世界偉大女性海倫凱勒別世
世界最偉大女性之一，海倫凱勒別世
1968.06.15 1032號P.8
克服青盲佮啞口，成做世界做偉大的女性海倫凱勒（Helen Adams Keller）女士佇6月1號別世，享年88。
海倫女士出世19個月就患著熱病失去視覺佮聽覺，成做一個青盲閣啞口的人。到8歲的時有請一位老師蘇利文（Sulli-van）女士做家庭教師。對凱勒女士自身的天資佮蘇利文女士的耐心，教導進步到會曉講英語，德語，法語，也捌希伯來語。1904年畢業Luî-tek Khek-le̍k大學院得B.A.的學位。以後閣得著真濟的榮譽學位。
伊的一生有濟濟著作佮講演，將大部分的時間佮精力貢獻佇世界身體破相的人的福利。1937年有去日本各地講演，日本政府用「準國賓款待伊。」
對凱勒女士，日本San-sek Kun-pêng先生有講一段故事：家庭教師蘇利文女士對凱勒盡量教伊濟濟項事，總是關係上帝的真理真慎重毋敢教，後來才請一位牧師來教伊關係上帝的事，彼時海倫共牧師講，「你所教我的上帝，佇我的心內已經攏知，只有毋知伊是叫做上帝若定。」伊一生對上帝虔誠，佇伊的身上榮光上帝，利益世間人。 |
