Sìn-tô͘ ê kong-êng
Gô͘ Thian-bēng e̍k
1941年3月672期 18-19
Kó͘-chá Tāi-pi̍t ū kóng, "Lí í-goā, goá bô hok-khì." Chit kù m̄ sī kan-ta sī si-jîn ê su-sióng nā-tiāⁿ, si̍t-chāi sī sìn Iâ-so͘ Ki-tok ê lâng ê si̍t-giām. Tāi-pi̍t koh chhiùⁿ kóng, "Iâ-hô-hoa ah, beh hioh tī Lí ê chhù ê sī chī-chuī," "Beh hioh tī Lí ê Sèng-soaⁿ ê sī chī-chuī." Ū Iâ-so͘ Ki-tok ê sim ê lâng, khak-si̍t chiū-sī hioh tī Iâ-hô-hoa ê chhù ê lâng. Chit hō ê lâng , sui-jiân tú-tio̍h hoān-lān iū-koh hoān-lān , khó͘-sim chhám-tám só͘ hoāi, chì thiàⁿ-thàng--ê phoà-pīⁿ guî-hiám; iáu-kú oē sìn-gióng Chú Iâ-so͘ sī tī i ê kap lîn-bín teh pó-hō͘ i. Sìn-tô͘ chiū-sī ū "Lí í-goā , goá bô hok-khì" ê si̍t-giām ê lâng. Che chiū-sī lâng choè-toā ê kong-êng. "Ah, Siōng-tè sī goá ê khuì-la̍t, koh sī goá tô-siám ê só͘-chāi,"chit kù m̄-sī soat-kàu ê bûn-kù, iā m̄-sī Sèng-keng-kho ê ha̍k-khò, m̄-sī Chú-ji̍t Sîn-liông ; chiū-sī oa̍h Ki-tok ê sìn-tô͘ ê si̍t-giām.
Siat-sú lán nā-sī sím-mi̍h hó ê sū; chit ê chí-ū chiū-sī lám kám-tek si̍p-jī-kè ê toā cheng-sîn lâi pē si̍p-jī-kè, hit ê it-sùn-kan ê sim-sū kap hêng-uî nā-tiāⁿ. Khiā tī Iâ-so͘ Ki-tok ê bīn-chêng ê sî, ēng khang-hi ê sim, uī-tio̍h tông-pau kî-tó ê sî; chiū-sī sìn-tô͘ choè tē-it kong-êng ê sî. Lán choè sìn-tô͘ ê, tek-khak tio̍h chhut-la̍t khún-kiû ǹg-bāng thang chhî-sio̍k chit hō kuì-khì ê sî-kan. Ki-tok só͘ kóng, "Lí nā tiàm tī goá, goá tiàm tī lí, chiū Siōng-tè choē-choē ê êng-kng beh tit-tio̍h hoat-iông, " chit kù chiū-sī teh chí-khí chit téng hō ê sìn-tô͘. Sìn-tô͘ nā oē thang kàu tī chit hō cheng-sîn, chiū Iâ-so͘ beh koh hioh tī sìn-tô͘ , hō͘ sìn-tô͘ choè kang . Pó-lô ū kóng, "Sūn-thàn tiàm tī goá ê lāi-bīn thoân-tō." Che chiū-sī sìn-tô͘ ê choè toā hēng-hok.
Lán siū bēng tio̍h thoân-tō tī khoàⁿ oē tio̍h kap khoàⁿ boē tio̍h ê lâng ê tiong-kan, ū hū pí kó͘-chá Iok-pek ê chek-sêng khah toā ê chek-jīm tī-teh. Só͘-í put-sî ū tuì Chú lâi hoaⁿ-hí ê chū-iû tī-teh. Tek-khak tio̍h put-sî tuì Chú lâi tit-tio̍h, chhin-chhiūⁿ Chú tú-tio̍h hiah kan-lân, iáu-kú oē hoaⁿ-hí kek-lē lâng hit khoán uí-tāi ê un-huī. Pó-lô kóng, "uī-tio̍h hiaⁿ-ti kut-jio̍k, chiū nā kàu tī bia̍t-bô, iā sī ê só͘ goān." Chit kù m̄-sī chi̍t sî ê chêng, kek-khí lâi hoat-chhut ê oē, chiū-sī ū hūn tī Ki-tok ê un-huī nā jú chhim, jîn-sek Ki-tok ê Si̍p-jī-kè ê ì-gī nā jú chhim, chiū chū-jiân oē hoat-khí ê goān-bōng. Sìn-tô͘ ê kong-êng, tuì Siōng-tè ê un-huī, oē tit thang ta̍t kàu tī chia.
Kim-āu lán só͘ beh tú-tio̍h ê sū-kiāⁿ, tuì jîn-chêng lâi khoàⁿ sī chin khùn-lân , ū choē-choē chheng-liân lâm-lú kau-tài tī lán , só͘-í tek-khak beh chin khùn-lân .Kiám-chhái oē tì-kàu chin bô hoat-tō͘ thang chīn chit ê chek-jīm. M̄-kú kàu kin-á-ji̍t , Sèng-chheh ū kà-sī goá kóng, "Siōng-tè ê un-huī ná ke-thiⁿ, khùn-lân iā ná ke-thiⁿ." Che iā sī Ki-tok-kàu tī kin-á-ji̍t só͘ chí-sī goá ê. M̄-bat un-ài ê un-huī ê só͘-chāi , kiám-chhái bô bu̍t-chit-chiūⁿ ê khùn-lân; sè-kan só͘ chheng-ho͘ choè hó-gia̍h ê, chiū-sī chit hō ê í-keng sí ê lē. Lán tuì un-huī hiòng sè-kan í-keng sí ê lâng, í-keng choè Thian-kok ê chhī-bîn ê lâng; bô lūn tú-tio̍h sím-mi̍h khùn-lân, iā sī tio̍h kám-siā lâi hiòng-chêng. Sui-jiân pho-lōng chin toā, nā kiong-kèng gióng-bōng si̍p-jī-kè; kiám m̄-sī tī-hia ū sèng-lī ê lō͘, kiám m̄-sī tī hia ū sìn-tô͘ ê kong-êng!!
