首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 介紹儲蓄互助社
介紹儲蓄互助社
卷期：第1041期 本次： 日期：1968/11 刊名：台灣教會公報 頁數：10-14
篇名：介紹儲蓄互助社 [ Kài-siāu Thû-thiok Hō͘-chō͘-siā ]
作者：王英世 Ông Eng-sè
  顯示 : 漢羅 全羅 並列  

介紹儲蓄互助社

王英世

1968.11.01  1041號P.10-14

 

  新宣農傳年所著推行重要事工的一項，就是儲蓄互助社的設置。請王Eng-sè牧師詳細來介紹。

  主筆陳添登(Thiam-teng)牧師愛我寫淡薄關係「儲蓄互助社的內容」落佇教會公報。事實我毋是專家，因為張Hûn-gím牧師去外國深造，所以無牛駛馬來答應主筆的要求。

  普通民間咧流行的「會仔」抑是「合會」「農會」「銀行」的儲蓄，咱大家攏真熟；總是「儲蓄互助社」(以下簡稱互助社)這个運動佇台灣才有4年外的歷史，所以猶有真濟人全然攏毋捌聽見，也毋知彼个好處。常常會聽見予人倒錢，仔是講散赤人毋敢行到銀行寄錢。總是互助社是無論什麼階層的人攏會通參加；閣有健全的組織，免予人倒錢的驚惶。

  台灣頭一間佮第2間的互助社攏佇新竹市。對3年前我就開始注意這个運動，常常有機會佮天主教的人士接觸。前咱所捌的天主教是用大量的救濟物資咧吸引教友，in的教友領彌撒毋知彼个意義，掠做予人罰跪。總是這陣彼个先入趕著除掉，用新的眼光來認識in的天主教徒，這陣對互助社的推行後完全改換in的觀念，變做一个咧想欲怎樣來幫贊別人的信徒。

  佇前期 (1040號)的公報，主筆已經有寫一篇「教得推行的一項事工」予咱知影，俗語講「做事起頭難。」欲推行一項事做要緊的就是需要信心。總是咱若對彼項事無深的認識；當然就未生起信心。天主教的汪神父 (汪聰明)伊是一位社會語言學家，伊按呢講，「欲建立一个好的儲蓄互助社的祕訣，是第一教育(教育)，第二教育，第三教育。」通歡喜的就是咱總會也開始注目這个工作。三年前佇玉山神學書院為著山地開頭一擺的講習會，siāng彼年的8月佇新竹聖經書院也為著西部的山地開講習會。山地委員會為著東部山地，有設一位專任

的工作人員來推行彼个工作，現在有兩个。

  雖罔已經有成立幾若个社佮儲蓄部，總是到這陣猶袂通講真成功，通知欲佇山地來推行這个工作的困難。事實欲推行這个工作毋是遐困難，就是因為過去in一擺閣一擺予人騙去，失去信心的緣故。照我看明年是新宣農村年，咱欲鼓舞這件事是無啥物困難。要緊著愛教育予大家代先明白啥是互助社。有真濟人想講，對散赤的山胞仔是沿海的漁民，農民來談儲蓄是極愚戇的事；因為三頓都才袂飽，汰討猶會賰錢來儲蓄。設使咱若按呢想是誤會互助社真的意義。互助社毋是欲叫人將賰的錢存起來，是較愛強調著將節省的錢存起來。真濟人講無錢，事實是袂曉用錢，真濟浪費的緣故。

  今仔日佇全世界儲蓄互助社的遮爾發展成功的原因，就是因為互助社會促進節約佮會通用合理利率來借予有共同關係的人。譬喻來講，仝一个村，共一个教會，公司，工廠的一群的人大家同意共同節省 in的金錢，並用低的利息彼此代管，又社員選出的理事會來控制互助社的政策。遮个代先發起組織家己互助社的人代先的確著參加大約20課的教育。以後若有人願意加入，也的確著經過告別仔是集體的教育，才會通准伊做正式的社員。普通猶未正式成立的，叫做「儲蓄部」，In通一面教育一面獎勵准社員儲蓄；總是猶袂用得辨理貸款。著愛選臨時的主席佮司庫佮幾个委員。照我所知這陣佇全省各地攏有成立區會，若是咱教會有意思愛推行這个工作，咱通連絡各區會，仔是台北的總會。總會的住址是臺北市中正路645巷2弄4號之2 中國互助運動協會。

  怎樣組織互助社。頭一項至少著幾个人才會用得。普通是50到100的中間。有的開始的時只有30左右，要緊是漸漸著愛發展。總是彼中間只有7名聯名申請就會通登記。每一位社員著納入社費佮股金的一部分。入社費佮股金的數量是由每一个互助社家己決定。若是咱台灣這陣一股的股金攏是50箍。新加入的社員一定著經過理事會的同意，才正式成做社員。只有社員才會通向社借款佮存款。無論佗一个社員，伊攏會通無限制存伊的錢，彼个成做伊的股金。總是驚了傷濟，間接tek會去控制整个互助社的政策，所以有規定一个人儲蓄袂用得超過全體股金的百分之20。普通的企業股份若較濟，投票權著較濟，所以要緊的地位攏是予in佔去。若是互助社佇年會仔是特別會議中，每人的投票權無受存款濟少的影響。每一个社員只有一票的權利若定。也in的儲蓄是用股份的形式存佇社內，無需要將in的股份做一擺存入去，每禮拜將所節省起來的錢，存入去到達到伊的股份滿為止。這若親像一種的投資，所以除了伊欲退社以外，絕對袂用得領出，總是會通申請貸款。

