JI̍T KI TĒ 15 KÀI CHÓNG-HOĒ KOAN-KÁM
CHIONG BŌ͘-SÊNG
1968.11.15 1042 hō P.13-14
Chóng-kàn-sū Chiong Bō͘-sêng Bo̍k-su siū phài khì hù Ji̍t-pún Ki-tok Kàu-thoân tē 15 kài chóng-hoē. Te̍k-pia̍t chhiáⁿ i siá chit phiⁿ ê koan-kám. Loē-iông ū choē-choē só͘-chāi put-chí thang hō͘ lán ha̍k-si̍p. (Phian-chiá).
Hōng Chóng-hoē Siông-tì Uí-oân-hoē ê kau-tāi, goá tī 10 ge̍h 19 ji̍t chhut-hoat khì Tang-kiaⁿ chham-ka Ji̍t-pún Ki-tok Kàu-thoân tē 15 kài CHóng-hoē, chū-chi̍p tī Tang-kiaⁿ Hù-sū-kiàn-teng Kàu-hoē. Ji̍t Ki Chóng-hoē chhòng-li̍p í-lài, tû tē 4 kài chū-chi̍p tī Kiaⁿ-to͘, tē 13 kài tī Chheng-san Ha̍k-īⁿ, tē 14 kài tī Tāi-pán í-goā, lóng sī chū-chi̍p tī chit keng lé-pài-tn̂g. Chit keng kàu-hoē ū chi̍t uī lán Tâi-oân Ki-tok Tiúⁿ-ló -Kàu-hoē chhut-sin ê Má Tiau-bō͘ Phok-sū choè tiúⁿ-ló. Má Tiúⁿ-ló siāng-sî iā sī lán tī Tang-kiaⁿ ê Tâi-oân Ki-tok Tiúⁿ-ló Kàu-hoē ê tiúⁿ-ló, chiū-sī Lâu Chín-hong Bo̍k-su kap Chhoà It-sìn Bo̍k-su ê kàu-hoē ê tiúⁿ-ló.
Ji̍t Ki Kàu-thoân Chóng-hoē sī nn̄g nî khui chi̍t pái. Gī-tiúⁿ, hù gī-tiúⁿ, su-kì lóng thang liân soán liân-jīm. Chit pái chiū-sī lóng-chóng liân soán liân-jīm. Gī-tiúⁿ sī 鈴木正久 Bo̍k-su, hù gī-tiúⁿ sī 飯清 Bo̍k-su, sù-kì sī 木村知己 Bo̍k-su. Í-chêng kiò-choè Chóng-bū kio̍k-tiúⁿ, taⁿ in-uī ki-kò͘ kái-chèng, oāⁿ choè Chóng-kàn-sū. Sin-jīm ê Chóng-kàn-sū sī 高倉徹 Bo̍k-su. In ū su-kì chi̍t lâng, í-goā koh tuì gī-tiúⁿ chí-miâ, chhiáⁿ 6 ê gī-oân lâi tam-tng choè pó͘-chō͘ su-kì ê kang. Chit 6 ê pó͘-chō͘ su-kì sī teh hū-chek muí tn̂g siá gī-sū-lio̍k ê kang. Hù gī-tiúⁿ kap su-kì tī khui-hoē tiong lóng kap gī-tiúⁿ put-sî chē tī tâi-téng teh pang-chān gī-tiúⁿ chú-chhî hoē-gī.
Chit pái chiàⁿ gī-oân 400 miâ, chham-gī-oân 40. Lâi-pin ū chha-put-to 20 miâ. Gī-oân lóng ū i ê hō-bé. Gī-oân beh hoat-giân ê sî lóng tio̍h tuì gī-tiúⁿ kóng ka-kī ê hō-bé, jiân-āu chiah kóng-oē. Muí tn̂g beh ji̍p gī-tiûⁿ ê sî, gī-oân lóng tī hoē-tiûⁿ ji̍p-kháu pò-miâ, kàu beh khai-sí sio̍k-gī ê sî, hiah ê siū-hù ê lâng tio̍h chiong chit tn̂g ê chhut-se̍k sò͘ pò gī-tiúⁿ chai-iáⁿ. án-ni m̄-bián koh tiàm gī-tiûⁿ teh tiám-miâ á-sī sǹg lâng-sò͘, oē thang chiat-séng chin-choē sî-kan.
