聽講道的藝術
編輯室
1968.09.01 1037號P.17
咱攏會感覺聽講道了後過無久就袂記得了了。照心理學家咧講，普通人聽講演了當場隨時袂記得一半，閣過8小時就閣袂記得賰的一半抑是三分一。
欲按怎才會予記憶較堅固，記得較濟？有以下幾點通做參考。
1) 聽講的時毋但干焦用耳孔亦著用目睭，留心看講道的人的表情以及手勢，因為看的印象比聽的較深。
2) 引用經句的時著掀聖經來看。
3) 聽講的時回想重點，紲預測閣落去會講甚物。
4) 欲倒去到厝的路中將重點閣一遍反覆來想。
每日15分一生讀1250本
每天十五分一生讀一千兩百五十本書
咱攏講無閒通讀冊，其實大部分的時間攏佇無意識的中間浪費無去。
若會曉利用時間，佇等食飯的時，佇欲睏的進前攏有十外分的時間通利用。假使一個人若每日用15分時間讀冊，繼續55年久有5千外點鐘。閣假使你每4點鐘看有約7萬字的冊，一生至少通讀1，250本，通講是學識充實的博學人士lah。每日15分鐘kiám抽袂出來？ |
