首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 聖母馬利亞
聖母馬利亞
卷期：第1043、1044期合刊 本次： 日期：1968/12 刊名：台灣教會公報 頁數：4-6
篇名：聖母馬利亞 [ Sèng-búMá-lī-a ]
作者：鄭連坤 Tīⁿ Liân-khun
  顯示 : 漢羅 全羅 並列  

聖母馬利亞

鄭連坤

1968.12.01  1043-1044合刊號P.4-6

 

一年一厝通歡喜的聖誕節已經到啦。大家相佮來慶祝普天同慶的歡喜。特別感謝過去大家的愛顧佮代禱，今佇遮最後一厝來相佮學習上帝的話。最近我咧整理舊的資料的時，有揣著1961年的聖誕節佇加拿大Toronto市的中國人教會講道原稿，我看了生出濟濟的回憶佮思念。我有將彼篇整理做講解的樣式來佮咱相佮得著勉勵。閣通做我對心底所有慶祝聖誕的祝賀獻予各位兄姊。

1)     在室女馬利亞(路加1：26-38)

天使Ka-pek-lia̍t奉差來到拿撒勒揣馬利亞，欲將上帝所交代的好消息報伊知。就是彌賽亞欲對伊出世。彌賽亞就是以色列百姓代代所咧待望的救主。佇以賽亞7：14節讖語講，「有在室女欲懷孕生囝，共伊號名叫以馬內利，」閣佇9：6節講，「因為有一个嬰仔為咱來出世，有一个囝賞賜咱。」特別國家受人thún踏的時，百姓閣較迫切欣慕這个救主的出現。對彼霎起人人攏咧期待，特別啥物人欲受揀選來成做這个救主的老母？甚物人欲得著遮爾大的榮光？通講這个是眾猶太的查某囡仔所大關心的。到底著有啥物款的條件才會通受揀選nih？上帝欲選出一个女子成做彌賽亞的老母一定有伊的標準佮條件才著。今馬利亞受選，一定是有適合彼个標準佮條件。天使對馬利亞講，得著大恩的人ah (1：28)，因為你得著上帝的恩典(1：30)。嚴格來講，上帝咧揀人毋是靠人的啥物好處，完全是對恩典(I哥林多 1：26－29。主佮你佇咧(1：28)，就是上帝恩典的表現。雖然是按呢講，猶過咱相信馬利亞會受揀選，的確有伊真好的表現才著。咱通看出以下的三點：

(A)   內省性(內省性，introspective) (1：29)。

  「馬利亞不止gông-gia̍h伊的話，想這个請安是啥物意思」(1：29)。有時婦人人為著較濟會來失敗，佇家庭為著厚話來失敗，佇家庭為著厚話惹起濟濟的麻煩。若是馬利亞是一位講話少，閣常常佇內面咧反省，省察的人，對這款內省通進入佇祈禱的生活。聖經真濟擺報咱知馬利亞就是這款的人。當牧者來拜嬰仔耶穌的的時，「獨獨馬利亞將遮的會記牢牢，心內咧想」(2：9)。閣耶穌12歲的時佇耶路撒冷的聖殿揣著的時，馬利亞也是按呢。「伊的老母將遮的會攏記佇啥物」(2：51)。

(B)   服從上帝的旨意(1：38)。

  「馬利亞講，我是主的女婢；願照你的話應驗」(1：38)。天使所報伊知的內容，就是馬利亞欲成做一个袂出嫁就欲生囝(unmarried mother)。這个事是偌爾通見笑的事，照tn̂g時猶太社會這款婦人人著用石頭tìm死。對家庭來講是極其失落面子(面子，loosing face)的事，對伊的未婚夫來講是極大的失望佮見笑事。這个事實在對袂出嫁的一个可憐的在室女是過頭重的十字架啦。(「閣你家己的心也欲有劍鑿透過」路加2：35)。總是馬利亞佇遮已經有真大的決意，一切的榮光著歸予上帝，若是一切的見笑攏歸伊家己。雖然是一項極其見笑，失落面子的事，毋過為著上帝，伊情願失落一切，甚至性命的危險伊也歡喜忍受。伊對天使應答這句話的時，就是已經做這款偉大的決心。實在通講是極其偉大的服從，也是偉大的覺悟。欲成做彌賽亞的老母有影是非常大的榮光，總是咱著知閣一面有這號困難忍受的重擔佇咧。有人講無十字架的所在無榮光的冕旒(No cross，no crown)，實在是有影。馬利亞歡喜為著上帝犧牲一生一切，來服從上帝的旨意。