Khui-hoē tiong ū siat-tì 7 ê te̍k-pia̍t uí-oân-hoē. 1) Gī-àn chéng-lí uí-oân-hoē (5 miâ). 2) Pò-kò sím-cha uí-oân-hoē (15 miâ). 3) Châi-bū sím-cha uí-oân-hoē (15 miâ). 4) Kiàn-gī chhéng-goān sím-cha uí-oân-hoē (10 miâ). 5) Gī-sū ūn-êng uí-oân-hoē (5 miâ). 6) Chhoan-hêng uí-oân-hoē 10 miâ). 7) Phō͘-chheh kiám-cha uí-oân-hoē (15 miâ).
Muí-ji̍t ê gī-sū tāi-khài téng-po͘ sī khui choân-thé gī-oân hoē-gī. Ē-po͘ sî kap àm-sî sī khui Hun-kho-hoē. Ū 4 ê Hun-kho-hoē. Tē it Hun-kho-hoē hū-tam koan-hē thoân-tō, kàu-io̍k, siā-hoē, hoē-tn̂g kiàn-tiok ê gī-àn kap pò-kò.
Tē jī Hun-kho-hoē hū-tam koan-hē sìn-gióng chit-chè, Sîn-ha̍k-īⁿ būn-toê, kàu-su kiám-tēng, soan-kàu gián-kiù-só͘ ê gī-àn kap pò-kò.
Tē saⁿ Hun-kho-hoē hū-tam koan-hē chóng-bū it-poaⁿ, hoat-kui piàn-keng, sè-kài soan-kàu, jîn-sū, chàn-bí-koa, chhut-pán koan-hē ê gī-àn kap pò-kò.
Tē 4 Hun-kho-hoē hū-tam koan-hē châi-bū ê gī-àn kap pò-kò.
Hun-kho-hoē ê gī-koat tio̍h the̍h lâi choânthé hoē-gī pò-kò chiah choè choè-āu ê koat-gī. Goá ū kám-kak, chit khoán choè-hoat sī chin chiat-séng sî-kan. Chóng-sī iā ū chin toā ê guî-hiám sèng, chiū-sī só͘ thong-kè ê gī-àn ū sî tāi-ke kàu thong-kè liáu, óng-óng oē hoat-seng sim-koaⁿ ê put-an, tì-kàu chó͘-tòng tuì gī-koat chip-hêng-siōng ê sìn-sim.
Chit kài ê hoē-gī ū 4 ê gī-àn pí-kàu khah iàu-kín. (1) Chiap-la̍p tī kū-nî Lêng-bo̍k gī-tiúⁿ só͘ hoat-piáu ê tuì tē jī chhù sè-kài tāi-chiàn ê chhàm-hoé bûn-kò. Chit hāng thang piáu-hiān Ji̍t-pún ê Ki-tok-tô͘ ê liông-sim kap thiàⁿ-sim. Tng-sî boē thang chīn choè Ki-tok-tô͘ ê pún-hūn lâi hō͘ chit ê put-hēng ê chiàn-cheng tit-tio̍h tú-hó ê kái-koat, in kám-kak chin chhàm-khuì. (2) Ki-kò͘ ê kái-chèng. Ji̍t Ki Kàu-thoân ū 130 goā ê uí-oân-hoē. Taⁿ uī-tio̍h beh chiat-séng jîn-le̍k, bu̍t-le̍k, châi-le̍k khí-kiàn, ū koat-tēng siu-chèng ki-kò͘. Kái choè 5 ê ki-koan.