  我佇前有講，若欲予這个工作成功著教育，所以毋是毋是喝講欲成立，就隨時會得成立，有意思欲參加的人，經常著聚會相佮研究討論，經過4抑是6个月的每週討論。發起這个全體的主席通建議團員申請登記。也這个申請，著7个以上的發起人簽名，同時也著送一份的互助社的章程。這个章程通對台北的協會來討模範章程，來擬新社的章程。經過4个月教育了，通舉行一擺的準備大會，佇會中將儲蓄互助社的目的佮方法向大家解釋，了後才分發入社申請單。這擺的會議後，無偌久就通舉行成立大會，登記社員佮選舉九名的理事，理事中才閣選出一名做理事主席，一名司庫，一名秘書。後來才閣對其餘的 6名理事中選出3人的，佮3人的貸款委員會。

  理事會才閣對社員中指派3人成立教育委員會。互助社的內部行政是對一套的章程來規定。理事會負責規定貸款的利率，普通是月息100分之一。理事會也規定每年社員照所買的股份偌濟會通得著偌濟的股息，股息普通是100分之5。設使分配股息猶有賰錢，通將遐的做欲支持全體社員公共福利事業的經費。理事會至少每月日著開會一擺，開會的目的是為著欲解決隨時發生的問題，檢討前月份的成績(親像審查司庫每月所做的財務報告)，紲計畫種種工作。

  理事主席主持理事會議佮社員大會。也向全體社員提出理事會的年度報告。司庫負責款項的保管，記賬佮準備財務報告以及各種的統計。秘書負責會議記錄。鑑察委員會監督會務，查數佮提出年度報告。

  貸款委員的任務是處理社員的貸款申請佮協助借款者計畫還錢的方法。所有委員佮理事攏是義務服務，無領報酬佮辛金。總是司庫抑是業務的實際需要愛專職的職員的時，不在此限。這个為人服務的精神，是對耶穌的教示「予人的比提的較有福氣」來的。互助社的全部款項攏著開予存佇理事會所指定的銀行。當某一个社員需要借款的時，普通是先將家己的情形共司庫講。司庫才將伊的申請事類轉予貸款委員會批准。申請書的頂面的確著說明借款的用途，錢額若較濟著提出抵押。申請貸款的理由普通是還債，為子女教育費，修理厝，衣服費，結婚買衫，買生產工具，買機車，家具，付稅金等。貸款委員會照需要的次序集會，接受社員貸款的申請。

  當一位社員貸款的時，伊的品格比伊所會通提出的財產抵押閣較受重視。

  另外一个委員會，就是教育委員會，起頭是由理事會對理事以外的社員中選派，以後是由社員選舉來產生。伊的任務是予社員對儲蓄互助運動得著欲達到這个目的，教育委員會著組織小組討論會來研究社員的實際問題，也用宣傳的小冊，電影，幻燈，講習班等的機會來做種種的宣傳工作。咱知欲引chhoā一个人歸主是無容易的工作，著愛有熱誠，肯負責，gâu吞忍，面皮kek較厚，綿爛行，有智慧，gâu用婉轉的話來說服對方。儲蓄互助社的開始，需要有一款親像一个好的個人佈道者的精神人來做教育委員，利用歇睏，暗時，有時佮別人，有時家己一个去訪問勸誘猶袂加入的人。

以上我有將互助社的組織的辦法佮內容的大概介紹予咱知影，最後我愛補充幾項問題，加添咱對這項事工的信心。

1)     這个運動對無經驗，教育程度真kē的人有法度通推行無？

  會，無論啥物款階層的人，若肯接受訓練。非洲的尼畿利亞加納甚至斐濟群島，薩摩亞也家己組織欲倚300个互助社。菲律賓一个成功的互助社有4萬菲幣的資產，伊的主席是三輪車伕。

2)     司庫若惡意倒社的錢，仔是佇路裡予人搶去欲按怎？

  毋通驚這个事。普通司庫的身邊袂用得下真濟的錢，現今著愛存佇銀行，欲領錢出來著愛有三粒印。毋但按呢，若登記有案的互助社，司庫著愛掛保險；現在咱台灣是向中央信託局保險，付一屑仔的保險金會通保障款項的安全。

3)     向互助社借款欲怎樣還？

  會通分期還。每次欲還偌濟是社員佮貸款委員會參詳決定的。做普通的辦法是按月分期來還。

4)     互助社佮銀行有啥物精差？

  銀行有規定的時間，閣借錢著相當的保證，總是互助社無論日暝，任何期間會通設法借你錢，閣毋免麻煩的貸款手序。

5)     這个人siāng濟會通借到偌濟錢？

  普通一千箍以下是會通借到彼人的存款的一倍半。為著欲防止借款者意外的死亡無法度通還，每年著愛對賰的錢抽淡薄做公積金。

  列位親愛的兄姊，為著欲配合明年新宣農村年，為著欲消除散赤無經濟能力的人的自卑感；養成自信心佮團結的精神，我也對心底愛喝喊咱大家，支持主筆所提議鼓舞中會成立「儲蓄互助社推行委員會」的案。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461