Sè-kài kap Ki-tok

(Chh. T. G.)

194002 169 hō p.23-24

  I beh siⁿ kiáⁿ, lí tio̍h kiò I ê miâ choè Iâ-só͘; in-uī I beh kiû I ê peh-sìⁿ thoat-chhut in ê choē-ok(Má-thài 1:21).

  Iâ-so͘ chiū-sī Ki-tok, sè-kài khiàm-ēng Ki-tok. Lán bô Ki-tok, boē-oē soah--tit. Lâng nā-sī kóng, "Ki-tok bô pit-iàu; nā ū pa̍t hāng chiū hó", chiū-sī it-hoat khiàm-ēng Ki-tok. In-uī chin ê chín-kiù, sī chāi tī chin ê Sîn, Iâ-so͘, Ki-tok, í-goā bô thang ǹg-bāng. Hiān-chāi sè-kài ê lâng, put-chí kî-thāi Ki-tok tī pêng-hô ê kang-chok. Ki-tok uī-tio̍h chin ê pêng-hô lâi sè-kan. I chhut sì ê sî, choē-choē ê thian-peng ê chàn-koa kóng, "......Toē-chiūⁿ hô-pêng tī I só͘ hoaⁿ-hí ê lâng ê tiong-kan" (Lō͘-ka 2:14).

  Khoàⁿ toê-kù Má-thài 1:21 chiū chai, Ki-tok m̄-sī beh kiù peh-sìⁿ thoat-chhut chiàn-cheng; sī beh kiù peh-sìⁿ thoat-chhut choē-ok. Iok-hān 5:1-9 ū piáu-sī sè-kài kap Ki-tok ê koan-hē.

  I. Sè-kài ê lâng lóng ū pīⁿ.

  Iâ-lō͘-sat-léng, kūn Iûⁿ-mn̂g, ū tî, ū 5 ê léng-lông. Hit lāi-bīn ū chhiⁿ-mî--ê, pái-kha--ê, huih ko͘-ta--ê tó-teh. Lán boē thang ng ba̍k-chiu m̄ khoàⁿ chiah ê. Sè-kài si̍t-chāi sī phoà-pīⁿ, chhiⁿ-mî, pái-kha, soe-lám ê lâng chū-chi̍p ê só͘-chāi. Seng-khu kiám-chhái bô phoà-pīⁿ, m̄-kú lêng-sèng phoà-pīⁿ, tio̍h khiàm-ēng táⁿ-tia̍p, nā bô sī boē tit hó. Lêng ê ba̍k-chiu chhiⁿ-mî, só͘-í boē khoàⁿ-tio̍h chin-lí ê kng. Lêng-sèng pái-kha, boē kiâⁿ chin-lí; chhuì oē kóng, kha boē si̍t-hêng. Huih sī oa̍h-miā, pe̍h-huih-kiû sī kap pháiⁿ ê soè-khún kau-chiàn ê la̍t; huih í-keng ko͘-tâ, hit ê la̍t lóng bô khì. Sè-kài ê lâng, tú-tú sī án-ni. Sui-bóng tī hia, chá-khí-sî ê ji̍t-thâu ū chiò lâi, hó ê khong-khì siông-siông teh chhe; iā sī pi-siong liáu-liáu. Tī sè-kan iā ū hoaⁿ-hí, iā ū hó ê su-tiau; m̄-kú sī pi-ke̍k khah choē chhut. Che sū sè-kài ta̍k só͘-chāi giám-jiân ê sū-si̍t. Ū-sî bat ū hi-bāng siⁿ-khí, hoat-chhut sū-kong chhut-lâi; m̄-kú liâm-piⁿ o͘-hûn tà oá, hut-jiân lo̍h toā-hō͘. Ah! Sè-kài ê hiān-si̍t ê chōng-thài, si̍t-chāi tú-tú chhin-chhiūⁿ chit 5 ê léng-lông ê só͘-chāi.

  II. Tit-kiù ê ǹg bāng hi-po̍h.

  Chiàu Kok-gú Sèng-keng hoan-e̍k ke chi̍t kù kóng, "Chuí tín-tāng ê sî, thiⁿ-sài lo̍h khì; só͘-í tāi-seng lo̍h tî ê lâng, bô-lūn sím-mi̍h pīⁿ, tit tio̍h hó." Khiok sī hiah ê pīⁿ-lâng ū tit-tio̍h hó ê ǹg-bāng. Tit-kiù ê lō͘ uī-tio̍h in pī-pān tī-teh. M̄-kú chin hán-tit ū chit ê ki-hoē, iā nā m̄-sī tē-it tāi-seng lo̍h tî, chiū bô hoat-tit thang tit-tio̍h hó. Nā khoàⁿ hit ê phoà-pīⁿ 38 nî ê lâng, chiū chai i m̄-chai tán loā choē nî, iā bô tit-kiù ê ki-hoē. Tit-kiù ê ǹg-bāng, si̍t-chāi hi-po̍h. M̄-sī uī-tio̍h lóng-chóng ê lâng, ū tit-kiù ê lō͘. Ka-kī bô khuì-la̍t ê lâng choân bô tit-kiù ê ǹg-bāng. Sui-bóng oē thang lo̍h tî lâi tit-tio̍h hó, in iû-goân oē koh phoà-pīⁿ; sui-jiân bô koh phoà-pīⁿ, iā sī chi̍t-sî ê kiān-khong nā-tiāⁿ. iū-koh chiú tín-tāng sī chin hi-hán. Sè-kài ê pêng-an, pêng-hô; sī it-sî nā-tiāⁿ. Tuì it-poaⁿ ê chong-kàu, tō-te̍k, liân-bêng sī boē tit-tio̍h si̍t-chāi éng-oán ê pêng-an kap hô-pêng. Tuì toā ê sè-le̍k, chîⁿ-châi, hó ê chí-tō chiá, sèng-jîn ê kà-sī, tit-kiù ê ǹg-bāng sī hi-po̍h.

