Kài-siāu Báng-kah kàu-hoē khòng-lē thoân-khè
Khó͘ Tek-khiam
1968.10.15 1040 hō P.14-15
Tâi-oân kàu-hoē chìn-ji̍p soan-kàu tē 2 sè-kí, ū sin sè-kí soan-kàu ūn-tōng teh kek-sin-hoē, iā ū kuí nā khoán ê thoân-khè teh poê-iúⁿ kàu-io̍k sìn-tô͘ ê seng-oa̍h. T. K. C., Siàu-liân thoân-khè, Hiaⁿ-tī thoân-khè, Lú Soan-tō-hoē (chí-bē thoân-khè), Ha̍k-seng thoân-khè téng tī kok kai-chân teh oa̍h-tāng, chin kám-siā. Put-kò tī Ki-tok-hoà ka-têng ê kiông-hoà, ū su-iàu hu-hū tâng-sim ê "Kòng-lē" thoân-khè. In-uī pē-bú nā bô it-tì ū hó ê sìn-gióng kap léng-tō, boē thang pang-chān chú-lú ê seng-oa̍h, chiū siⁿ-chhut būn-toê chheng-liân. Iû-kî-sī tong-kim ê sî-sè siâ-o̍k, siā-hoē tō-tek hú-pāi, ka-têng hu-hū hoat-seng choē-choē būn-toê, lī-hun ê hong-khì ná lâi ná choē, hu-hū nā bô hó ê sìn-gióng, boē thang kiàn-siat Ki-tok-hoà ê ka-têng.
Chiam tuì chit hong-bīn ê su-iàu Tâi-pak Báng-kah Kàu-hoē ê Khòng-lē thoân-khè ta̍t-tit hō͘ lán thang chù-ì khoàⁿ-choê in ê oa̍h-tāng. Kai-hoē Tè Pek-hok Bo̍k-su í-ki̍p Hoē-tiúⁿ Tân Peng-êng Sian-siⁿ ê léng-tō hā, in ê Khòng-lē thoân-khè ū hoat-tián, chìn-pō͘, pèng pang chān kàu-hoē ê thoân-tō sū-kang. Só͘-í kàu-hoē chó͘-chit Khòng-lē thoân-khè sī ke̍k ū ì-gī ê sū; hō͘ hu-hū tâng-sim tī kàu-hoē uī Chú choè kang, tī ka-têng choè chú-lú ê bô͘-iūⁿ, tī siā-hoē ū hó ê kiàn-chèng. Kiat-kó ka-têng kiān-choân, kàu-hoē-iā heng-ōng. Lí khoàⁿ, chho͘-tāi kàu-hoē ū choē-choē hu-hū tâng-sim ho̍k-bū tī kàu-hoē, hō͘ kàu-hoē ê thoân-tō sū-kang chìn-tián. Kî-tiong tē it tù-hiān ê sī Pek-ki-lah kap A-ku-lah khòng-lē tī kàu-hoē oa̍h-tāng, pang-chān Pó-lô ê bo̍k-hoē thoân-tō (Hēng-toān 18:1－4; Lô-má 16:3－4).
Báng-kah Kàu-hoē ê Khòng-lē thoân-khè ū hó ê chó͘-chit, muí ge̍h ū khui uí-oân-hoē kap lē-hoē. Lē-hoē ū sî chū-chhan tī kàu-hoē, á-sī thoân-khè-oân ê ka-têng, ke-thiⁿ chhin-bo̍k, ū sî khòng-lē ha̍k-si̍p liāu-lí, put-tàn hū-jîn-lâng o̍h liāu-lí, tiōng-hu iā khah lí-kái hū-jîn-lâng liāu-lí ê sin-khó͘ thang saⁿ thé-thiap. Koh tāi-ke ha̍p-si̍p eng-ióng, tāi-ke pó-chhî kiān-khong. Muí hoê ê lē-hoē lóng ū lé-pài, chhiáⁿ bo̍k-su káng-tō á-sī chhiáⁿ kiàn-chèng. In ê thoân-khè put-tàn koan-sim ka-kī ê lêng-siu kau-poê, iā koan-sim kàu-hoē ê kok ki-koan. In ū sî chióng-lē Chú-ji̍t-o̍h kàu-oân, khui chō-tâm-hoē, hō͘ kàu-oân kap soè-kiáⁿ ê pē-bú ū liân-lo̍k, iā siông-siông uì-lô kàu-oân. Hō͘ kàu-hoē ê kàu-io̍k oē thang chìn-pō͘. Koh choè-kūn ū pang-chān kàu-hoē kiàn-tiok chi̍t keng tông-hông ha̍p-iōng ê 4 chàn kàu-io̍k-koán, thang chiông-sū Ki-tok-hoà kàu-io̍k, pēng-chhiáⁿ iā ka-kiông kàu-hoē tô͘-su í-ki̍p io̍k-lo̍k ê si-siat. In ê thoân-khè iā ū chhut khòng-lē ê te̍k-khan. ióng-sêng hoē-oân siá-chok hoat-piáu. ka-kiông hoē-oân ê liân-hê. In ê thoân-khè bo̍k-tek kap kháu-hō sī, "Hu chhiòng, hū suî, pek-liân kai-ló, tâng-sim ho̍k-sāi Chú (夫唱婦隨，百年偕老，同心服事主). Goān kok kàu-hoē heng-khí Khòng-lē thoân-khè tī kok kàu-hoē i-chiàu chit khoán ê cheng-sîn lâi ka-kiông Ki-tok-hoà ka-têng ê kiàn-siat kap heng-ōng kàu-hoē. (Nā ài chai-iáⁿ khah siông-sè ê loē-iông, ài siat Khòng-lē ê kàu-hoē, thang siá phoe sûn-būn: 台北市貴陽街二段九四號，艋舺教會伉儷團契會長陳水榮先生).