(C)   信心(1：37)。

雖然馬利亞對天使質問，「我袂有嫁人，怎樣欲有這个事？」(1：14)。總是天使對馬利亞講，「因為上帝所講的話，無一句無力」(1：37)。馬利亞就照這个會深深確信上帝的全能。

在室女欲生囝，死人欲閣活，佇聖經內實在有真濟這款無隨便通相信的事，毋過咱著學馬利亞的款式，用信心來接受，因為伊是對無創造有的上帝，咱著閣一擺來聽天使所講的話，「因為上帝所講的話，無一句無力，」紲相佮好膽講，「是。A-bēng。」

2)     約瑟的某馬利亞(馬太1：18－24)。

猶太人的社會有真濟項佮咱中國相像的風俗，特別對結婚來講，出嫁拄拄照彼个字的款(嫁)，婦人人是嫁予對方的家庭。路加1：27節講，「這个在室女，是已經配定著予Tāi-pit家的一人，名叫約瑟。」總是最重要的是一个男佮一个女得著上帝的安排來結婚成家，佇彼中間男女互相相尊重對方的人格，相培養愛情。結婚的確著建立佇這款男女健全的人格的頂面，用相信賴佮相疼來相佮蹛。今這時對約瑟來講，有一項大問題啦，就是伊的未婚妻猶袂娶嫁門已經有身孕(馬太1：18)。這時約瑟著怎樣做ni̍h？馬太1：19節講，「伊的丈夫約瑟是義的人，毋愛顯然pan伊，按算欲暗靜廢親。」約瑟這時的im-kéng的確非常的複雜。去予所信賴的人受背叛的失望佮受氣，欲照摩西的律法來辦伊，毋過伊疼這个婦人人，毋敢按呢做。總是毋願來妥協.今應該著怎樣做？佇伊的心內的確有真大的鬥爭，的確為著這个事袂食袂睏得。拄拄佇這款情形的時，天使佇伊的眠夢中出現對伊說明(馬太1：20－23)。今佇這層事，咱也通看出約瑟猶原是有以下三項特色的人。

(A)   內省性(馬太1：20)。

  「咧想的時，」這句拄拄佮馬利亞相像，通知約瑟也是一位無隨便講話，無隨便做事的人。將問題囥佇家己的心內來家己反省對上帝祈禱。

(B)   服從上帝的旨意(馬太1：24)。

  「約瑟睏醒起來，照主的天使所命令的去行，娶伊的某過門。」伊雖然知，做這个事一定會予人批評，的確濟濟人欲講伊的尻脊後會總是約瑟猶原掠做榮光著歸予上帝，一切的見笑歸佇家己，來服從上帝的旨意。

(C)   信心(馬太1：25)。

  「無佮伊同房到伊生囝；就叫伊的名做耶穌」(馬太1：25)。佇這句聖經的話的內面，咱通看出約瑟的信心，因為伊歡喜照天使所吩咐的號名，閣毋敢用肉慾做中心，無佮伊同房到生囝為止。

馬利亞佇這款情形中，毋知偌爾艱苦心，總是in兩人的夫婦關係建立佇上帝的話的頂面，所以通講互相佮上帝的關係來決斷in的態度。純潔的在室女馬利亞，佇這時也一位真好的內助。

3)     耶穌的老母馬利亞(路加2：41－51；約翰2：1－11)。

耶穌12歲的時佮爸母去耶路撒冷守節所發生的事，佇彼時馬利亞對耶穌講，「囝啊，你啥事按呢款待阮？你看，你的爸佮我傷心揣你。」若是耶穌所應答的in袂曉彼个意思，猶過馬利亞將遮的會記佇心裡。閣佇橄欖婚姻筵席的時，馬利亞對耶穌講，「In無酒啦。」雖然耶穌對伊的應答無照伊的心所愛，猶過馬利亞對遮的差用的人講，「凡若伊共恁講的，恁著行伊。」按呢咱通看出馬利亞對耶穌的信賴佮期待，若是普通爸母檢采佇這款情形只有欲責備囝兒的不孝佮無聽會；若是馬利亞對伊的囝兒的信賴佮理解是非常的。佇遮咱通看出爸母佮囝兒 的關係有實在建立佇互相相信賴佮理解的頂面。特別到耶穌受釘十字架的時，伊怎樣交代老母予所疼的學生，閣將老母交予約翰通來奉承伊。佇遮有顯明孝子耶穌佮做一个賢妻良母的馬利亞的實在的像佇咧。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461