Tuì siū-khó͘ ê jīm-sek kap khu-pia̍t
Chhoà Phòng
1968.04.01 1027 hō P.4
Chú Iâ-so͘ kóng,"Goá í-keng chiong chiah ê sū kā lín kóng, hō͘ lín tiàm tī goá ū pêng-an, tī sè-kan lín ū khó͘-lān, to̍k-to̍k lín thang pàng-sim, goá í-keng khah iâⁿ sè-kan"（Iok-hān 16:33）. Pó-lô kóng,"Lán tio̍h tuì choē-choē kan-khó͘ lâi ji̍p Siōng-tè ê kok"（Tô͘ 14:22）.
Lia̍t-uī, phó͘-thong lâng khoàⁿ tio̍h"siū khó͘"kiaⁿ-uì kàu chhin-chhiūⁿ hó͘, chhin-chhiūⁿ sai, lia̍h choè chí tio̍h tô-pī. Chóng-sī chiàu téng-bīn nn̄g chat keng-bûn khoàⁿ khí-lâi, Ki-tok-tô͘ sū-si̍t m̄ eng-kai choa̍t-tuì chûn hit khoán ê koan-liām. Ki-tok-tô͘ chèng-tong ê siū khó͘, si̍t-chāi thang choè in ê khò-thêng, kong-êng; iā sī in chìn-ji̍p Siōng-tè kok ê pō͘-tiau. Tān-sī siū khó͘ iā ū chióng-chióng ê put-tông: ū ê siū khó͘ chin pó-kuì, ū ê siū khó͘ si̍t-chāi chin thang thó-iàm, tio̍h kiaⁿ-hiâⁿ lâi chīn-la̍t pī-bián, che sī lán èng-tong jīn-sek kap khu-pia̍t ê. Tī chia chhiáⁿ saⁿ-kap lâi siūⁿ, lâi gián-kiù kuí hāng, chiàu ē-bīn:
1. Ta̍k lâng chū-tiàu（自召）ê siū khó͘
Chit chióng ê siū khó͘, sī tuì hoān-choē choè pháiⁿ, chū-kí ê hêng-uî bô hó lâi tì-kàu ê, só͘-í kiò-choè"chū-tiàu ê siū khó͘." Chit khoán ê siū khó͘, pèng m̄-sī chìn-ji̍p Siōng-tè ê kok só͘ su-iàu ê. Siū chit chióng khó͘-lān ê sî, iā boē thang tī Chú tit-tio̍h pêng-an. Chit chióng khó͘-lān chu-bī ke̍k giâm-khok（嚴酷）, sún-sit ke̍k toā. Tû liáu m̄-sī thiat-té-tek hoé-kái jīn-choē, boē thang tit-tio̍h Siōng-tè ê sià-bián, lâi khoe-ho̍k sim-tiong ê pêng-an. Chit khoán siū khó͘ chhut tuì ka-tī, boē ēng tit oàn-thàn pa̍t-lâng, tò͘-hīn khoân-kéng. Chá Lô-tek（A-pek-la̍h-hán ê ti̍t-jî）sī tâng iūN ê kéng-gū; Sèng-keng kì kóng, Lô-tek chûn-ì chiām-chiām chhian-soá pò͘-pîⁿ ti̍t kàu Só͘-to-má（Chhòng 13:1-14）
Nā tha̍k Chhòng 14 chiuⁿ í-ki̍p 19 chiuⁿ ê lāi-bīn, chiū chai Lô-tek in-uī án-ni, siū khó͘ put siáu. Koh Tāi-pi̍t ông tī kiong-tiān ê téng-bīn ka-tī kiâⁿ-iû ê sî, hoān liáu toā choē（II Sat 11:2）.āu-lâi Tāi-pi̍t siū khó͘ ê chhim-khek chì-ke̍k hō͘ lâng thang kiaⁿ（II Sat 13:-18:）. Siōng-tè ê jî-lú choè pháiⁿ, Siōng-tè pit-tēng koán-kà, tng siū koán-kà ê sî, chiū ū i ê thòng-khó͘.
Chhin-ài ê hiaⁿ-ché, lán chhian-bān m̄-thang siūⁿ choè Ki-tok-tô͘ iáu thang iông-ún tit hoān-choē ê û-toē（餘地）, tio̍h chai Ki-tok-tô͘ su-iàu sèng-kiat ê seng-oa̍h: nā-sī hoān-choē choè pháiⁿ, piān sī chū chio khó͘-lān.
