首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 這世間的迷惑
這世間的迷惑
卷期：第671期 本次： 日期：1941/2 刊名：台灣教會公報/北部教會 頁數：17-18
篇名：這世間的迷惑 [ Chitsè-kan ê bê-he̍k ]
作者：陳石獅 Tân Chio̍h-sai
  顯示 : 漢羅 全羅 並列  

這世間的迷惑

陳石獅

1941年2月671期    17-18

 

    這世間有3項的迷惑佇teh魔鬼不時用真好聽的話，teh引誘人陷落佇這3項的迷惑。始祖也受陷落佇這3項的迷惑。今仔日也濟濟人陷落佇這3項的迷惑。

  佇始祖的時，得著勝利的魔鬼，閣出現佇主的面前用真好聽的話，欲來迷惑主耶穌。

  Taⁿ請來看，咱的主用甚物傢俬來佮魔鬼交戰。

  (1)肉體的迷惑：魔鬼看見耶穌iau，隨時倚來用真好聽的話，佮親像真有疼心的款共伊講，「你若是上帝的囝，就kah chiah的石頭變做餅。」今仔日的人，是掠餅做第一要緊。

    有人講這个餅就是人的活命，若有餅就人的生活攏通解決。所以這个餅是第一要緊。「若是主應講，人的活m̄-nā倚靠餅，就是倚靠對上帝的喙所出攏總的話」。按呢予咱通知餅毋是第一的問題；第一的問題就是上帝的話。

    佇遮予咱通知。主耶穌毋是看餅無必要，是看做第二的問題。所以主耶穌有講，恁著代先求上帝的國佮伊的義，就伊所有的紲攏欲予恁。

  今仔日濟濟人為著世間的金錢，紲袂記得上帝的道理。親像有人要緊teh求伊的老父的財產nā-tiāⁿ，攏無要緊teh想咱著怎樣來有孝咱的老父，紲袂曉想伊的老父所有--ê ，就是欲予--伊。

    主耶穌到曠野。伊所向望的就是欲聽上帝的話，毋是欲聽魔鬼的話。上帝的話就是人的活命。Taⁿ咱的主耶穌有贏過這世間頭一項的迷惑，所以咱著綴主的腳步，毋通予這世間的金錢，佮餅的問題來過頭憂悶，紲袂記得上帝的真理。

  (2) 武力的迷惑：魔鬼閣chhoā主到聖城，予伊徛佇殿的尾溜，共伊講，你若是上帝的囝，著家己tiô--落去；因為有記載講，伊欲為著你命令伊的天使，in欲用手扶你，免得你的腳tak著石(馬太4：5，6)。魔鬼利用上帝的話，欲來試主耶穌。魔鬼常常利用人的氣力，來害人的身軀。始祖受魔鬼的迷惑，來食上帝所禁的善惡果，按呢通知就是試上帝，反逆上帝，想欲佮伊平gâu。今仔日有濟濟倚靠家己的氣力看無上帝，用家己的氣力欲來解決攏總的事。這款的人就是驕傲的人，毋知上帝的恩。

    教會毋是用武力來建設的 ，就是用信仰來建設。若是用武力來建設的，到尾teh欲倒壞。人若是倚靠家己的武力，到尾是滅無。

    親像拿破崙(ナボレオン) teh欲死的時有講一句話講，「我失敗，獨獨基督得著勝利。」

  今仔日咱的教會，著用信仰來交戰，才會贏魔鬼的迷惑。若是用武力teh交戰，到尾就予魔鬼較贏。咱的主耶穌基督用疼痛的心，來得著勝利。

  (3)榮華的迷惑：魔鬼閣chhoā伊上極懸的山，用天下萬國佮in 的榮光予伊看；共伊講，你若仆落拜我，chiah的我攏予你(4：8，9)。

真濟人愛坐佇高位，愛予人尊敬；若是予人呵咾的時真歡喜，予人嫌的時隨時受氣。這款的心就是要緊這世間的地位，名聲，chong拜世間的榮光。

  魔鬼捌請耶穌坐這款的位的時，耶穌隨時應講，「撒旦退去，著拜主你的上帝；獨獨服事伊nā-tiāⁿ」。今仔日魔鬼不時準備極榮光真媠的所在欲予咱坐。咱若是坐這款的位，就失落袂看見的福氣。聖經有講，一个人袂會服事兩个主人。咱若是服事這世間的地位，就袂會服事真活的上帝。魔鬼愛咱離開上帝，所以用真媠的位做活罩，teh欲予咱坐。咱著知，這世間的榮華富貴是暫時nā-tiāⁿ。所羅門王極行伍的時，佇tá落。

    主耶穌所建置的國，毋是屬佇這世間的國；這世間所有的攏欲變換，獨獨主耶穌建置的永遠袂變換。

    Taⁿ咱是屬主耶穌基督的學生，所以咱所服事的，就是主耶穌講的上帝。魔鬼有用3个活罩的機關，欲來引誘伊入佇彼內面；m̄-kú主耶穌有用上帝的會做劍，來破開魔鬼的計智。

佇始祖的時得著勝利的魔鬼，taⁿ已經予主耶穌的腳踏tiâu。主耶穌到佇曠野所欲聽的，就是上帝的聲，毋是欲聽魔鬼的聲。主耶穌用上帝的話，做劍來破開魔鬼的迷惑。咱所著聽的聲，只有是上帝的聲。咱若是聽魔鬼的聲，到尾就陷落這3項的迷惑。

  Taⁿ主耶穌已經是做得勝的將軍，咱也著做得勝的兵丁，到佇榮光的所在。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461