Kang Hiok Tiúⁿ-ló Pia̍t-sè
1968.12.01 1043-1044 ha̍p khan hō P.29
Pún-siā Siā-tiúⁿ So͘ Thian-bêng Bo̍k-su ê lêng-chun Kang Hio̍k Tiúⁿ-ló tī 11 ge̍h 23 hō tī Ko-hiông pia̍t-sè; 28 ji̍t hā-ngō͘ chi̍t tiám tī Sin-heng Kàu-hoē kú-hêng kò-pia̍t lé-pài, hióng-siū 90 hè.
Kò͘ Kang Hio̍k Tiúⁿ-ló chhut-sì tī Muî-san hiong. I ê lāu-pē goân-lâi teh boē hiuⁿ-chek, sìn Chú liáu-āu kái-gia̍p. Kò͘-jîn iā tè lāu-pē sìn Chú. 1897 nî kap So͘ Tuì Lú-sū kiat-hun, ū siⁿ 7 lâm 4 lú. 1912 nî soá-khì Sin-káng-hiong Nâ-á-chhù keng-lông, ti̍t-kàu 1966 nî sin-thé soe-jio̍k chiah khì toà tī Ko-hiông So͘ Bo̍k-su ê só͘-chāi.
Kò͘-jîn soè-hàn chiū chin sàn-chhiah, chin khûn-khiām. Thiaⁿ Chú sim-jia̍t, tī 1896 nî 3 ge̍h 29 ji̍t siū Soan-kàu-su Sòng Tiong-kian Bo̍k-su kiâⁿ soé-lé, ka-ji̍p kàu-hoē, pó-siú sì-chiàⁿ ê sìn-gióng. Sui-jiân siông-siông in-uī sìn-gióng ê iân-kò͘ ū tú-tio̍h toē-hng ê lô͘-moâ kap thó͘-huí pek-hāi, chóng-sī i it-hoat jia̍t-sim. Saⁿ-kap chhòng-siat Sin-káng kap Pak-káng nn̄g keng kàu-hoē, kàu tī lé-pài-tn̂g lo̍k-sêng liáu-āu, iáu-kú put-sî teh koan-sim kàu-hoē ê hoat-tián.
Kò͘-jîn chāi-sè jia̍t-sim kèng-pài Siōng-tè, gâu thiàⁿ le̍k-jīm ê thoân-kàu-chiá, koh chin gâu thiàⁿ chhù-piⁿ, só͘-í chiàu Sèng-keng só͘ èng-ún, i ê ka-cho̍k ū tit-tio̍h Siōng-tè toā-toā ê sù-hok. Kiáⁿ-sun tiong tit-tio̍h Sîn-ha̍k, Im-ga̍k, Kàu-io̍k kap Gú-giân ha̍k se̍k-sū ha̍k-uī ê 4 miâ, tit-tio̍h Bûn-ha̍k, Hoat-ha̍k, Siong-ha̍k, Kang-ha̍k, Sîn-ha̍k kap I-ha̍k ha̍k-sū ha̍k-uī ê ū 12 miâ. Hiān-chāi tī tāi-choan teh tha̍k-chheh ū 7 miâ. Í-goā hiān-chāi teh choè bo̍k-su ê ū 4 miâ, thoân-tō-su 3 miâ, i-su 2 miâ, kiàn-tio̍k-su chi̍t miâ. Tī kàu-io̍k-kài teh ho̍k-bū ê ū 10 miâ. Koh ū Hù-chìn kap Hēng-chìn nn̄g keng ìn-soat-só͘. Kiáⁿ-sun tiong hiān-chāi tam-jīm kàu-hoē kong-chit ê, tiúⁿ-ló ū 9 miâ, chip-sū 7 miâ.
