Chú ê ha̍k-seng
Tân Chio̍h-sai
1941年8月677期 22
Lán tio̍h cháiⁿ-iūⁿ choè, chiah oē thang chiâⁿ choè Chú ê ha̍k-seng; iā oē hō͘ lâng chai lán sī Chú Iâ-so͘ ê ha̍k-seng. Ū thiaⁿ-kìⁿ choè Chú ê ha̍k-seng phah-sǹg chin uî-lân, káⁿ tio̍h chin ū ha̍k-būn á-sī tio̍h gián-kiù chhim-chhim ê Sîn-ha̍k, chiah oē chiâⁿ-choè Chú ê ha̍k-seng. Chhin-chhiūⁿ m̄ bián siūⁿ kàu hiah-nih oh. In-uī Chú ū kà lán chi̍t-tiâu chin khoài ê lō͘ hō͘ lán kiâⁿ, I ū kóng, "Goá ēng sin ê kài-bēng hō͘ lín, chiū-sī lín tio̍h saⁿ-thiàⁿ. Lín nā saⁿ-thiàⁿ , chèng-lâng beh án-ni chai lín sī sī goá ê ha̍k-seng". Chit-tiâu kài-bēng, thang kóng sī Ki-tok-kàu ê kin-pún, cheng-sîn, só͘-í lán nā sit-lo̍h chit-tiâu kài-bēng, chiū-sī sit-lo̍h choè Chú ê ha̍k-seng ê chu-keh. Chhin-chhiūⁿ Pó-lô Sian-siⁿ ū kóng, "Sìn , ǹg-bāng, jîn-ài , chí saⁿ-hāng , kî-tiong tē-it toā ê sī jîn-ài." án-ni hō͘ lán thang chai, jîn-ài chiū-sī thang chhiok-chìn sìn-gióng kap ǹg-bāng , iā oē hō͘ lán thang tit-tio̍h choè Chú ê ha̍k-seng ê chu-keh.
Taⁿ lán kin-ná-ji̍t m̄-chai sit-lo̍h chit ê chu-keh á-bô? Lán m̄-chai ū thiàⁿ chîⁿ, miâ-siaⁿ, tē-uī, khah koè-thâu thiaⁿ lâng kap thiàⁿ Chú á-bô? Ū chi̍t lâng thang choè lán toā ê kéng-kài, chiū-sī Iû-tāi uī-tio̍h 30 kho͘, chiong ka-kī ê Sian-siⁿ lâi boē hō͘ tuì-te̍k ê chhiú. Mô͘-kuí ū ēng 30 kho͘, lâi boé I lī-khui choè ha̍k-seng ê chu-keh. oàn-tò͘ moá-moá bô thiàⁿ-thàng ê Hi-lu̍t ông, kiaⁿ-liáu sit-lo̍h tē-uī, chiong Pek-lī-hêng só͘ ū nn̄g hè í-hā ê ta-pō͘ gín-ná it-chīn thâi-sí uī-tio̍h beh kò͘-siú ka-kī ê tē-uī, lâi thâi-sí ka-kī ê bó͘-kiáⁿ kap chhin-lâng. Kin-ná-ji̍t ū choē-choē lâng, uī-tio̍h saⁿ-chiⁿ tē-uī , miâ-siaⁿ, soà sit-lo̍h saⁿ-thiàⁿ ê cheng-sîn, nā-sī án-ni boē oē chiâⁿ-choè Chú ê ha̍k-seng, lâng boē khoàⁿ lán sī Chú ê ha̍k-seng.
"Nā ū lâng kóng, goá thiàⁿ Siōng-tè iā oàn-hūn I ê hiaⁿ-tī, chiū-sī pe̍h-chha̍t; in-uī bô thiàⁿ só͘ ū khoàⁿ-kìⁿ ê hiaⁿ-tī ê, chiū boē thiàⁿ só͘ bē khoàⁿ-kìⁿ ê Siōng-tè(I Iok-hān 4:20).
Lán tāi-ke nā bô tuì sim-lāi, hián-chhut chin-si̍t ê saⁿ-thiàⁿ, chiū lâng boē oē thang khoàⁿ lán, sī Chú ê ha̍k-seng. Nā-sī bô thiàⁿ-thàng ê cheng-sîn tī-teh, chiū chhin-chhiūⁿ Pó-lô Sian-siⁿ kóng Sī "chiâⁿ choè hiáng ê tâng-khì, tân ê lâ-poa̍h ê kàu-chit-chiá kap thoân-kàu-ka nā-tiāⁿ."
Lán khoàⁿ アウガスチン フランシス , ルーテル , ダミエン, chiah ê lâng ê sî, boē kìm-tit teh-beh kóng, chiah ê si̍t-chāi sī Chú ê ha̍k-seng.
Lán khoàⁿ chiah ê lâng, chiū oē thang chai Chú Iâ-so͘ ê thiàⁿ goā koân, goā chhim, goā khoah. án-ni hō͘ lán thang chai, lán nā-sī ū saⁿ-thiàⁿ, chiū-sī Chú ê ha̍k-seng.
Lán ê sian-siⁿ iā ū koh kà lán chit-hāng, chiū-sī kiò lán tio̍h "Chīn-sim, chīn-sèng, thiàⁿ Chú lí ê Siōng-tè , iā tio̍h thiàⁿ chhù-piⁿ chhin-chhiūⁿ ka-kī."
