首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 上帝所配合的
上帝所配合的
卷期：第1041期 本次： 日期：1968/11 刊名：台灣教會公報 頁數：5-7
篇名：上帝所配合的 [ Siōng-tè só͘ phoè-ha̍p ê ]
作者：鄭連坤 Tīⁿ Liân-khun
  顯示 : 漢羅 全羅 並列  

上帝所配合的

鄭連坤

1968.11.01  1041號P.5-7，14

 

前期鄭牧師有論(1)上帝創造男佮女。(2)佇創造秩序中的結婚。(2)佮(3) 閣有8款，若相對照來讀不止趣味，閣會較明瞭。

－編者－

 

(3)轉錄的詩集(轉落的詩集) (3：1－24)。

佇第二上有記載極其幸福的結婚狀態，受上帝大的祝福，但是這个幸福袂通保持久久，佇第三章就欲失去這个特權佮祝福。英國的詩人John Milton有寫一本詩集叫做「失樂園」(Paradise Lost)。今咱佇這个轉錄的詩集，也通揣出8項的問題來比較研究。

1)     婦人人家己佇園裡(3：1)。甚物原因這陣查埔人無佮伊的婦人人相佮佇咧？咱毋知彼个理由，總是上帝已經講，人單身家己蹛毋好，因為人活佇相分離，孤單的狀態，實在非常危險。佇咱的家庭中，常常也會看出這款情形。一个家庭有5个人，總是佇in的中間失去連絡，無有人格的來往，互相袂通相理解，徛佇疏外關係(疏外關係 isolited situation)，按呢這个家庭就變做5的國家的款式啦。這个事kiám毋是真通驚的事嘛？特別上帝對查埔人所講的禁令(2：16，17)袂通直接存在，變做間接的傳佇婦人人的身上。創世記第三章用這款真危險的狀態開始演奏轉錄的詩集的前奏曲。

2)     蛇佮婦人人的對話(3：1，2)。婦人人受造是欲做查埔人的幫贊，男女著保持人格關係，互相幫贊，相信賴。若是佇遮這个婦人人佮蛇講話講到津津有味。蛇起初對婦人人講話，佇彼時婦人人應該斷然來共拒絕，因為I and it毋是自然的，也毋應該保持這款的關係。佇咱的家庭中也常常發生這款事情，佇家族間袂通用人格相款待，特別佇性的關係中款待對方親像無人格的人，只有看做性慾出氣的對象。轉錄的詩集已經有無適合的雜音予咱的耳孔感覺真歹聽啦。

3)     上帝的話變質去(3：1－3)。蛇頭一句話就是講，上帝kiám有影講。佇這句話的內面，有包含真大的詭計佇咧，一面若准對婦人人表示同情佮關心，但是其實是欲予婦人人對上帝的話生起半信半疑的心。因為婦人人無直接聽上帝的禁令，所以伊咧佮蛇講話的中間，紲將上帝的話共變質去。

(a)    刪除：2：16，通隨意來食，夏娃刪除這个做重要的話。

(b)    增加：3：3，亦毋通摸。

(c)    變更：2：17食的日你的確死。夏娃變做驚了會死。

對以上三項，就知婦人人隨便將上帝的話刪除，加添，變換，按呢已經是人咧做主，上帝已經毋是絕對。

4)     人對神的信賴關係破裂 (3：4－6)。

人對上帝有絕對的信賴，按呢才是神人第一四正的關係。若是蛇的目的就是欲予人對上帝生起僥疑，通來破壞神人關係。蛇講，若食你會親像上帝，這句是人第一大的弱點，也是心底所有的願望。今婦人人看彼叢樹好食iah kah ba̍k。佇遮已經無絕對信賴的心啦，神人的關係已經破裂啦。

5)     就挽來食，紲予伊的丈夫食(3：6)。

婦人人大膽違反上帝的禁令挽果子起來食，紲予伊的丈夫食。上帝原來造婦人人的目的就是欲幫贊伊的丈夫，總是無拍算婦人人開始幫贊伊的丈夫用這款錯誤的方法。婦人人著做好的內助，若是伊這陣反轉成做內阻。夏娃這陣袂通幫贊伊的丈夫，反轉予伊的丈夫犯罪。婦人人頭一擺內助的工作紲成做幫贊丈夫犯罪，按呢kiám毋是極其矛盾的事。

