首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 上帝的指頭仔
上帝的指頭仔
卷期：第1033期 本次： 日期：1968/7 刊名：台灣教會公報 頁數：3-5
篇名：上帝的指頭仔 [ Siōng-tè ê chńg-thâu-á ]
作者：鄭連坤 Tīⁿ Liân-khun
  顯示 : 漢羅 全羅 並列  

1.上帝的指頭仔（路加11：14-28）

鄭連坤

1968.07.01  1033號P.3~p.5

 

得著公報社主筆先生的好意，愛我開始負責12次的聖經講解，kak-得無上的光榮，毋敢推辭好膽kia̍h筆來試看。因為專門咧研究家庭問題，所以想欲通過聖經的講解來關連到基督化家庭問題，毋知按呢做會變做雙跤踏雙船的危險仔袂？若會通一兼二顧是深深所咧期待的。有揀12位的聖經來相佮想，請大家會閣較致意愛勤讀聖經，相佮搜揣內面的寶貝，閣通過聖經的話來檢討咱的日常生活，這個講解的目的完全囥佇這個所在，請相替祈禱佮多多指教。

（1）耶穌醫好啞口的人。

佮這個相siâng記事有記載佇馬太9：32-34，12：22-32，43-45；馬可3：20-30。耶穌有一擺趕一個啞口鬼，予彼個人會講話，致到眾人大奇怪。無拍算耶穌的對敵來攻擊伊講，耶穌是靠鬼王咧趕鬼。甚至有人順彼個機會來試耶穌，求耶穌著對天來的神蹟予in。佇這款場面，耶穌就來說明伊的權威毋是對鬼王出，因為若是倚靠鬼王來趕鬼，按呢鬼就家己矛盾，伊所倚靠的是萬權能的上帝，所以鬼受趕出的人咧欲體驗著上帝的支配，就是上帝的國已經臨到，上帝豐富的祝福欲佇伊的身上。過去人受魔鬼綑縛，毋過這陣有比魔鬼較大的耶穌到，所以耶穌欲較贏伊，對按呢連伊的戰器也欲共搶去。耶穌趕鬼的事也是按呢。耶穌閣進一步來講伊的醫治不但是屬佇肉體上的事，的確著想到靈性方面，所以講起邪神離開人了後閣chhoā比伊較歹的七個鬼來徛起，致到彼人路尾的景況比起頭較慘。因為只有趕鬼，內面放空空，無予耶穌做主，按呢是一時的歡喜，了後欲拄著閣較淒慘的結果。耶穌對反對伊的人這款的應答，予咧聽的職位婦人人非常受感動，所以大聲表示伊對耶穌的老母欣羨的話講。生你的腹肚，予你欶的奶頭有福氣ah。若是耶穌順彼個機會愛予大家知，毋是只有骨肉的親的馬利亞才有福氣若定，見若有人歡喜聽上帝的道理來守的，攏欲享受相siâng的福氣。以上就是這段聖經的故事，今咱相佮對這個來科考得著較深的教示。

  （2）相款的厝

咱若注意看這站的聖經的時，咱會看著耶穌的教示中有用相款的厝來 說明以上的真理。

a）內面分裂的家庭。佇17節講厝註間一巴牧師佇註跤的所在有特別注意，有人翻譯，ke家己爭拚，倒閣參看馬太12：25是講，見若城抑是ke家己爭拚，的確徛袂牢。自然耶穌佇遮愛講的是，伊毋是靠鬼王趕鬼，因為鬼王趕規跤是自滅若定。不過這個代先予咱想起濟濟家庭常常是這款分裂的狀態，夫婦間，等一代佮下一代，大家(ta-ke)佮新婦，遐-佇佮......；實在這款的事是真不幸。檢采是為著意見的各樣，抑是為著建設tek的主張致到相對立，若是按呢是欲追求進步路中，較毋免掛慮。毋過咱著注意主耶穌所講，徛袂牢，一間一間倒壞的警告。

b）有外來攻擊的危險的家庭。21，22節有講起閣一款的家庭，是有人咧顧守的家庭，毋過欲有比咧顧守的較勇的欲來，按呢彼間厝也欲隨時露現彼個軟弱。耶穌佇遮所講較猛的教是欲指起伊本身，對伊的來臨魔鬼雖然咧顧守，猶過欲敗壞。今這個事來想到佇咱的家庭的時，咱欲感覺人所建立的家庭是何等的軟弱，特別對外面來的因素偌濟咧影響咱的家庭。雖然來有咧顧守，毋過一旦外面來的因素親像經濟，風俗，習慣，別人的批評抑是風聲，一般的流行，俗化的空氣等等，若深入咱的的家庭的時，有偌nih濟的家庭露現軟弱紲失敗去。特別佇信徒的家庭著留心的，就是魔鬼欲常常用萬般的方法來攻擊咱，向望咱的家庭予伊搶去。

