JI̍T-PÚN TOÂN-TŌ-KÌ
Tīⁿ Liân-khun
1968.11.15 1042 hō P.21-22
Pún Chóng-hoē Hái-goā Soàn-tō-hoē, thâu chi̍t-pái phài 5 ê Bo̍k-su khì Ji̍t-pún poê-lêng pò͘-tō. Tit-tio̍h jia̍t-la̍t ê hoan-gêng; kiàn-li̍p Hoâ Ji̍t lióng-kok kàu-hoē ê chìn-pō͘ chhin-siān koan-hē. I-chiàu Hái Soan ê iàu-kiû, chhiáⁿ Tīⁿ Bo̍k-su lâi siá khì Ji̍t-pún pò͘-tō ê keng-kè, chò Hái Soan ê kang-chok pò-kò. (Phian-chiá)
Chit-chūn chiap-tio̍h Chú-pit sian-siⁿ ê bēng-lēng kiò goá tio̍h kín siá pò-kò thang chhut tī Kong-pò. Goá lia̍h-choè goán chit-thoân ê thoân-tiúⁿ N̂g Ka-sēng Bo̍k-su oē siá, chóng-sī kàu chit-chūn lóng bô khoàⁿ-tio̍h pò-kò. In-uī siū bēng-lēng m̄-káⁿ the-sî, koh kiaⁿ-liáu sî-kan keng-kè siuⁿ kú oē sit-khì hit ê ì-gī. Só͘-í hó-táⁿ kín lâi siá kuí-jī kiong-kèng hiòng choân Tâi ê chu-uī hiaⁿ-chí pò-kò.
1) Bo̍k-tek－1967 nî 10 ge̍h Ji̍t-pún Kàu-thoân ū chèng-sek thâu chi̍t-pái phài 7 uī bo̍k-su lâi Tâi-oân thoân-tō, siū lán kok kàu-hoē ê hó khoán-thāi. Taⁿ chiàu tong-sî ê iok-sok, lán iā tio̍h phài lâng khì kau-oāⁿ thoân-tō.
2) Siū-phài ê lâng－keng-kè Hái-goā Soan-tō-hoē khui-hoē, N̂g Ka-sēng, Tân Lân-kî, Keh Tong-êng, Keh Tong-hui, Tīⁿ Liân-khun 5 uī bo̍k-su siū soán-phài.
3) Kî-kan－1968 nî 7 ge̍h 1 ji̍t Keh Tong-êng, Keh Tong-hui, Tīⁿ Liân-khun 3 ê seng chhut-hoat, hit àm tī Tang-kiaⁿ Meguro siū Kàu-thoân Chóng-hoē Gī-tiúⁿ í-hā Thoân-tō Uí-oân-tiúⁿ, Thoân-tō Chóng Chú-sū téng 10 lâng ê hoan-gêng-hoē, 7 ge̍h 2-5 ji̍t khì Hachioji chham-ka Kàu-thoân ê tē 19 kài Hā-kuì kàu-su Káng-si̍p-hoē. In ê chú-tê kiò-choè kàu-hoè chè-tō͘ ê khak-li̍p, kok kàu-khu phài 2 miâ tāi-piâu, só͘-í chèng-sek hoē-oân 30 miâ. Hit ê hoē put-chí chhù-bī koh chin ū lāi-iông.
7 ge̍h 5 ji̍t poàⁿ-mî N̂g Ka-sēng Bo̍k-su kàu-uī. 7 ge̍h 6 ji̍t khí chhut-hoat kok lâng choè 10 ji̍t kú ê tē-it chhù thoân-tō. Só͘ siū-phài ê kàu-khu: N̂g Ka-sēng－Tang-kiaⁿ Kàu-khu. Keh Tong-êng－Pak-hái Kàu-khu kap Sîn-ná-chhoan (Kanagawa) Kàu-khu. Keh Tong-hui, Tiⁿ Liân-khun－Kiaⁿ-to͘, Tāi-pán, Peng-khò͘ 3 Kàu-khu. 7 ge̍h 17 ji̍t tī Kàu-thoân Sū-bū-só͘ khui Tiong-kan Pò-kò-hoē, 18 ji̍t koh chhut-hoat khì choè tē jī chhù thoân-tō. N̂g Ka-sēng, Keh-Tong-êng－Tang-pak Kàu-khu. Keh Tong-hui－Ô͘-ú Kàu-khu. Tīⁿ Liân-khun－koan-tong Kàu-khu. 29 ji̍t koh lóng tńg-lâi Tang-kiaⁿ. 30 ji̍t koh chhut-hoat khì Hù-sū soaⁿ kha ê Tong-san-chng chham-ka Kàu-thoân tē-it chhù ê Sìn-tô͘ Ha̍k-hāu, kàu 8 ge̍h 1 ji̍t tńg-lâi Tang-kiaⁿ. 8 ge̍h 2 ji̍t tī Kàu-thoân Sū-bū-só͘ khui sēng-tāi ê kám-siā-hoē kiam pò-kò-hoē, siāng-sî kú-hêng kái-thoân-sek. án-ni tú-tú chi̍t ge̍h ji̍t khah ke ê kang-chok kiat-sok.
Tân Lân-kî Bo̍k-su uī-tio̍h chhiú-sio̍k ê koan-hē kàu 8 ge̍h 5 ji̍t chiah kàu Tang-kiaⁿ, chiū chiàu chêng ê kè-e̍k khì Pak-hái-tō Kàu-khu choè-kang.
4) Kiat-kó－Tuì Ji̍t-pún Kàu-thoân khoàⁿ, chit ê sī thâu chi̍t-pái Tâi-oân Kàu-hoē phài lâng chìn-ji̍p in ê kàu-hoē choè-kang, só͘-í tāi-ke chin hoaⁿ-hí, Koh hit ê kiat-kó chin hó, in-uī Ji̍t-pún tú-tú 1967 nî hoat-chhut tuì Tē 2 chhù Sè-kài tāi-chiàn-cheng chek-jīm kò-pe̍h āu, ū chia̍p-tio̍h lán ji̍p-khì kàu chin chng-kha ê kàu-hoē khì mn̄g-an soan-iông hok-im, tuì án-ni ke-thiⁿ lióng-kok kan tī Chú lāi ê chhin-bi̍t ê kau-poê.
1967 nî, lâi Tâi-oân thoân-to hit 7 uī Bo̍k-su ū siá chi̍t-pún chin siông-sè ê pò-kò-su, ǹg-bāng lán Tâi-oân kàu-hoē ū iân-kò͘ ê tan-uī kap sìn-tô͘ lâi boé hit-pún chheh, tek-khak oē tit-tio̍h chin toā ê lī-ek.
Goá siong-sìn khì choè-kang ê kok-uī bo̍k-sū ū koh-khah siông-sè ê pò-kò kap kám-sióng chiah tio̍h, goá chí-ū ēng chit ê khài-iàu pò hō͘ tāi-ke chai, soà chhim-chhim kám-siā tāi-ke ê tāi-tó kap koan-sim.
