Kin-á-ji̍t ê kàu-hoē
iōng-san Chheng-chì
1941年6月675期 21-22
Kin-nî 3 ge̍h ê Pak-pō͘ lîm-sî Tāi-hoē, chiū-sī uī-tio̍h Soan-kàu-su ín-iông liáu-āu beh siu-si̍p it-chhè ê būn-toê kap kiàn-siat tuì chit sî khí chū-chú to̍k-li̍p ê kàu-hoē; thang kóng sī choè tiōng-iàu choè-ko ê hoē-gī. Tī chhú hoê ê Lîm-sî Tāi-hoē khai-hoē ê tong-chho͘, gī-tiúⁿ ū soan-giân chhián-bêng chhú hoê Tāi-hoē ê tiōng-iàu-sèng, chiū-sī tuì sî-kio̍k tio̍h ū sì-chiàⁿ ê jīn-sek, koh tio̍h khiā tī sì-chiàⁿ ê sìn-gióng lâi liāu-lí kin-á-ji̍t ê kàu-hoē. Tuì Soan-kàu-su ê ín-iông , kàu-hoē boē bián-tit tú-tio̍h keng-chè-tek ê táⁿ-kek, chóng-sī kî-si̍t sī choè kàu-hoē beh tit-tio̍h chìn-tián ê chit ê hó ki-hoē . Soè-kiáⁿ nā bô keng-giām tn̄g-lin ê kan-khó͘, chiū boē hiáu chia̍h pn̄g. Kàu-hoē nā bô keng-giām lī-khui Soan-kàu-su ê kan-khó͘, chiū boē chiâⁿ-choè chin-si̍t ê kàu-hoē. Tuì Soan-kàu-su ê ín-iông , phah-sǹg ū choē-choē pêng-sò͘ kò-jîn-tek tuì soan-kàu-su tit-tio̍h un-huī ê lâng, beh chhut ai-oàn ê siaⁿ lâi kóng chióng-chióng ê put-pêng. Lūn che khiok ia̍h sī sió-khoá thang tông-chêng , chóng-sī ǹg-bāng in bo̍h-tit choan-choan siūⁿ ka-kī lâi hō͘ choân-thé ê kàu-hoē bô lī-ek. Soan-kàu-su í-keng tńg-khì liáu, taⁿ in éng-oán bô koh lâi. Lán Pak-pō͘ Kàu-hoē kap Ka-ná-tāi Soan-tō-hoē ê koan-hē í-keng chhiat-lī, Ka-ná-tāi Soan-tō-hoē ia̍h í-keng koat-ì pàng-sak Tâi-oân , khì khai-thok sin ê thoân-tō-toē, Sun Bo̍k-su í-keng siū-phài khì Lâm Bí ギアナ, Kai Sian-siⁿ siū-phài khì Lâm-iûⁿ Sin-ka-pho. Taⁿ lán tāi-ke lóng tuì it-tì hia̍p-le̍k lâi chhî-siú sûn-chèng ê sìn-gióng , kóng-khoah Siōng-tè ê Sèng-hoē. Lán tāi-ke tio̍h khoàⁿ thâu-chêng , m̄-thang khoàⁿ āu-bīn. oē chó͘-tòng kàu-hoē ê giân-tōng, hō kàu-hoē bô lī-ek ê soan-thoân, tī chit sî lóng tio̍h soah lah. M̄ sì-chiàⁿ jīn-sek hiān-chāi ê sū-si̍t, m̄ hiòng-chêng lâi khek-kí hōng-sū kàu-hoē, kan-ta oa̍t-thâu khoàⁿ āu-bīn lâi khong-sióng, bōng-sióng kap i-chûn Soan-kàu-su ê giân-tōng, sī hō͘ kàu-hoē toā-toā bô lī-ek ê só͘-chāi.
Kin-á-ji̍t ê sìn-tô͘ nā si̍t-chāi ū thiàⁿ kàu-hoē, chiū tio̍h hâng-ho̍k tī Tāi-hoē ê koat-gī. Tāi-hoē sī tāi-piáu choân sìn-tô͘ ê chóng-ì, sī Pak-pō͘ Kàu-hoē choè-ko ê gī-koat ki-koan . Tāi-hoē ê koat-gī lán nā-sī khoàⁿ-khin, m̄ sūn-thàn, kàu-hoē chiū si̍t-lo̍h tia̍t-sū, án-ni kàu-hoē ê kang-chok boē thang chìn-hêng, só͘-í Tāi-hoē tio̍h chun-tiōng. Ū chit khoán ê siaⁿ, hit khoán ê siaⁿ teh kóng tang kóng sai, teh thoè chi̍t poàⁿ ê Soan-kàu-su kóng oē, ǹg-bāng lán bô tit ji̍p bê-he̍k.
Lán to̍k-to̍k sì-chiàⁿ jīn-sek sî-kio̍k sì-chiàⁿ ê sìn-gióng kap Tāi-hoē saⁿ-kap hia̍p-le̍k lâi kiàn-siat Chú Iâ-so͘ Ki-tok ê sèng-hoē chiah sī lán tāi-ke ê pún-hūn.
