Kàu-hun Kàu-hoē

Gô͘ Thian-bēng

1941年3月672期      25

  oa̍h-tāng ê Kàu-hun kàu-hoē, tī kū-nî joa̍h-thiⁿ Sèng-tn̂g hō͘ hong-thai phah-pháiⁿ, tuì hit-tia̍p bô chin hó-sè ê só͘-chāi thang chū-hoē . Koáⁿ-kín tio̍h-chhiú kè-e̍k khí sin ê pài-tn̂g.

  Chóng-sī tī chit ê sî-chūn choē-choē boē chiàu só͘ ài, só͘-í ū kè-e̍k toā-pō͘-hūn ēng bo̍k-chō--ê. Khiok iā ū tit-tio̍h chi̍t-koá Se-iûⁿ thô͘. Tī kū-nî 10 ge̍h heng-kang kàu hiān-sî í-keng teh-beh oân-kang lah. àn-sǹg tī 4 ge̍h tiong beh lo̍k-sêng. Chóng-kiōng kang-sū-huì sī 9 chheng kho͘, lóng bô tuì pa̍t-uī toê, sī ka-kī ê hoē-iú hiàn--ê. In tuì tī thiàⁿ Chú, kap thiàⁿ I ê kàu-hoē, ū jia̍t-sim koan-hiàn in ê bu̍t-chu, si̍t-chāi bô kiàn-siàu in ê oa̍h-tāng kàu-hoē ê miâ. In ê thiàⁿ Chú, in ê thiàⁿ kàu-hoē, si̍t-chāi sī lán só͘ tio̍h o̍h--ê. Hiān-sî Toh Hui-liông Bo̍k-su , tī-hia chin gâu chí-tō. ǹg-bāng Chú jú chiok-hok in, êng-iāu I ê miâ tī Kim-soaⁿ ê só͘-chāi. Sī Kim ê kàu-hoē!