c）空虛的家庭。佮以上兩款家庭相比較的時，我是掠做這個是較嚴重。因為一旦將內面的鬼有共趕出去，毋過內面拚掃齊整無人咧做主，按呢有一日的確欲比以前閣較嚴重的危險欲來臨。無倚靠上帝，無請伊繼續踮佇內面，按呢是非常危險的事。因為內面無有力量，只有外皮的改造是空空的。基督化家庭的口號是基督是我家之主（基督是我家之主），今這個事毋是只有掛這種的標語的牌匾佇厝內就會達成的。若毋是真正全家庭實在承認耶穌做主。迎接伊做家庭的主，家族的每一人的言行舉止有伊的臨在佮幫贊，無遐爾容易孤成的。

佇舊約時代以賽亞捌一擺問Hi-se-ka講，In佇你的家有看見甚物？（列王紀下20：15）。我常常想著這句話家己省察。假使今仔日若欲怎樣應答？是佇內面咧分裂的家庭仔毋是？是為著外面來的攻擊致到露現軟弱紲敗壞的家庭仔毋是？抑是佇內面空空無有主耶穌基督，以前咧驚鬼，驚神，今紲變做無驚神無驚鬼仔毋是？

（3）上帝的指頭仔。

a）上帝的指頭仔（V.20）

獨獨我若靠上帝的手趕鬼，這句話佇原文是用做上帝的指頭仔（the finger of God），（呂振中譯「上帝手指頭」）。卻佇馬太12：28是用做上帝的神。今這個是咧指起舊約的出埃及記8：19的故事。因為當時摩西欲chhoā以色列百姓出埃及佮法老計較的時，有倚靠上帝的氣力行神蹟，用柺仔拍地裡的塗粉予伊變做蝨母的時，遐個埃及的博士講，摩西是倚靠上帝的指頭仔來做這個事（卻咱的聖經是譯做上帝的手段）。耶穌的確想著這個事，所以佇遮講用上帝的指頭仔趕鬼。這個是欲指起上帝的權能佮氣力。今今仔日佇咱的咱的家庭有咧體驗著這個上帝的指頭仔抑無？咱實在真欠缺這款上帝的氣力佮權能kiám毋是？

b）上帝的國（V.20）

就上帝的國已經到佇恁。耶穌這款的宣言是非常趣味的。上帝國是對耶穌的臨在佮伊的工作已經現在到佇這個所在。佇聖經中咧報咱知，上帝國的現在聖第一著現的所在就是這個所在。耶穌佇遮所講的上帝國毋是咧指起終沒所欲實現彼個上帝國，就是欲指起上帝的支配，上帝的囝欲得著勝利的意思。有人講家庭是天國的影，總是這個意思是有實在上帝咧支配彼個家庭才會實現的。因為有真濟家庭反轉咧成做活地獄，予人艱苦到極。基督化家庭不但是上帝的指頭仔咧發揮彼個氣力佮力量的所在，就是佇彼個所在欲看出上帝聖的支配，對按呢咱欲體驗佇現世已經有上帝國的歡喜佮快樂。

c）上帝的道理（V.28）

毋值著聽上帝的道理來守的較有福氣。上帝的指頭仔咧做工，有上帝的國，彼個具體-tek的表現就是人欲佇時時刻刻小心注意聽上帝的話，閣歡喜遵守上帝的道理。實在的福氣毋是建立佇物質，一時的感情，氣氛抑是成功的頂面。主佇遮斷然欲宣報真實的福氣是在佇上帝的道理。家庭的福氣毋是有偌濟錢，偌濟財產，有偌濟囝兒，地位，名聲，長歲壽來做標準。特別基督化家庭的福氣的標準的確欲囥佇怎樣欣慕意愛上帝的話，閣怎樣克己來遵守伊的道理的頂面。所以頂面看過三種的家庭，今咱閣較著注意這三項iú-khoan上帝的事。

以後繼續欲佮咱相佮想怎樣來聽上帝的道理，閣怎樣來守伊的教示佇咱的家庭生活的頂面。願上帝祝福每一位基督徒所建立的家庭，會成做美滿基督化家庭通榮光歸予伊是深深所向望。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461