Thoân-tō Pò-kok

Tâi-pak: Phoaⁿ Tō-êng

1941年8月677期     25

  Kin-á-ji̍t ê thoân-kàu-chiá , chèng sìn-chiá, nā boē thang ēng thoân-tō lâi pò kok, chiū hit ê kî-hoē éng-oán bô koh lâi ah! "Thoân Hok-im , thoân Hok-im, bô thoân ū chai ē: lán ê tông-pau ji̍t-ji̍t tîm-lûn, thèng-hāu lí chín-kiù"

  Beh cháiⁿ-iūⁿ lâi thoân-tō?

  1. Kám-hoà ê thoân-tō: Ta̍k ê sìn-tô͘ it-giân it-hêng(一言一行), ta̍k-sî lóng thang hiàn hō͘ Chú , lâi kiù lâng.

  2. Kàu-io̍k ê thoân-tō: Tuì Chú-ji̍t-o̍h ê kàu-io̍k, tio̍h ka-poē koan-sim. "Tò-tńg tī Hok-im-tek ê sù-bēng": che sī hiān-tāi S.S. tong-kio̍k-chiá tio̍h tuì chit hong-bīn, chài khó-kiù--i.

  3. Bûn-hoà-tek Hok-im sū-gia̍p: Chiū-sī Loē-tē hiān-sî só͘ teh ko-tiāu cheng-sîn-tek siā-hoē-gia̍p:

    1) Pó-io̍k sū-gia̍p(保育事業)

    2) Kiān-khong siong-tâm sū-gia̍p(健康相談事業)

    3) Sin siōng siong-tâm sū-gia̍p(身上相談事業)

  Kî-thaⁿ kìm-chiú kap sûn-kiat ūn-tōng, hit hō.

  4. Bûn-su thoân-tō: Pún-tó Kàu-hoē kiàn-siat kàu taⁿ 70 goā nî kú, tuì lāi-pō͘, chí-ū Tâi-oân Kàu-hoē Kong-pò teh poê-iúⁿ sìn-chiá ê sìn-gióng seng-oa̍h. Che koh sī Pe̍h-oē-jī--ê, boē thang 10 hun phó͘-ki̍p. Tuì goā-pō͘, thang kóng lóng bô. Kàu-hoē kàu taⁿ ê thoân-tō ǹg tī tiong-liû í-hā ê lâng; tiong-liû í-siōng--ê chha-put-to lóng bô kan-sia̍p.

  Phí-jîn tuì chit tiám teh siūⁿ, ū tit-tio̍h pêng-iú ê chàn-sêng, chiū muí-ge̍h ū hoat-khan chi̍t khoán 生命誌(oa̍h-miâ-pò), sī ēng Hô-bûn-siá--ê; choan-choan beh choè thoân-tō ê lō͘-ēng. Í-keng hoat-hêng kàu tē 7 hō. Toê-ba̍k siá tām-po̍h hō͘ lia̍t-uī chham-khó:

    1. 人間の價值

    2. 永遠の生命

    3. 基督教の中心

    4. 基督教とは

    5. 人生の意義

    6. 新体制とキリスト教

    7. 人とは何ぞや

    8. 宗教どは何ぞや

    9. 人類救極の三大要素

    10. 宗教の必要

    11. 興亞とキリスト教

    12. 精神生活に於ける戰爭

    13. 個人生活に於ける道德

    14. 宗教の由來

    15. 人生の基調

    16. 人生の第一義

    17. 人生と宗教

    18. 友ふるイエス

    19. 時艱克服の動力

    20. 時代の變轉期に立ちて

    Muí ge̍h lóng kià sàng tī Tâi-pak chhī-lāi ê Koaⁿ-lī , Kàu-siū, I-su, Piān-hō͘-sū kap iú-sek kai-kip--ê. Hiān-chāi sī Lí Sūn-thian Tiúⁿ-ló teh hū-tam hit ê só͘-huì: pe̍h-pe̍h sàng lâng tha̍k. Lia̍t-uī nā ū kám-kak kuì kàu-hoē khiàm-kheh tuì iú-sek kai-kip ê thoân-kàu--ê, chhiáⁿ khui-khoah lâi thoân-pò Hok-im. Nā ū him-bō͘--ê, hiān-chāi só͘-huì thang chū-iû- kià-hù, chiū hó. Goán chit-tia̍p só͘ ìn ê pō͘-sò͘, sī tú-tú hó nā-tiāⁿ. Bo̍k-tek: sī tuì bī-sìn-chiá ê thoân-tō; bô ài siá siuⁿ tn̂g. Lia̍t-uī, nā ū sî-kan hoaⁿ-hí kia̍h pit saⁿ oān-chō͘, chin hoan-gêng. Só͘ toā-toā pài-thok--ê, sī ǹg-bāng tho̍k-chiá chu-kun, ēng kî-tó saⁿ èng-oān, sī chin bān-hēng.