Phîⁿ-ô͘ Kun-jîn Jia̍t-sim Pang-chān Kàu-hoē Kang-chok
Chong-hoē iàu-bûn
1968.01.15 1022 hō P.18
Má-keng kàu-hoē siông-siông tit-tio̍h tuì Tâi-oân lâi ê chheng-liân kun-jîn pang-chān. Nn̄g nî chêng ū tit-tio̍h Tâi-pak Toā-tiū-tiâⁿ kàu-hoē ê Sèng-koa-tuī chí-huī-chiá, Koa Khé-bêng Kun lâi pang-bâng goán ê Sèng-koa-tuī. Chi̍t nî chêng iā ū chêng Chóng-hoē Gī-tiúⁿ Tiuⁿ Hông-chhiong Bo̍k-su ê kong-chú Sìn-it Kun lâi chí-huī Sèng-koa-tuī. Koa Sian-siⁿ hiān-chāi khì Bí-kok, iā Tiuⁿ Sìn-it Kun hiān-chāi tī Tâi-oân Sîn-ha̍k-īⁿ. In lóng sī ū-pī kun-koaⁿ, só͘-í ū sî-kan, koh in iā ū jia̍t-jia̍t thiàⁿ Chú ê sim-sîn.
Taⁿ hiān-chāi iū-koh chi̍t uī Lô͘ Chùn-gī Kun lâi pang-bâng goán ê Siàu-liân Sèng-koa-tuī. Tuì chiaⁿ-ge̍h khí iok ū 45 miâ ê Chho͘-tiong ha̍k-seng lâi teh o̍h, chin sēng-hóng. Goán Má-keng kàu-hoē sui-jiân ka-tī ū chí-hui ê lâng, chóng-sī nā ū gū-tio̍h jia̍t-sim thiàⁿ Chú ê chheng-liân beh pang-bâng goán, goán lóng lâu ki-hoē hō͘ in. án-ni, lióng-hong lóng ū tit-tio̍h lī-ek. Chùn-gī Kun sī Ko-hiông Kū-siâⁿ Sîn-ha̍k-īⁿ ê ha̍k-seng. I tī Phîⁿ-ô͘ sī tam-jīm hiàn-peng ê chit-bū.
Chiah ê Sèng-koa-tuī ê chí-huī-chiá í-goā, siông-siông ū lâng－kun-jîn－lâi pang-bâng goán ê Chú-ji̍t-o̍h kap thoân-khè ê kang-chok. iā thong-siông ū 1--20 lâng lâi Má-keng teh lé-pài. Choè-kūn in ê lē-kà-ji̍t sī pài saⁿ kap lé-pài-ji̍t, só͘-í chit ê hiān-siōng chin bêng. Nā lē-kà-ji̍t koh oāⁿ tī pa̍t-ji̍t, chiū khah chió lâng lah.
Chhiáⁿ lín nā ū lán ê chheng-liân lâi tī goán chia teh choè peng ê, kap goán liân-lo̍k, bián-tit ū lâng bê-lō͘ sit Chú.
Tī Káng-bí kàu-hoē iā ū kun-jîn teh pang-bâng in. Hiān-chāi ū chi̍t uī Tâi-lâm Sîn-ha̍k-īⁿ ê Tân Tiat-lâm Kun teh pang-bâng Káng-bí kàu-hoē. Tiat-lâm Kun ê kai-kip sī siàu-uì, só͘-í i ê sî-kan iā pí-kàu chū-iû. I chiong hit ê chū-iû ê sî-kan hiàn hō͘ hia choè bí-hó ê kang. Kám-siā Chú:
Koan-hē kun-jîn ê hiàn-kim: Lán lóng oē siūⁿ kóng, lâi choè peng--ê tuì Phîⁿ-ô͘ sī lâng-kheh. Chóng-sī in kun-jîn lâi goân chia, m̄-nā chek-ke̍k chham-ka goán ê kang-chok, tuì hiàn-kim lâi kóng, in iā ū hūn tī chit ê, àn ge̍h hōng-hiàn in ê kim-chîⁿ. Goān Siōng-tè chiok-hok in.