2. Tuì pa̍t-lâng lâi ê siū khó͘
Lâng oē thang choè ê tāi-chì sī chin-choē, hō͘ lâng siū khó͘, iā sī lâng choè ê sū-chêng ê chi̍t chióng; che sī lâng-lâng tī sè-kan kó͘-kim tiong-goā siông ū ê sū-si̍t. M̄-nā tuì-te̍k kap tuì tuì-te̍k ê tiong-kan án-ni, ū sî chin chhin-kūn ê lâng. chhin-chhiūⁿ tông-o̍h, tông-sū, chhin-iú iā oē hō͘ lí siū khó͘, m̄-bián tio̍h Siōng-tè ê chhiú: chí-iàu Siōng-tè m̄ chún, lâng sui-jiân tô͘-bô͘ siat-kè beh hō͘ lí thòng-khó͘, iā sī tô͘ lô bû ek（徒勞無益）, sīm-chì ū sî lâng siūⁿ beh hō͘ lí chiah khó͘, hoán-tńg chiâⁿ0choè lí ê hok-khì. Kú lē chhin-chhiūⁿ（1）Kū-iok sî-tāi, Iok-sek put-hēng hō͘ hiaⁿ-tī boē kàu Ai-ki̍p, āu-lâi koh siū chú-hū Pho-thê-hoat ê bó͘ ka bû hām-hāi, koaiⁿ lo̍h kaⁿ, piáu-bīn-chiūⁿ khoàⁿ khí-lâi i sī chin khó-lîn, choè siū khó͘ ê chi̍t uī chheng-liân. Chāi i ê hiaⁿ-tī, chāi hit uī chú-hū, lóng sī siūⁿ beh hō͘ i chia̍h khó͘. Chóng-sī si̍t-chè-siōng hiah ê it-chhè ê keng-le̍k, hoán-tńg sī pìⁿ-chiâⁿ liáu i cháu-ǹg chun-êng ê koân-tâi ê lâu-thui, chiâⁿ-choè i ê hok-hūn, êng-jīm Ai-ki̍p ê cháiⁿ-siòng.
（2） Tān-í-lí ê pêng-iú（tông-sū）ēng kan-kè hām-hāi i kàu tī sai-hia̍t, kiat-kó si-hô bô sûn-siong--tio̍h. Chú Iâ-so kóng chiū lí ê thâu-mn̂g chi̍t ki iā lóng kè sǹg, bo̍h-tit kiaⁿ, lín pí joā-choē chhek-chiáu iáu koh khah kuì-khì. In-uī án-ni, lán thang chai nā ū Siōng-tè pang-chān, pa̍t-lâng cháiⁿ-iūⁿ khó͘-chhó͘, boē thang sǹg choè sím-mi̍h.
3. Tuì chhì-liān lâi tú-tio̍h ê khó͘-lān
Siōng-tè ê kiáⁿ-jî tī sio̍k lêng ê sū-kong siōng, teh-beh chiâⁿ-choè toā(toa) lō͘-ēng, tio̍h seng keng-kè chi̍t toā toāⁿ hùn-liān ê khó͘-thàng. Tng tī chhì-liān ê khó͘-kéng tiong, oē khiā khí chāi, jiân-āu chiah oē chiâⁿ-choè sek-ha̍p ê khì-kū. Nā m̄-sī án-ni, Siōng-tè bô hoat-tō͘ thang khí-iōng i. Koan-hē siū chit khoán khó͘-lān ê ì-gī kap su-iàu, nā tha̍k I Pí 1:7; Ngá-kok 1:12 téng ê keng-kù, chiū khó-í bêng-pe̍k. Tī chin-choē ke̍k pêng-siông ê sū-lí siōng, lán iā khó-í khoàⁿ chhut siū chit chióng thoàn-liān kong-iōng ê tiōng-iàu, chhin-chhiūⁿ chi̍t tè thih tio̍h keng-kè iām-hé ê sio, tuî, chù-chō, chiah oē chiâⁿ-choè lāi-khì. Chi̍t ki bo̍k-chhâi su-iàu chin-choē ê siu, siah, kù, kap khau, chiah thang chiâⁿ khì-kū. Ge̍k put tok put sêng khì. Chi̍t ê ha̍k-seng iā tio̍h ū khek-khûn khek-khó͘ hùn-hoat ēng kang tha̍k chheh, chiah oē oân-sêng ha̍k-gia̍p. Bô siū kè hùn-liān chiū bô ū chiân-tô͘, chit téng-hō ê lē-chèng, si̍t-chāi chin-choē thang kóng. Tī Sèng-keng kì-chài tuì chhì-liān lâi siū khó͘ ê lâng, thang kóng chiū-sī sìn-sim tù-miâ ê A-pek-la̍h-hán kap keng-kè pah lān（百難）, bô tōng-iô ê Iok-pek, nā-sī tha̍k kè in ê lí-le̍k, tuì ū siū hoān-lān ê khó͘-thàng, hit ê ì-gī chiū ná oē bêng-liâu thàu-thiat.
4. uī Chú lâi tú-tio̍h ê siū-khó͘
Chi̍t khoán siū-khó͘ chin pó-kuì, choè ū ì-gī, ke̍k ū kè-ta̍t. Muí ê Ki-tok-tô͘ èng-tong hoaⁿ-hí jím-siū, iû-kî sī tī kàu-hoē tiong, jīm-chit ê Ki-tok-tô͘, tio̍h ū goān siū khó͘-lān, Chú ê miâ chiah oē to tit（多得）êng-iāu, Chú ê kàu-hoē chiah oē heng-ōng. Chit chióng siū-khó͘ thang hun choè 2 khoán lâi seh-bêng:jsī kiâⁿ-tō（行道）,ksī thoân-tō.
