Sèng Sîn chhiong-moá
Sù-tô͘ Hēng-toān 13:52
Toh Hui-liông
1941年3月672期 19-20
"Sèng Sîn chhiong-moá" che sī sím-mi̍h ì-sù? Lán ê Chú teh-beh lī-khui ha̍k-seng chiūⁿ-thiⁿ ê sî, in ê sim kàu-ke̍k "pé-pa̍k", nā-sī Chú ēng Iok-hān 14:16 só͘ kì ê tō-lí lâi koáⁿ-soàⁿ in ê kiaⁿ-hiâⁿ.
Tng Chú tī sè-kan ê sî, I sî-khek chí-tō, pó-hō͘, bián-lē, khoàⁿ-kò͘ ha̍k-seng , taⁿ Chú í-keng lī-khui in, nā-sī Sèng Sîn í-keng lîm-kàu lâi tam-tng chit ê chek-jīm.
Sèng Sîn ê kang-chok
Sèng Sîn ê kang-chok tī Ki-tok-tô͘ ê sin-chiūⁿ ū 2 hong-bīn.
1. I ê kang-chok chiū-sī koáⁿ-tio̍k choē-ok. I ê hong-hoat chiū-sī hoán-tuì pháiⁿ ê sèng-chit(Ka-lia̍p-thài 5:17).
2. Sèng Sîn chhòng-chō "Sin ê seng-oa̍h" tī Ki-tok-tô͘ ê sim. I ê hong-hoat chiū-sī siⁿ-chhut "un-tián" ê ké-chí tī lâng ê sim(Ka-lia̍p-thài 5:22).
Só͘-í "Sèng Sîn chhiong-moá" lán tek-khak m̄-thang siūⁿ choè chhin-chhiūⁿ chuí chhiong-moá tī chuí-pân chi̍t-iūⁿ. Sèng Sîn m̄-sī chhin-chhiūⁿ chit khoán ê bu̍t-chit oē chhiong-moá tī khang-pân ê lāi-bīn. Sèng Sîn chhiong-moá chiū-sī tuì I sîn-lêng ê la̍t (人格的力) lâi chi-phoè(支配) sìn-tô͘ ê choân jîn-keh-tek seng-oa̍h(Sù-tô͘ Hēng-toān 13:52). Hit ê ì-sù sī koan-hē Sèng Sîn chi-phoè sìn-tô͘ ê su-sióng, giân-gú kap kiâⁿ-ta̍h , goá ū siū Sèng Sîn chhiong-moá á bô? nā ū , goá ê sim só͘ siūⁿ, chhuì só͘ kóng, kha-chhiú só͘ kiâⁿ eng-kai lóng tio̍h ū siū Sèng Sîn ê chi-phoè.
Tuì Chú kiû Sèng Sîn kàng-lîm tī goá ū ha̍p-gî bô?
Ū lâng beh ín-iōng Lō͘-ka 11:13 "Hô-hòng lín tī Thiⁿ-nih ê Pē kiám bô ēng Sèng Sîn lâi hō͘ kiû I ê lâng " lâi kóng ū ha̍p-gî . Chóng-sī tī chia ài chù-ì ê , chiū-sī Chú m̄-sī pò ha̍k-seng kiû Sèng Sîn ê kàng-lîm, chiū-sī kiû Sèng Sîn chhiong-moá. Chú kóng chit kù sī in-uī Sèng Sîn iáu-bē lîm-kàu , só͘-í Chú beh thoè ha̍k-seng kiû Pē Siōng-tè siúⁿ-sù Sèng Sîn. Phí-jîn só͘ ài kiông-tiau ê chiū-sī tī chia, Sèng Sîn í-keng tī Gō͘-sûn-choeh ê sî lîm-kàu tī sè-kan lah, Sèng Sîn tī lán ê sim-mn̂g-goā sî-khek teh kā lán phah-mn̂g, sī teh tán lán hoaⁿ-hí sūn-ho̍k I ê chí-ì lâi khui lán ê sim-mn̂g. Lia̍t-uī hiaⁿ-chí , lán tāi-ke tâng-sim teh khoà-lū lán só͘ thiàⁿ ê kàu-hoē ê chiân-tô͘, chek-jīm m̄-sī chāi tī Siōng Chú, iáu-bē kàng-lo̍h Sèng Sîn, ū-sî lán ài beh ēng chit ê choè lí-iû lâi "tán" I ê lîm-kàu, lia̍t-uī, Sèng Sîn í-keng tī lán tiong-kan teh tán lán sìn-tô͘ choân-oân khui sim-mn̂g ,lâi siū I chhiong-moá=chi-phoè lah!
Beh tuì cháiⁿ-iūⁿ lâi chai goá ū siū Sèng Sîn chhiong-moá?
1. Goá ū ji̍p tī tek-sèng ê seng-oa̍h á bô? chiū-sī iâⁿ-kè só͘ ū ê choē-koà, "In-uī oa̍h-miā ê Siōng-tè tī Ki-tok Iâ-so͘ í-keng tháu-pàng goá thoat-lī choē kap sí ê hoat"(Lô-má 8:2)
2. Goá tī kî-tó ū tit-tio̍h khuì-la̍t á bô, goá ê kî-tó ū tit-tio̍h ìn-tap á bô?(Í-hut-só͘ 6:18).
3. Tī thoân hok-im ê kang-tiâⁿ goá ū phe-miā á bô?
4. Goá ū ji̍p tī sèng-kiat ê seng-oa̍h á bô?(Ka-lia̍p-thài 5:16).
Kiat-bé
Goá hoaⁿ-hí àⁿ-thâu kám-siā Siōng-tè í-keng siúⁿ-sù Sèng Sîn tī lán tiong-kan.
Goá iā hoaⁿ-hí tuì Chú kóng, "Goá goān Sèng Sîn chi-phoè goá lóng-chóng ê su-sióng, giân-gú kap hêng-uî."
