Ko-hiông-chhī

Iûⁿ Kim-hó͘ Tiúⁿ-ló

1968.05.01  1029 hō  P.10

Chiân-kim kàu-hoē ê Tiúⁿ-ló Iûⁿ Kim-hó͘ Sian-siⁿ tòng-soán tē 6 kài ê Ko-hiông chhī Chhī-tiúⁿ.

  Iûⁿ Tiúⁿ-ló hiān-nî í-keng 70 hè lah, chóng-sī cheng-sîn jio̍k-thé lóng chin ióng-chòng hoa̍t-phoat.  I tī Ko-hiông chhī toà 50 nî kú, ū khui Jîn-hô i-iⁿ, put-chí koan-sim chèng-tī, chóng-sī bô boē kì-tit i sī Ki-tok-tô͘.  4 chhù ê kèng-soán chhī-tiúⁿ to ēng"Kèng Sîn ài jîn"choè i ê chèng-kiàn ê chi̍t tiâu.

Iûⁿ Tiúⁿ-ló hiān-jīm Ko-hiông Chiân-kim kàu-hoē ê tiúⁿ-ló, í-goā ū(ú) tng Ko-hiông Ki-tok-kàu Chheng-liân-hoē ê hù lí-sū-tiúⁿ.  Tiúⁿ-ló-niû Lîm Gio̍k-hoâ Lú-sū sī Chiân-kim kàu-hoē Lú Soan Hoē-tiúⁿ.  I ê sió-bē sī Chóng-hoē Lú Soan chí-tō-chiá chi-it.  Bē-sài sī Lîm Khé-sam Tiúⁿ-ló, iā Tâi-oân Sîn-ha̍k-īⁿ īⁿ-tiúⁿ Tân Sek-chong Phok-sū sī Iûⁿ Tiúⁿ-lô ê sun-sài.

  Chhiáⁿ kok-uī tho̍k-chiá uī-tio̍h chit uī Ki-tok-tô͘ chhī-tiúⁿ tāi-tó.