Ji̍p-īⁿ kám-kek Ti-chiok-koa

Koa Î-su

1941年10月679期21

Chhit ge̍h 27 àm ji̍p-īⁿ , 8 ge̍h 14 ji̍t siá koa.

1. Goá ji̍p-keh-lī tē 3 sek,

Thang mn̂g kap piah chhat sam sek,

Thô͘-kha phú sek thian-pán pe̍k,

Sóng chhn̂g jī téng pâi kok sek.

2. Ji̍t mî sok-chēng bô siaⁿ-seh,

Tó-chhn̂g an-chēng m̄ thang chē,

Hoān-chiá chho͘ lâi sī lim ám,

Jia̍t-tō͘ kàng-kē chiū chia̍h bê.

3. Chia̍h bê bô hê sī phè hî,

Moâ-sat-ba̍k , bián, sī hó hî,

Moâ-sat-ba̍k hî ū àm-chhì,

Ū-sî tāu-hū kap bián-hî.

4. Ji̍t-si̍t lóng sī chu-ióng hun,

Hoān-chiá ta̍k ê phè ū chhun,

Khó kiong khó hō chèng i-oân,

Ló-iù hoān-chiá sim an-choân.

5. Lāi-iông goā-koan chin iu-siù,

Khàn-hō͘ hong-hoat sī it liû,

Hoān-chiá ji̍p-īⁿ chin chheng-hiu,

ún-tàng pêng-an thiam hok-siū.

6. Kám-siā kàu-hoē gâu î-chhî,

Hiān-kim boē pí kó͘-chá sî,

Sêng-chiap se i oá chi̍t-nî,

ĪN-tiúⁿ i-oân gâu phoè-tì.

7. Má-kai I-īⁿ ê sū-gia̍p,

Chiū-sī kàu-hoē toā kan-sia̍p,

Choân-oân pān-sū ke̍k siap-tia̍p,

uī Chú hōng-sū chin hô-hia̍p.

8. Tng-sî Iâ-so͘ thoân tō-lí,

Chio-chi̍p ha̍k-seng I kà-sī,

Koáⁿ-kuí thoân-tō kap i-tī,

Hoan-hù ha̍k-seng chhin-chhiūⁿ I.

9. Iâ-so͘ kóng lán chiū-sī siâⁿ,

Eng-kai kian-kò͘ kiam toan-chiàⁿ,

Lán tio̍h chhin-chhiūⁿ chiò-sin-kiàⁿ,

Chèng-lâng oē khoàⁿ kiàⁿ-lāi iáⁿ.

10. Iâ-so͘ kóng lán chiū-sī iâm,

Lán chhuì m̄-thang kek tiām-tiām,

Pò lâng choē-ok ê guî-hiám,

Sèng-keng chiàⁿ-sī chí-lâm-chiam.

11. Lán lâng sim-sèng ná hî-bah,

Nā ū chham-iâm chiah oē ha̍h,

Bô lūn loā hó ê koe ah,

Sit iâm hiat-tiú chèng-lâng ta̍h.

12. Iâ-so͘ kóng lán chiū-sī kng,

Lán kng m̄-sī beh siu-khǹg,

Eng-kai tio̍h chiò kàu chin hn̄g,

Tì-ì chhiō lâng ji̍p Thiⁿ-mn̂g.