6)     閃避上帝的面(3：7－11)。In已經離開上帝的話，做出違反上帝的禁令，現在in的目睭果然親像所講金起來。以前所尊敬的耶和華的聲音變做通驚惶；所以就閃覕佇園內的樹中。神人的共存關係已經破裂啦，人毋敢閣親近上帝啦。總是上帝毋甘放棄這款神人的共存的關係，所以出懇切的聲音咧叫講，你佇佗落？上帝不斷咧追揣罪人，這个就是福音的精髓。咱有罪人家庭有這號上帝的追揣，才有建設基督化家庭的可能性佇咧。

7)     責任的轉嫁(3；12，13)。婦人人若是真正的骨內的骨，肉內的肉，這時上帝咧追究責任的時，查埔人應該著好膽擔婦人人的責任才著。總是事實拄拄倒反，伊推責任轉嫁講，你所予我做伴的婦人人。按呢伊毋敢負起責任，顛倒將責任卸到上帝的身上去。婦人人嘛無欲承認，講，是蛇引誘我的。大家互相將責任推來推去，佇in中間已經無有I and yo͘的相疼相幫贊的關係啦。為著按呢，上帝講，伊欲管轄你(3：16)。In本來有平等的關係，總是對犯罪了後，上帝就予婦人人隸屬查埔人。佇神人的共存關係破裂的所在，當然人佮人的中間也無有共存的關係啦。

8)     鉼無花果葉，為家己做裙 (3：7－10)。

In兩人目睭開，才知in是褪腹裼，就開始驚惶佮見笑。對按呢in的聖的關係已經毋是神聖的關係，反轉成做見笑的記號。佇in中間的疼變做肉慾的因素的愛(eros)。上帝對in講，男的欲有勞動的痛苦佮死失的事實(3：17－19)，女的欲有生囝的痛苦佮服從丈夫的責任(3：16)。人類的結婚有時毋是樂園，反轉成做重擔，也會變做活地獄。這个就是轉錄的詩集所唱的事。

咱已經將創世記的2章佮3章若比較揣出基督教結婚的真理。總是有一項通感謝的事，第三章的轉錄的詩集猶過有一站真重要的後奏曲咧奏出上帝的祝福佮無限的希望，來成做有終之美。3：15上帝應允婦人人，婦人人的後裔欲傷蛇頭殼。這个就是咧讖語耶穌基督的來臨，所以聖經學者稱呼這節叫做做粗的福音(protoevangelism)。閣佇3：21有記載講，上帝為著彼人佮伊的某用皮做衣服，予in穿，這个也是咧暗示彼个皮衫是對羊羔得著的。對遮的記事，咱通看出上帝充滿出來的恩典(abomunding grace)。基督化家庭的希望正正佇這段後奏曲的內面。

3. 結婚的意義。

所以人欲離開伊的爸母，結聯伊的某，in就成做一體(2：24)佇這節聖句中，咱通看出結婚的兩項意義。

1)     欲離開伊的爸母。

結婚是完全獨立的兩个人格中成立的。所以青年人一定著有心，身，靈各方面的成熟(成熟 maturity)，閣會通負起本身的責任的時，才有資格通結婚。心理上，經濟上猶過著靠爸母的人，一旦結婚了後，常常會拄著真濟的困難。做爸母的人也著歡喜囝兒離開in有實在獨立的生活來經營新的家庭。

2)     兩个成做一體。

結婚一定著愛用全部的存在來結合。夫婦間的一體性(one flesh，oneness)，保羅佇以弗所5：31，32來指起基督佮教會的關係。耶穌也捌講，親像按呢無閣做兩个，是做一體。所以上帝所配合的，人毋通分開伊(馬太19：5；馬可10：6，7)。最親密的結合，閣是袂通分開的結合，就是結婚的奧妙。

基督教結婚觀猶有真濟問題應該著考慮。總是咱只有對創世紀最初的三章已經得著遮爾豐富的教示，向望上帝幫贊咱會建設美滿基督化的家庭來榮光伊的名。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461