首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 上帝所配合的
上帝所配合的
卷期：第1040期 本次： 日期：1968/10 刊名：台灣教會公報 頁數：3-6
篇名：上帝所配合的 [ Siōng-tè só͘ phoè-ha̍p ê ]
作者：鄭連坤 Tīⁿ Liân-khun
  顯示 : 漢羅 全羅 並列  

聖經講解(7a)

上帝所配合的

鄭連坤

1968.10.15  1040號P.3-6

 

頂期有相佮想相遇的人生佮對話的世界的問題。今佇咱一生中這兩項第一著現通體驗的就是對結婚來成做夫婦的中間。所以今仔日咱對第一起初的結婚的故事來想到基督教結婚觀。

1)     我所想袂出的奇妙。

「我所想袂出的奇妙有三項：

連我所毋知的有四項。

就是鷹鳥佇空中的路；

蛇佇石磐頂的路；

存佇海中的路；

男佮女交合的路」

(箴言30：18－19)。

箴言記者佇遮所講男佮女交合的路，實在是極其奇妙的事。伊佇遮所咧包含的是戀愛的神秘佮生囝的神秘佇咧(傳道11：5；詩篇139：13－16)。保羅佇以弗所5章說明結婚問題的也有講，「這个奧妙大啊；我講伊，來chí基督佮教會(v 32)。婚姻雖然是人生中極其普遍tek的事實，猶過若斟酌想，實在是一項想袂出的奇妙，siāng時是一件極大的奧妙siāng時是一件極大的奧妙啦。對這个奧妙有真濟款的方法來稽考，親像對社會學，生物學，抑是教育學的立場會通揣出答案，總是咱做一个基督徒應該著怎樣來理解呢？當然咱的確著對聖經來揣出彼个解答。咱若掀開聖經的時，的確欲著一驚，因為聖經對起頭到路尾攏用結婚的奧妙來說明上帝佮伊的選民的關係。對創世記2上講起結婚的起頭到啟示錄19章報咱知羊羔的婚筵為止，其中雅各全本，何西阿書攏是用結婚的譬喻講起神人的關係。新約中耶穌也常常提起結婚的要道，保羅佇哥林多前書7章也有真詳細的議論。咱今仔日只有對創世記的頭3章來相佮想就好。

2)     佇主所祝福的樂園。

聖經的頭一本，創世記1章到3章的中間有講起基督教結婚的重要真理真濟佇咧：

i)      上帝創造男佮女的事(1：26－31)。

ii)     上帝佇伊的創造的秩序中來造男佮女，閣共in配合成做夫婦(2：18－25)。

iii)     這个第一對的夫婦怎樣墮落離開上帝通驚的記事(3：1－24)。

①    上帝創造男佮女(1：26－31)。

為著甚物緣故上帝來創造男佮女呢？咱永遠袂通知這个奧妙，咱只有知上帝伊奇妙的聖旨意的中間來創造男佮女的事實若定若定。「上帝講。咱著造人親像咱的像，照咱的款」(1：26)。佇遮上帝用複數的咱是啥物意思？有真濟假說，到這陣猶無確定的答案。有人講這个複數是多神教所留的痕跡(痕跡)，是包括天軍等天象的存在，有人講是咧表現神所有的屬性，是王者的複數；閣有人主張是表示尊敬佮敬畏的複數，是神自己考慮的複數等。我咧想，做好的答案就是這个複數是咧表明三位一體的上帝的行為。人類的受造，自起頭就佮一切的活物有完全的各樣，因為人類有照三位一體的上帝的像來造，有這款上帝的像(Imago Dei)就是人類最大的光榮佮特權，因為按呢人才會通管理一切的活物(1：26)。聖經接紲講，「上帝就創造人親像伊家己的像，照上帝的像創造伊；創造in男的，女的」(1：27)。按呢人的確是男仔是女的存在，無彼號毋成男，毋成女的存在。上帝創造男佮女攏親像伊的像，彼个意思是欲予男佮女佇相對關係(confrontation)中來活。創世記1：28以下就祝福人欲知影治理萬物，紲欲生湠濟濟。按呢已經有講明創造男女的奧妙佮結婚的神秘，總是佇第二章欲予咱閣較明瞭彼个奧妙的真髓，為著欲揣出這个奧妙，我將創世記第二章佮第三章比較來想，因為若按呢做加真明閣加真趣味。

