Goá só͘ goān
Koa Î-su
1941年2月671期 24-25
I. Goá goān bû-ngó͘(無我), bô goá chiah oē sî-sî êng-kng Siōng-tè. Khoàⁿ Iâ-so͘ Sèng-kàu iàu-lí būn-tap. Tē-it hāng, "Sím-mi̍h choè lâng chì iàu-kín ê pún-hūn? Lâng chì iàu-kín ê pún-hūn chiū-sī kui êng-kng tī Siōng-tè, hoaⁿ-hí khoài-lo̍k tī Siōng-tè ,kàu tī éng-oán."
II. Goá goān êng-hián pē-bó͘. Khoàⁿ Siōng-tè ê Sèng-kài tē 5 kù:- Chham-khó Hàu-keng " Sin-thé hoat-hu siū chi hū-bú, put-kám huí-siong, hàu chi sí iá"(身體髮膚受之父母，不敢毀傷孝之始也)，kap hàu chi chiong-iá(及孝之終也).
III. Goá goān sī chit ê siān-liông bîn, ji̍t-ji̍t sî-sî hōng-sū tī kok-ka.
IV. Goá goān sī chi̍t miâ ek-pat(憶八). oē kì-tit 8 hāng, chiū-sī hoán-tuì bōng-pat(忘八). Boē kì-tit 8 hāng: Hàu-tē tiong-sìn lé-gī liâm-thí(孝弟忠信禮儀廉恥). Goá goān boē-kì-tit goá: chóng-sī goá goān oē kì-tit 8 hāng. Bōng-pat sī tāi-lio̍k(大陸) ê lâng teh mā lâng tē-it to̍k ê pháiⁿ-oē.
V. Goá goān ū hó ê sian-siⁿ thang kà-sī goá, goá chiah oē sêng-khì.
VI. Goá goān ū hó ê pêng-iú, sî-sî thang saⁿ chí-sī , saⁿ an-uì.
VII. Goá goān só͘ tit 10 hun 6 hun kui tī Thiⁿ-pē, 10 hun 4 hun ka-kī tē. Tī Thiⁿ-pē chiū-sī choè pài-tn̂g, thoân-kàu-chiá, ha̍k-hāu , i-īⁿ, uì-būn, pò͘-tō ū kong-ek ê sū. Ka-tī tē, chiū-sī ka-kī, kiáⁿ, sun ê huì-iōng.
Bû-ngó͘ ê goá ì-keng 73 hè, bô kú oē lī-sè, tio̍h khì kìⁿ thiⁿ-pē. Só͘-í ēng choân-sin, choân-sîn hiàn hō͘ Siōng-tè; ia̍h ēng sin-nî, sin-sim chhéng-an chèng hiaⁿ-ché. Goān Chú sù-hok lán tāi-ke.