Lia̍t-uī tio̍h chai chi̍t ê Ki-tok-tô͘ kan-ta oē bat tō-lí, oē kóng tō-lí, iáu-sī bô kàu-gia̍h, chú-iàu chāi-tī oē kiâⁿ tō-lí. Chóng-sī oē kiâⁿ tō-lí pèng m̄-sī chin iông-īⁿ ê sū; in-uī beh kiâⁿ tō-lí, sî-siông ū 3 ê toā tuì-te̍k: chiū-sī chū-kí, mô͘-kuí, sè-jîn, chit 3 ê tuì-te̍k lóng-sī hui-siông ū la̍t ê. Tng tī lí beh kiâⁿ tō ê sî, in tuì lí chiū chhin-chhiūⁿ chāi chá Pa-pí-lûn ông Nî-pò͘-kah-nî-sat teh tuì-thāi Tān-í-lí 3 ê pêng-iú: Sa-te̍k-lia̍p, Bí-soah, A-pek-nî-kho chi̍t-iūⁿ. Nî-pò͘-kah-nî-sat sī toā ū ui-koân, piáu-bīn chiūⁿ khoàⁿ khí-lâi, i oē li̍p-khek chiong hit 3 lâng hiat lo̍h 7 pē iām ê jia̍t-hé tiong sio kàu pìⁿ hé-hu. Chóng-sī m̄-bián kiaⁿ, in-uī Siōng-tè sī kèng-ka ū toā le̍k-liōng ê. Só͘-í tng lí beh kiâⁿ-tō, chit 3 ê tuì-te̍k lâi chó͘-chí lí, khióng-hat lí ê sî, lí chì-hó tio̍h chhin-chhiūⁿ chá Tān-í-lí hit 3 ê pêng-iú ê ìn-tap Nî-pò-kah-nî-sat ê oē siàng-khoán, ióng-kám tuì i kóng, "Goá só͘ ho̍k-sāi ê Siōng-tè, oē chiong goán tuì jia̍t-hé tiong kiù chhut, ông ah! I iā tek-khak oē kiù goán thoat-lī lí ê chhiú, chiū kiám-chhái boē-oē; ông ah! lí tio̍h chai, goán koat-toàn bô ho̍k-sāi lí ê sîn, iā tek-khak bô beh kuī pài lí só͘ li̍p ê kim-siōng", piáu-sī kian-koat bô khut-ho̍k.
Koan-hē thoân-tō hong-bīn: Chi̍t kiāⁿ sū-kong, beh oē-thang choè chhut kàu jú iú-ek tī lâng, jú kám khùn-lân. Thoân tō-lí sī kiù lêng ê sèng-kang, só͘-í m̄-sī chin kán-tan ê chok-uî. Sū-si̍t-siōng nā m̄-sī ū Sîn ê tâng-kang, Siōng Chú ê pang-chān, bô lâng oē thang choè.
Ū lâng khoàⁿ thoân-tō ê chit-hūn, sī chin khin-sang, khoài choè, oán-jiân tī biō lāi ê hê-siūⁿ chi̍t iūⁿ. Tio̍h chai khéng chia̍h-khó͘, hi-seng chiah sī thoân-tō-chiá ê chú-iàu tiâu-kiāⁿ, m̄-goān siū-khó͘ boē-oē thoân-tō. Nā siông-sè khoàⁿ sù-tô͘ kap kàu-hoē sú siōng, só͘ ū uī Chú thoân-tō ê kó͘-sèng sian hiân（古聖先賢）, in thoân tō-lí sêng-chek í-ki̍p tuì thoân tō-lí lâi siū ê khó͘-thàng, chiū khó-í bêng-pe̍k che sū-si̍t. Thoân-tō-chiá siū-khó͘ ê cheng-sîn sī boē-oē thang bô tit. Lūn kàu chit ê toê-ba̍k, kóng khí-lâi oē-gú chin tn̂g. Chit-tia̍p chhiáⁿ ín kuí chat Sèng-keng lâi choè kiat-sok. I Pí 4: 15,16,19 kóng,"In-uī lín tiong-kan m̄-thang uī-tio̍h choè hiong-siú, choè chha̍t, kiâⁿ pháiⁿ-tāi, á-sī in-uī ài chhap pa̍t lâng ê êng sū, lâi siū khó͘; chóng-sī lâng nā uī-tio̍h sī Ki-tok-tô͘ lâi siū khó͘, chiū bo̍h-tit kiàn-siàu, tio̍h tī chit ê miâ kui êng-kng Siōng-tè. Só͘-í chiàu Siōng-tè ê chí-ì, siū khó͘ ê, tio̍h ēng hó phín-hēng, chiong in ê lêng-hûn kau-thok sìn-si̍t chō-hoà ê Chú." Koh Lô-má 1:17, 18 kóng,"Lán nā kap I tâng siū khó͘, sī beh hō͘ lán kap I tâng êng-kng, in-uī goá sǹg hiān-sî ê kan-khó͘,nā pí khí só͘ beh hián-bêng kàu tī lán ê êng-kng, chiū put chiok khoà-ì."
