3年久勞煩大家的目睭，共大家說謝，踮佇主得著安康。」

                                    （全文完）
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461