首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 著揀好的份額（路加10：38-42）
著揀好的份額（路加10：38-42）
卷期：第1034期 本次： 日期：1968/7 刊名：台灣教會公報 頁數：6-8
篇名：著揀好的份額（路加10：38-42） [ Tio̍h kéng hó ê hūn-gia̍h（Lō͘-ka 10:38-42） ]
作者：鄭連坤 Tīⁿ Liân-khun
  顯示 : 漢羅 全羅 並列  

聖經講解

2.著揀好的份額（路加10：38-42）

鄭連坤

1968.07.15  1034號P.6~p.8

 

路加福音段的記者路加佇序言的所在捌講，「我已經對起頭siōng-sè chha-khó攏總的事，就想著照次序寫伊」（1：3）。咱若注意讀路加福音段就會知，伊實在有照次序編排。因為伊咧安排記事不時有勸這個意思，所以彼個前後關係常常比別本的福音段較有意義佇咧。閣一項路加有得著真濟別的福音書記者所無得著的材料。親像9：51起到18：14叫做「路加的旅行記」（省略稱做「L」）。今咱今仔日所欲研究這段的聖經chām就是這個「L」的一部分。佇遮代先來看路加怎樣照次序咧安排這chām的記-事。佇路加10章的頭chām有講起耶穌差學生去做工的事（10：1-24），然後就進入佇真出名的「好的 Sat-má-lī-á人的譬如（10：25-37），紲落去就是記載咱今仔日的故事。閣這個故事了後隨時紲接講起耶穌教示學生咧做工，閣耶穌教示學生祈禱的事（11：1-13）。對這個安排咱通知代先有學生咧做工，閣耶穌佇好的Sat-má-li-a人的譬如也是咧要求有疼的行為，然後學生來對耶穌要求著教示in祈禱。按呢代先有工作，有疼的行為，了後學生咧欲領受，咧聽候上帝的恩典進入。一面in的疼痛表現佇工作裡（Love in Actoin），猶閣一面為著欲得著閣較好的，所以佇歇睏來表現in的疼（Love in Rest）。路加佇這兩款奇妙的疼的中間安插伯大尼兩個姊妹的故事，我相信毋是無意義的。的確有伊所講照次序寫的用意佇咧。

  （1）馬大

馬大這陣為著耶穌佮伊的學生光臨非常歡喜，為著欲接待遮的貴賓非常無閒，因為這個是馬大的特色的一項（約翰12：2），特別做這家的負責人（v.38）應該著按呢做。所以咱絕對無理由來嫌伊所表現出來的疼心（Love in Actoin）。閣耶穌也攏無責備伊的招待。不過馬大起頭用歡喜佮歡迎的心志來開始做工，毋過了後彼個工愈麻煩，愈無閒，紲彼的歡喜的心情漸漸消無變做刺疫，著急，也想著伊的小妹無來鬥幫忙，心內生出不平出來。去頭是伊咧做工作的主咧安排一切，總是漸漸變做工作是伊的主人咧支配伊，伊紲失落彼個自主性去。伊對耶穌所講出彼款hytsteric的話就是表明伊已跋落佇工作的奴隸lah。錢原來是為著人的經濟方便所產生的一種器具，所以完全是人咧做主，欲怎樣使用攏kài-chāi佇人的意思。總是漸漸顯出顛倒反的情形出來。就是人了後看重錢致到變做錢的奴隸。安息日起頭嘛是為著人設的，毋過了後變做人予安息日的規定束縛失落自由，到安息日的主耶穌來才頭一擺敨放這個重擔，予咱得著自由。真濟事情攏是按呢，將本末顛倒，第一要緊的紲排佇路尾，將較厝的看做第一要緊去。親像學生受差遣去做工，轉來的時歡喜到極，in為in講，「主ah，用你的名鬼也降服阮」（10：17）。耶穌看in只有注意in的工作的成功佮效果，驚了in未記得閣較要緊的事。所以特別注意in講，「總是莫得因為遮個神降服恁來歡喜；著因為恁的名記佇天裡來歡喜；著因為恁的名記佇天裡來歡喜」（10：20）。傳道的成功毋是毋好，總是猶有比這個閣較要緊的。馬大的接待毋是毋好，總是猶有比這個閣較要緊的佇咧。

  （2）馬利亞

馬利亞的性情是較靜，較gâu反省的人（introspective），伊毋是無愛做工，也毋是無愛共伊的姊妹鬥相仝。不過佇伊的內面有一個真大的問題佇咧。彼個教律法的先生對主所問「我著怎樣做，才會得著永活？」（10：25）。耶穌應答講，「行這個，就會活」（10：28），佮「你去，照按呢來行」（10：37）。佇遮有嚴重的問題佇咧。「做，」「行，」「行為」佮人的得救有甚物關係nih？人kiám毋是受造的，欲怎樣閣來做出甚物特別的事。設使勉強拍拚來做，結果kiám毋是所做出來彼個欲變做咱的主嘛？拄拄佮馬大的時咱所稽考一樣。人若實在欲做出甚物，伊應該著明明知伊是被造的，也著來結聯佇創造伊的上帝。咱有這款四正的關係的時，才會堪得稱做creata et creans（被造者，像時創造的）。今馬利亞來坐佇創造者，伊的救主耶穌的跤下，對按呢才會通結聯佇行好的氣力的源頭。這個就是馬利亞所揀著唯一的方法（Love in Rest）。

遐個gâu做工，連鬼也降服in的學生，看著耶穌的祈禱，就深刻感覺in有欠缺甚物，所以才來共主好膽懇求講，「主啊，教示阮祈禱」（11：1）。學生佇工作中毋是無祈禱，總是這-陣看見耶穌完全結聯佇創造的上帝的情形受真大的感動，in體驗著過去的祈禱，過去的工作攏親像破產一樣，所以謙卑成人in的無力佮空虛來求主著教示in祈禱。

  （3）耶穌

佇41，42節耶穌所講的話，馬大啊，馬大啊，你為著濟濟代誌掛慮混雜；若是所欠用的是一項若定；因為馬利亞已經揀著好的份業，就是袂共伊搶得的。這個絕對毋是咧責備馬大的愛服務的性質，紲來呵咾馬利亞較靜，較gâu反省的性質的。伊不過是愛予馬大知，有比伊的招待較要緊的事。佇人生有真濟人為著較無要緊的事過頭無閒，致到紲袂記得第一要緊的事。「若是所欠用的，是一項若定」佇基督徒的生活中甚物是所欠用的一項？耶穌佇遮欲閣一擺明明予咱知，著佮耶穌相佮佇咧，來聽伊的道理。今馬利亞已經揀著好的份額lah Moffatt博士翻譯這句做「Marry has chosen the best dish」（馬利亞已經揀著第一好的盤）。因為原文（meris）的意思是排規桌頂的腥臊中第一好彼盤的意思。對遮通知，耶穌佇遮咧做問題的毋是性質的問題，閣較要緊就是選擇的問題。不過親像馬大的性質的人常常袂通理解馬利亞彼款性情的人。閣親像馬利亞的性質的人若是袂曉揀著所欠用的一項的時，伊佇世間是無甚物路用，加予人麻煩，反轉做著觸，也未堪得有份佇天國。只有真實的馬利亞才會成做真實的馬大來奉仕人。佇咱的家庭所欠用的一項咱有實在揀著無？咱的家庭是對種種的性情的人來構成，若是大家著一致的一項。是咱的確著來聽主所講的話，所欠用的是一項，咱的確著揀好的份額，按呢才會通利益伊的教會佮伊的國。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461