Kò͘ Sòng Chông-liông Tiúⁿ-ló 5 nî kī
故宋泉龍長老五年忌
Tiⁿ Jî-gio̍k
1968.07.01 1033 hō P.17
Sòng Choân-liông Sian-siⁿ tī Chú-āu 1963 nî 7 ge̍h 17 ji̍t siū hut-jiân ê chai-hāi lâi kè-sin, í-keng moá 5 nî lah. Hoê-kò͘ tng-sî ê chêng-hêng, iáu-kú hō͘ lán ê sim oē sng, kàu-taⁿ iáu-kú kám-kak m̄-kam.
I sui-bóng í-keng khì-sè 5 nî kú, i ê choè-lâng, sìn-gióng kap kang-chok ta̍t-tit lán siàu-liām, só͘-í pit-chiá chiah kia̍h pit lâi siá kuí-kù, put-tàn hō͘ lán thang tui-liām nā-tiāⁿ, iā tuì i ê jîn-seng hō͘ lán khoàⁿ oē tit thang tit-tio̍h choē-chió ê bián-lē kap kà-sī á boē.
Goá chit-tia̍p chiong i seng-gâi ê keng-kè siá tī chia, tī chi̍t hāng ê tiong-kan lâi khoàⁿ-chhut i ê choè lâng. í-ki̍p i tuì kàu-hoē kap siā-hoē ê kòng-hiàn.
Choan-liông tī Chú-āu 1923 nî（Bîn-kok 12 nî, Tāi-chèng 12 nî）11 ge̍h 5 ji̍t chhut-sì tī Tâi-lâm choè Sòng Chuí-khîm kap Gô͘ Chìn-tī Lū-sū ê tē 4 ta-po͘-kiáⁿ. I ê pē-bú tit Chú chiàu-kò͘, kàu-taⁿ iáu khong-kiān. EN-á 3 ge̍h-ji̍t ê sî, tī Tâi-lâm Tang-mn̂g kàu-hoē tuì Iûⁿ Sè-chù Bo̍k-su siū soé-lé. 4 hè ê sî ji̍p Tang-mn̂g Kàu-hoē Chú-ji̍t-o̍h Iù-tī-kho. Tī 6 hè ê sî, siū kèng-khiân ê lēng-tông ê kà-sī, chiū í-keng oē-hiáu-tit tha̍k Pe̍h-oē-jī ê Sèng-keng, Si.
Poeh hè ji̍p Tâi-lâm Su-hoān Ha̍k-hāu Hù-sio̍k Kong Ha̍k-hāu, tông-sî iā ji̍p Chú-ji̍t-o̍h Sèng-keng-kho. Che sī hán ū ê tāi-chì, in-uī phó͘-thong ê gín-ná tio̍h tī 5,6 nî-kip chiah chìn-ji̍p Sèng-keng-kho.
Tī 1936 nî（Bîn-kok 25 nî, Chiau-hô 11 nî）ji̍p Tióng-êng Tiong-ha̍k. Tī chia Choân-liông kap pit-chiá choè 2 nî kú ê tông-ha̍k. Tng-sî sī i pan-kip tiong choè tē it soè-hàn--ê. Chiàn-āu ū chi̍t pái tī hé-chhia lāi tú-tio̍h i ê sî, pí goá khah toā-hàn, hō͘ goá put-chí gông-ngia̍h. I chāi ha̍k tiong ê sèng-chit kap i khì-sè tng-sî siāng-khoán sī un-jiû ê.
Tī Bîn-kok 30 nî（Chiau-hô͘ 16 nî）3 ge̍h pit-gia̍p Tióng-êng Tiong-ha̍k, āu-lâi tông-ha̍k tāi-ke tuì i chiah tit-tio̍h liân-lo̍k. Goán ê pan-kip tông-ha̍k-hoē sī i hoat-khí ê. I kè-sin liáu-āu, soà sit-khì tiong-sim jîn-bu̍t, 5 nî kú chiah chí-ū khui nn̄g pái nā-tiāⁿ. Che iā-sī in-uī beh siàu-liām i ê kî-ji̍t ê sî khui ê.
Pit-gia̍p Tióng-êng Tiong-ha̍k hit nî ê 8 ge̍h 3 ji̍t, tī Tang-mn̂g kàu-hoē hō͘ Lô͘ Siúⁿ Bo̍k-su chiap-la̍p chiū sèng-chhan.
Tiong-ha̍k pit-gia̍p keh nî, chiū-sī kong-ho̍k tē jī nî, i chiū-chit tī Tâi-lâm-chhī Pe̍h-bí Siong Cho͘-ha̍p kap Tâi-lâm Niû-si̍t-êng-thoân Tai-lâm Chi-só͘ 4 nî kú. Tī Bîn-kok 36 nî 1 ge̍h khí kàu 45 nî 1 ge̍h, kiōng 9 nî kú chiū-chit tī Chóng-iâ Thn̂g-chhiúⁿ, chú-pān chhái-kó͘ gia̍p-bū. In-uī tuì gia̍p-bū sêng-si̍t, tit chhiúⁿ-tiúⁿ ê sìn-jīm. Tī chhiúⁿ-tiong chú-chhî Ki-tok-tô͘ ê chū-hoē. Che oē thang kóng-sī kin-á-ji̍t kang-gia̍p sū-kang ê khai-lō͘ sian-hong. Tuì chit-ê chū-hoē ū 10 goā lâng āu-lāi tī Tâi-lâm Lâm-mn̂g Kàu-hoē niá soé-lè. Tī Sòng Sian-siⁿ chāi-jīm tiong, chhiúⁿ-tiúⁿ ê sìn-gióng toā ho̍k-heng, āu-lâi chhiúⁿ-tiúⁿ êng-choán khì Lêng-nâ Thn̂g-chhiúⁿ ê sî, tī chhiúⁿ-lāi siat lé-pài-tn̂g, che sī hiān-chāi ê Ka-gī Tiong-hoē Lêng-nâ Kàu hoē.