  III. Suî ê kò͘ ka-kī.

  "Chú ah! Chuí tín-tāng ê sî, bô lâng thang hû goá lo̍h tî; kàu goá lâi ê sî, pa̍t lâng tāi-seng goá lo̍h-khì lah." In-uī lo̍h-khì tî--nih, tē-it tāi-seng ê lâng, oē tit-tio̍h pīⁿ hó. Só͘-í suî-lâng kò͘ ka-kī, toà teh tng-tán; nā-sī chuí tín-tāng chiū kín thiàu lo̍h-khì. Tē-it khó-lîn, chiū-sī lo̍h tî tit-tio̍h i-hó ê lâng, bô siūⁿ che sī Siōng-tè ê un-tián, pe̍h-pe̍h tit-tio̍h, lóng bô beh sió khoá toà hia, pang-chān hiah ê iáu-bē hó ê tâng-phoāⁿ. Te̍k-pia̍t ka-kī boē-oē lo̍h chuí ê tāng-pīⁿ ê lâng, tio̍h pang-chān i, chiah sī eng-kai. Kó͘-chá lâng kóng, "Tâng pīⁿ sio khó-lîn," "Khí(齒) thiàⁿ chiah chai khí(齒) thiàⁿ lâng. In lóng bô tông-chêng sim. Sī kan-ta "Ji̍t-thâu chhiah-iāⁿ-iāⁿ, suî-lâng kò͘ sìⁿ-miā." Che kám m̄-sī sè-kài ê hiān-si̍t mah?

  IV. Ki-tok sī choè toā ê Kiù-chú.

  Iâ-so͘ khoàⁿ i tó-teh, chai i pīⁿ í-keng kú, kā i kóng, Lí ài tit-tio̍h hó mah? Chiū koh kā i kóng, "Khí-lâi, giâ lí ê pho͘-á khì kiâⁿ." Hit lâng chek-sî hó, chiū giâ i ê pho͘-á khì kiâⁿ. Kiám chhái Iâ-so͘ í-goā, ū pa̍t lâng beh pang-chān i, á-sī lâi pang-chān i; bô chi̍t lâng oē chhin-chhiūⁿ Iâ-so͘ án-ni chín-kiù i. Tī chit ê Pit-sū-tāi (ì-sù sī lîn-bín ê chhù) khí-thâu ū tit-kiù ê toā-kng chiò kàu uī; kìⁿ-nā sìn I ê lâng, lóng oē tit-tio̍h toā-kng chiò in. In-uī sè-kan ê Kiù-chú í-keng lâi lah. I lâi kàu sè-kài choē-ok pi-chhám ê ē-toé, kap lán saⁿ-kap tī-teh, si̍t-chāi sī Í-má-loē-lī. I sī o͘-àm ê sè-kài ê kng; I sī tam-tng sè-kan ê choē ê Iûⁿ-ko. Sè-kài tio̍h koh chi̍t pái chù-ba̍k tī I, tī chia chiah ū toā ê chín-kiù. Poē-poān Siōng-tè, toà tī pi-chhám ê sè-kài; nā gióng-bōng I choè Kiù-chú, Siōng-tè ê un-tián chiok-hok kàu tī-hia.

  (Kiat-bé). Chiaⁿ ge̍h 11 hō ê sin-bûn-choá-chiūⁿ ū hoat-piáu ルーズヴエルト Bí-kok Tāi-thóng-léng chiau-chi̍p choân-kok chong-kàu-ka lâi táⁿ-ha̍p; iā kóng, Pún-nî chhun-thiⁿ ê tiong-kan, káⁿ oē kìⁿ-tio̍h pêng-hô ê sū-kong (曙光). Khiok che sī bī-ti-sò͘; sè-kài kap Ki-tok; tuì chit chām Sèng-keng lâi siūⁿ, sè-kài tio̍h kàu tī Ki-tok; m̄-sī tāi-thóng-léng kàu tī chong-kàu-ka nā-tiāⁿ. Iâ-so͘ Ki-tok! Che sī choân sè-kài chin ê Kiù-chú. Ki-tok kàu tī lán; tī lán ū ǹg-bāng, tī sè-kài ū tit-kiù.