1) Sím-cha ki-koan. 2) Gī koat ki-koan. 3) Gia̍p-bū ki-koan. 4) Chip-hêng ki-koan. 5) Gián-kiù ki-koan. Í-siōng muí chi̍t ê ki-koan ê lāi-bīn lóng ū chi̍t ê chì saⁿ ê uí-oân-hoē nā-tiāⁿ. Kái(kài?) chin kán-tan.
(3) Okinawa Kàu-khu ê ha̍p-tông. Hiān-chāi ū 15 kàu-khu. Taⁿ thong-kè beh kap Okinwa Kàu-thoân ha̍p-tông, chiâⁿ-choè 16 kàu-khu.
(4) Ū-tēng tī 1970 nî, tī Tāi-pán kú-hêng Bān-kok phok-lám-hoē, hit sî Ji̍t Ki Kàu-thoân beh kap Ji̍t-pún Ki-tok-kàu Hia̍p-chìn-hoē saⁿ-kap khí chi̍t keng "Ki-tok-kàu koán." Hit ê huì-iōng ū-soàn beh tê 100,000,000.00 Ji̍t-pè. uī-tio̍h beh lī-iōng chit ê ki-hoē lâi thoân hok-im, in bô sioh chiah-nih choē ê chîⁿ.
Sūn-piān kóng kuí-hāng kâm-sióng: (1) Ji̍t Ki Kàu-thoân Chóng-hoē ê chhiú-chheh thiaⁿ kóng tī khui-hoē ê nn̄g ge̍h ji̍t chêng chu-liāu chiū lóng chū-chi̍p hó-sè. Lán Tâi-oân Chóng-hoē beh ìn chhiú-chheh, siông-siông kàu khui-hoē chêng 10 ji̍t iáu teh thó pò-kò kap gī-àn. Tì-kàu ìn chhiú-chheh lóng tio̍h kàu khui-hoē hit ji̍t chiah ìn hó. Só͘-í kin-nî te̍k-pia̍t ǹg-bāng kok Tiong-hoē ê Chhun-kuì hoē-gī tio̍h tī 1 ge̍h 10 ji̍t í-chêng lóng- khui liáu. Siōng bān 1 ge̍h 15 ji̍t í-chêng chiong gī-àn sàng hō͘ Chóng-hoē sū-bū-só͘, ǹg-bāng án-ni chiah ìn oē hù.
(2) Ji̍t Ki Kàu-thoân Chóng-hoē ê gī-oân khui-hoē ê sî-kan chin chún-sî. Sî-kan kàu ê sî iā bô iô cheng, iā bô tāi-seng gîm chi̍t siú si. Gī-tiúⁿ khoàⁿ sî-kan kàu, suî-sî mn̄g su-kì khoàⁿ pò-tò ê gī-oân joā-choē, nā ū chhiau-kè poàn-sò͘, suî-sî chhiáⁿ chi̍t uī gī-oân kî-tó khui-hoē. Chi̍t tn̂g ê khui-hoē sī chi̍t-po͘ sio-liân-soà, lóng bô tiong-kan chiām thêng 10 hun cheng. Só͘-í tia̍t-sū chin hó. Gī-sū ūn-êng Uí-oân-hoē chin gâu pang-chān gī-tiúⁿ siat-hoat, hō͘ gī-sū boē thoa-iân sî-kan.
(3) Gī-tiûⁿ ê siat-pī chin chiu-chì. Chiū-sī Tang-kiaⁿ kàu-khu ê Hiaⁿ-tī thoân-khè kap Hū-lú Soan-tō-hoē ê chí-bē chhut-thâu chiau-thāi. iā ū Chheng-liân thoân-khè ê hoē-oân hoaⁿ-hí pang-chān teh chiong microphone the̍h kàu muí chi̍t ê peh khí-lâi kóng-oē ê gī-oân ê só͘-chāi. iā siat kià mi̍h-kiāⁿ ê só͘-chāi, hō͘ gī-oân m̄-bián toà chin-choē mi̍h.
Goá kám-kak in ê kàu-hoē sī teh oa̍h-tāng ê kàu-hoē, tuì choē-choē hong-bīn kham-tit choè lán ê bô͘-hoān.