Tī Chóng-iâ Thn̂g-chhiúⁿ khûn-bū tiong ê sî, tī Chú-āu 1950 nî 9 ge̍h 22 ji̍t tī Tâi-lâm Lâm-mn̂g Kàu-hoē kap Ko Tek-chiong Hu-jîn ê tē jī chhian-kim Huī-tin Sió-chiá kiat-hun. Chin gâu thé-thiap i ê hū-jîn-lâng, ka-têng oân-boán sī lâng-lâng só͘ him-soān ê. Bîn-kok 42 nî 1 ge̍h 7 ji̍t cha-bó͘-kiáⁿ Siok-hun chhut-sì, kin-nî teh beh chìn-ji̍p Ko-tiong. Bîn-kok 46 nî 6 ge̍h 4 ji̍t i ê ta-po͘-kiáⁿ Tia̍t-chong chhut-sì, hiān-chāi tī Hù-sio̍k Kok-hāu tha̍k 6 nî. Kám-siā Chú hō͘ i ê nn̄g ê soè-kiáⁿ ū chiām-chiām teh toā-hàn koh tit lâng thiaⁿ. Huī-tin Hu-jîn kàu hiān-chāi iáu kè-sio̍k i ê tiōng-hu chiū-chit tī Tiong-kok Hoà-ha̍k.
Tī Bîn-kok 45 nî 1 ge̍h 30 ji̍t chiū-jīm Tiong-kok Hoà-ha̍k Chè-io̍h Kong-si Chhiū-nâ Kang-chhiúⁿ Chóng-bū Khò-tiúⁿ, che sī i tī Tiong-kok Hoà-ha̍k ho̍k-bū ê khai-sí.
Tī chit tiong-kan i uī hit ê kong-si kiàn-li̍p chióng-chióng chè-tō͘, koh chú-pān chhái-kó͘, kā kong-si khiām chin-choē chîⁿ. Chi̍t nî āu ê 2 ge̍h 7 ji̍t, êng-seng lâi Tâi-lâm Eng-gia̍p-só͘ choè keng-lí, chāi jīm iok 6 nî poàⁿ. Tī chit tiong-kan uī Tiong-kok Hoà-ha̍k tī lâm-pō͘ kiàn-li̍p i-io̍h-kài ê sìn-ū, sū-gia̍p toā chìn-pō͘, ia̍h heng-kiàn kong-si ê 4 chàn toā-lâu.
Chú-āu 1957 nî 3 ge̍h 31 ji̍t chiū-jīm Tâi-lâm Lâm-mn̂g Kàu-hoē chip-sū, āu-lâi soà-chiap choè kiàn-tiok koè-kè, T. K. C. Hoē-tiúⁿ, Chú-ji̍t-o̍h Hāu-tiúⁿ téng chit. Tī chit tiong-kan pit-chiá iā bat khì pang-chān i ê Chú-ji̍t-o̍h. Tī 1960 nî 3 ge̍h 13 ji̍t siū àn-chhiú choè tiúⁿ-ló.
Tī i ka-tī ê Lâm-mn̂g kàu-hoē í-goā, i chham-ka kiàn-li̍p Kî-tiân-hoē Tâi-lâm Hun-hoē, āu-lâi siū soán choè lí-sū, Tiong-kok Hun-hoē lí-kàm-sū téng-chit. Kî-thaⁿ i iā siū chhiáⁿ choè Tâi-lâm Bâ-hong Kiù-chè Hia̍p-hoē táng-sū, bú-hāu Tióng-êng Tiong-ha̍k táng-sū téng iàu chit. án-ni hō͘ lán thang chai i tī kàu-hoē kap siā-hoē lióng hong-bīn ê kòng-hiàn cháiⁿ-iūⁿ ê khoah.
I tī teh keng-êng Tiong-kok Hoà-ha̍k Tâi-lâm En̂g-gia̍p-só͘ ê sî, tī kong-si nih muí chiu chi̍t pái kú-hêng lé-pài, put-tàn í-sin chok-chek, choè kng choè iâm, iā pang-chān i ê tông-sū lâi chiū-kūn Chú. I chit khoán ê keng-êng hong-sek hō͘ Tâi-lâm En̂g-gia̍p-só͘ chiâⁿ-choè chi̍t-ê ka-cho̍k ê khoán-sit.
I sui-bóng chit khoán, bô-lun tī siā-hoē á-sī kàu-hoē lâi choè kng choè iâm, kiâⁿ kin-á-ji̍t ê kàu-hoē kang-gia̍p sū-kang ê sian-hong, khó-sioh, iáu-kú siū i chi̍t uī 7 ge̍h 17 ji̍t 14 tiám 15 hun siū chhah-siong. In-uī to-siong chhim, koh tio̍h pō͘-uī, tī 16 tiám 50 hun kiò chi̍t kù"Chú ah"choè soah-bé, liâm-piⁿ chiū tn̄g-khuì.
Tī i ê bōng-pâi nih ū khek kóng,"Cheng-chiàn hó ê cheng-chiàn, chīn pháu-cháu ê lō͘-chām, siú só͘ sìn ê tō-lí". Si̍t-chāi ū 10 hun piáu-sī i ê sìn-gióng, choè lâng kap sū-gia̍p. Goān Chú chiàu-kò͘ i ê uî-cho̍k.
