長榮中學
● 初中招生的結果？
● 大專升格的目標？
戴明福
1968.09.15 1038號P.8～P.9
長榮中學校慶，83週年記念禮拜日閣到lah！
恭敬寫幾字共大家請安佮說謝。因為逐年得著恁的代禱佮獻金，才會通順利維持到今仔日。這是上主的看顧佮大家的支持的結果。
兩年前咱學校親像一隻船漂流佇大海中，拄著狂風暴雨的風颱。所以阮提起一個口號做目標「著拋綻聽候天光。」彼時阮確實徛佇烏暗中看袂明目標。政府咧準備欲延長義務教育到9年。公立學校直直咧增設學校佮增班。私立學校佇台南市對四間增設到12間的濟，致到咱招生困難，若無參加聯合招生就無學生的來源。教育內容來講是應該保持咱建校精神，「基督教主義。」世俗的要求卻看咱的升學大專的數額偌濟。
所以阮決心用拋錠聽候的精神，靜觀伊的演變。極力整頓內面的污穢佮錯誤的政策，來期待恢復建校以來的一貫的建校精神。
佇這中間得著各方面的關心；上主的安排，得著好的宗教主任I Thian-sù牧師(是加拿大籍)入來加強宗教教育，予事先向既定方針跑走，著漸得著安定。
兩年來，雖然無甚物特殊的表現，總是內面教職員服務精神，學生品行，靈性，讀冊風氣，確實有真大的進步。到遮親像看見天殕光lah！
今佇下面記幾點做簡略的報告。
1) 57學年度就是今年的8月起，政府實施9年義務教育，將初中改做國民中學，收容攏總小學的畢業生免試，免費入學，因為台南市內國中準備充實，閣夠容納。所以私立學校招生困難，到遮咱才會通得著一班55名。
2) I牧師來台服務拄好5年，著休假一年久轉去加拿大報告su̍t-chit，休假佮進修；已經佇7月9號離開台灣。總是伊決意欲去學習宗教教育事工佮學校教育的問題，一年後欲閣倒轉來遮繼續宗教主任的重職，請大家期待佮代禱。佇伊無佇咧一年間，阮有得著林政傑牧師來代理宗教主任的工，閣得著黃德成傳道師，是今年神學院畢業的，也校友轉來相佮做宗教工作。兩位攏是年輕有為能幹閣有專長。無論文筆，音樂，講壇......等，有新閣好的表現。
3) 佇政府革新教育的目標中，阮發現佮咱的教育目標真符合。咱的初中的確毋通放棄，也著負起咱的責任繼續才著。起頭阮想咱校史佇這個階段佮時代的變遷，著放棄國中，向高中佮大專發展，所以國中的招生thèng ki自然，採取增招高中的態度，到現在願才得著高中學生5班250名。國中學生一班55名。全校有高中11班，初中7班，共18班950名，拄好保持佮舊年相同。照別地方私立學校招國中學生來看，咱若有鼓舞佮經費的支援，敢犧牲3年久來「買學生，」相信欲有素質閣好，人數濟，教起來有效果的學生欲來才著。阮向望佇這3年間，欲得著關心咱學校的會友，校友來援助，克服困難，予咱的國中的學生也會提高素質。咱做到真實的重質無重量的效果。按呢也通提高咱傳教效果。
4) 發展大專的事，照我所知的，地點，資金，教授人才，攏會通應付閣便，只有政府教育政策目前無欲準增設大專的政策。向望緊緊大學法改革。既成有基礎幾間學院，咧申請升格做大學欲核準的機會若到，籌備會董事長吳基福先生的確欲爭取，努力到成的決心。彼個地點欲佇大埤湖抑是烏山頭。
5) 頂面所報，阮下期欲辦18班。學生950名，教員36名，職員14名。經費用學雜費來維持薪水佮經常費，一年著欠30萬箍左右，佳哉有各方面咧支援，到現在攏無負債，勉強經過。若是此去3年間會真困難，阮欲佮董事會，校友會，家長會參詳來得著確實的來源援助阮3年久。相信以後就通收支平行。懇請有關的會友佮校友替阮祈禱佮獻金，予咱的學校安穩自在直到「長榮」的榮譽。
順筆請安。 |