②    佇創造秩序中的結婚(2：18－25)。

創造的記事佇聖經中有記載兩擺，第一章是屬祭司資料(P典)，第二章是屬耶和華資料(J典)，咱這陣對J典來想以下8項的問題，向望會通佮第三章那比較那想彼个滋味。

1)     人單身家己蹛毋好(2：18)。希臘的哲學家Aristole捌講，人是社交的動物。實在人袂通家己生存，佇孤獨，孤立中袂通徛在，一定著相幫贊相照顧。上帝講，人單身家己蹛毋好，我欲共伊造一个幫贊的(v.18)，按呢被造者的特色就是「共存性。」閣這个共存是佇固定的兩个人格中發生的。上帝講共伊，就是特別為著彼个人來做配偶的，毋是為著別人的。共伊造一个幫贊的，原文的意思是為著伊造一个適合的幫贊者(a helper fit for him.R.S.V.)。上帝看亞當家己一人，按呢毋好，所以特別為著伊來造一个做適合的幫贊者予伊。結婚的真實的意義已經佇遮明明講出來。

2)     Chhoā一切的動物(2：19，20)。上帝用土做真濟活物，chhoā in予彼人，伊就共in號名，但是揣無一个通做伊的幫贊來匹配伊。這个是當然的事，因為結婚應該是兩个人格才會發生的事。Martin Bunber講，I and it (有人格的佮無人格的)的中間袂通成立來往關係，只有佇伊and yo͘ (你佮我)的中間才有真實的人格關係。若是佇結婚的歷史上捌發生無自然的關係，親像獸姦(bestiality)的事是上帝嚴嚴佇律法中禁止的事(出22：19；利未記18：23；申命記27：21)。

3)     上帝予彼个人睏重眠(2：21)。

佇聖經中睏有兩款的意思佇咧。一項是表示性交，(親像4：1彼人佮伊的某夏娃同房)，閣一項是死。佇遮上帝予亞當睏重眠，就是咧指伊睏到親像死去一般樣。按呢上帝咧創造伊的匹配的時，伊不但完全無干涉毋知影，就是完全被動，攏無提出甚物要求，希望佮願望，只有醒起來的時接受上帝為著伊所新創造的 配偶。所以咱應該知影結婚實在是天地的主宰上帝所創造的，毋是人的作為。「God is everything，man is nothing」(上帝是一切的一切，人時空虛)，就是一般社會都承認的，in所用天作之合，就是咧表明這个意思。

4)     包密伊的肉(2：21)。

上帝對查埔人提伊的脅骨了後，有做一件真周到的事，就是記載講包密伊的肉，這个是表明上帝負責一切，閣負責到透底的意思。事實上佇男女間若無這款上帝的醫治，真困難成立四正的關係。因為無有上帝負責的所在，男女關係只有是變做互相傷害的生活。

5)     用脅骨造查某人(2：22)。

上帝毋是閣一擺用塗粉來造婦人人(2：7)，是用查埔人的一部分來造婦人人，所以兩人才會成做一體。因為婦人人確實是查埔人的一部分(I Ko͘ 11：8，9 11，12)。出名的Matthew Henry講了真有趣味，「婦人人是對亞當的脅骨造成的，毋是對伊的頭殼提起來，若按呢，婦人人敢會peh上查埔人的頭殼來管轄伊；閣也毋是對查埔人的跤提來造，紲來thún踏婦人人。婦人人是對查埔人的胸前提出來，所以佮伊平等，閣佇伊的手下得著保護，閣倚近伊的心臟來成做伊的心肝。」

6)     Chhoā來就近彼人(2：22)。

佇這chām通看出上帝為著in兩人，親身擔任主禮人，主婚人，證婚人佮介紹人的工作。一切攏是出佇上帝美妙的安排來成就。佇結婚的關係咱的確著承認上帝就是咱的一切的一切。男女間的共存的關係的確著閣進一步到神人的共存關係。因為人只有倚靠上帝才會生存。

7)     我骨內的骨，肉內的肉(2：23)。

彼人看著上帝chhoā來的婦人人就歡喜唱一首詩講：

  今這个是我骨內的骨，

肉內的肉；

欲稱做查某人(Isha)。因為伊是對查埔人(Ish)提出。

佇眾動物的中間，袂通揣著真實的幫贊，今已經得著真實的知己啦。骨內的骨，肉內的肉，就是表明做親密的關係。中國人也是講五倫中夫婦是最親密的。佇這个所在才會成立你佮我的關係，因為平等，有主體性的人格tek結合佇in中間。

8)     翁某兩人平平褪腹裼也無見笑(2：25)。

  In兩人得著上帝的祝福，開始共同的生活，所以彼此間的關係會通保持神聖佮純潔。性原來應該是聖的。我有一句話真愛聽閣真愛用的，「The sexual union is the sacramental union。」(性的合一就是聖禮典的合一)，夫婦間的確著保持這款的關係，這个就是神聖的愛(agape)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461