Ngiâ-chih Sin-nî
Lâu Iok-hàn
1941年1月 670期 18-19
Sin-nî kiong-hí: Ji̍t-chí chin khoài kè, kū-nî liâm-piⁿ kè-liáu, Sin-nî iū koh kàu. Hông-kí 2600 nî í-keng tī āu-bīn, teh lâi ê chiū-sī sin sè-kí ê sin-nî. Tī chit ê sin sè kí ê sin-nî, lán oē thang khiā-teh lâi ngiâ-chih......Chit ê kiám m̄-sī lán ê Thiⁿ-pē ê hông-un mah? Lán tī kū-nî sui-jiân ū tú-tio̍h choē-choē ê kan-lân, khùn-khó͘ , chióng-chióng ê ge̍k-kéng, iáu-kú Siōng-tè ê thiàⁿ bô lī-khui lán, kap lán saⁿ-kap tī-teh, hō͘ lán oē poah-khui bān-lān lâi ngiâ-chih sin ê nî-ge̍h. Lán kiám m̄-tio̍h toā-toā kám-siā o-ló lán ê Thiⁿ-pē!
Kin-ná-ji̍t ê sî-tāi thang kóng sī to-toan to-sū ê sî, lán tī chit ê sî-ē lâi ngiâ-chih chit ê sin sè-kí ê sin-nî, tī chit ê sin ê chiân-tô͘ m̄-chai ū loā choē lán só͘ oh-tit tam-tng sin ê sū teh lâi. Lán tuì chit ê oē thang ngiâ-chih á-boē? Put-chí hō͘ lán thang khó-lū ê só͘-chāi Pó-lô kóng, "......ǹg-bāng Siōng-tè ê êng-kng lâi hoaⁿ-hoaⁿ hí-hí ; m̄-nā án-ni, chiū tī hoān-lān iā hoaⁿ-hoaⁿ hí-hí". Tī kin-nî sin ê thâu-chêng, put-lūn sím-mi̍h sū, he̍k-sī khoài-lo̍k, he̍k-sī hoān-lān, ta̍k téng hō lán lóng tio̍h chhin-chhiūⁿ Pó-lô ēng hoaⁿ-hoaⁿ hí-hí lâi ngiâ-chih. Lán ê sìn-sim koat-toàn m̄-thang hō͘ só͘ teh-beh lâi ê sū......lâi iô-tāng. Put-lūn sī hoaⁿ-hí, iu-chhiû á-sī sio̍k tī sî-kio̍k ê ki-chhì, huí-pòng, kong-kek chióng-chióng ê khún-tio̍k, gō͘-kái, iā toàn-jiân bô iông-ún lâi phò-hoāi lán ê sìn-gióng , in-uī lán ê sìn-gióng m̄-sī lâng só͘ li̍p lâi hō͘ lán--ê, sī tuì Siōng-tè só͘ li̍p lâi siúⁿ-sù lán, chiū-sī oa̍h-oa̍h ê sìn-gióng. ( Kìⁿ-nā lâng só͘ li̍p--ê, tio̍h chhut tī bián-kióng, in-uī tī-hia hián-bêng i bô ū oa̍h-miā, m̄-sī oa̍h-oa̍h ê sìn-gióng). Tī chit ê sin-chhun ê sî, bān-mi̍h teh hoat-hui lán ê oa̍h-miā, m̄-nā bô hō͘ goā-kài kā lán iô-tāng, koh tī lán ê lāi-té tio̍h toā-toā hùn-tò͘ chìn-pō͘. Muí-nî sin-chhun ê sî, bān-mi̍h chi̍t pái ê keng-sin, lán ê sìn-gióng seng-oa̍h tī chit ê muí-nî ê cho͘-thâu iā tio̍h ū keng-sin ê khì-siōng, chit-tia̍p lán ngiâ-chih chit ê sin-nî tio̍h cháiⁿ-iūⁿ keng-sin. Kiâⁿ soé-lé Iok-hān thâu-pái chhut-lâi thoân tō-lí kóng, "Lín tio̍h hoé-kái , sìn Hok-im," kó-jiân ū choē-choē lâng chhut--lâi hoé-kái chiū-kūn i niá soé-lé. Chit ê hoé-kái chiū-sī liông-sim ê kak-chhíⁿ, liông-sim ê kak-chhíⁿ, ū chin toā ê piàn-hoà, chiū-sī keng-sin ê piàn-hoà(chhin-chhiūⁿ sin-chhun bān-mi̍h teh piàn-hoà keng-sin). Lán m̄-sī kan-ta o̍h Siōng-tè ê kà-sī hit khoán chiū-sī lán tio̍h ū sui-jiân kàu tī sí, iā bô ū kiaⁿ-hiâⁿ ê sim, chhim-chhim kap Siōng-tè chhin-bi̍t, sìn-khò Ki-tok, siông-siông hoaⁿ-hí, kî-tó bô soah, hoān-sū kám-siā, koh tio̍h chīn sim, chīn sèng, chīn ì, chīn la̍t, thiàⁿ Siōng-tè kap lâng, chit khoán ê cheng-sîn lâi keng-sin. Chi-ná bat ū chi̍t ê ông tī i ê soé-bīn-khì ê lāi-té ū siá "ji̍t sin" nn̄g jī, chiū kì-tit i ê sim tio̍h oāⁿ-sin. Lán oa̍h tī chit ê sè-kan teh ngiâ-chih sin nî, sin ji̍t, lán iā tio̍h oē-kì-tit tio̍h keng-sin, chhin-chhiūⁿ Pó-lô kóng, " Ji̍t-ji̍t thǹg--khì kū ê lâng, sim-sîn oāⁿ sin, chhēng Siōng-tè ê siōng só͘ chhòng-chō sin ê lâng." Tī hong-iá 40 nî ê Í-sek-lia̍t peh-sìⁿ, in ta̍k chá-khí tio̍h chhut-khì khioh má-ná , che ū sím-mi̍h kà-sī tī-teh Siōng-tè cháiⁿ-iūⁿ bēng-lēng in tek-khak tio̍h ta̍k chá-khí chhut-khì khioh ta̍k chá-khí ê má-ná. Chit ê sui-jiân ta̍k chá-khí só͘ choè sī saⁿ-tâng, sio̍k tī goā-hêng ê sū, iáu-kú lāi-sim nā pī-pān sin-sin ê sim khì choè sin ê sū, chiū Siōng-tè siúⁿ-sù in ta̍k-ji̍t sin-sin ê chia̍h-mi̍h. Chit-tia̍p lán ji̍t-ji̍t ê seng-oa̍h, Siōng-tè ū ēng sin ê kng lâi ngiâ-chih lán, lán kì-jiân siū-tio̍h ji̍t-ji̍t sin ê kng ê ngiâ-chih , lán kiám m̄ iû-goân tio̍h ēng sin-sin ê mi̍h , chiū-sī sin ê sim lâi ngiâ-chih i. Lán nā ta̍k-ji̍t ēng sin ê sim kiâⁿ Chú ê lō͘, Siōng-tè ji̍t-ji̍t beh ēng sin ê un-huī , sin ê khuì-la̍t hō͘ lán .
