南中女宣舉辦母親節音樂會
1968.05.15 1030號P.11
台南中會女宣合唱團本月13暗，為著家己慶祝母親節，佇太平境教會舉辦「母親節音樂會」。音樂會結束的時，也有表演一齣真有意義的話劇，叫做「光明佮烏暗」，以外也有來赴會的女宣會員全體表演康樂節目。
南中女宣這回佇太平境所舉辦的母親節音樂康樂晚會，參加的婦女大部分攏已經做媽媽，阿嬤lah。總是in所吟的詩歌，一屑仔也無輸青年人的聲音。當in teh吟數念老母的詩的時，in 的聲音宛然親像出對細囝的喙，in的表情也親像細囝離鄉teh數念in的老母，予聽的人，激起思親佮孝親的心。
南中女宣合唱團是佇今年閣活節才成立的。In的宗旨就是聚集所謂「軟弱的女性」的力量，用in無條件白白所得著的真正的救贖佮實在的信仰協助教會，用詩歌來宣揚耶穌就是人類的救主。 |
