Ngiâ-chih Sèng-tàn
Keh Hô͘-lia̍t
1941年12月681期 17
Kiù-chú Sèng-tàn kàu lah, choân toē-bīn-chiūⁿ ê kàu-hoē put-lūn lâm-lú ló-iù, ta̍k ê lóng chin hoaⁿ-hí . Chú Iâ-so͘ chhut-sì tng-sî thiⁿ-sài , thian-kun gîm-si o-ló , kò͘-iûⁿ ê kui êng-kng o-ló Siōng-tè, tang-hng ê phok-sū iā "hoaⁿ-hí kàu boē kò͘-tit." Tī Sèng-tàn ê sî, gín-ná hoaⁿ-hí siúⁿ-phín kap sèng-tàn-chhiū ê suí, seng-lí lâng hoaⁿ-hí sèng-tàn toā-boē-chhut ê lāu-jia̍t, ū lâng hoaⁿ-hí sèng-tàn ê sàng mi̍h, chóng-sī lán sī hoaⁿ-hí "Í-má-loē-lī" hoan-e̍k chiū-sī Siōng-tè kap lán tī-teh. Tuì Í-má-loē-lī lán khí-thâu chiah khoàⁿ-tio̍h Siōng-tè pún-sin. I tī Iâ-so͘ Ki-tok lâi chhē lán, I bô iàu-kín ka-kī tio̍h tī pi-bî lâi khó-lîn lán, uī-tio̍h beh thoè lán ê choē siū hêng-hoa̍t, chhe-khián Iâ-so͘ Ki-tok lâi kàu sè-kan kap lán tī-teh. Che sī lán choè-toā ê hoaⁿ-hí . ēng chit khoán hoaⁿ-hí lâi ngiâ-chih sèng-tàn ê lâng ū hok-khì!
Lán ê Chú Iâ-so͘ Ki-tok chhut-sì tng-sî ū thiⁿ-sài kap choē-choē thian-peng o-ló Siōng-tè, ū kut-la̍t koh khiam-pi ê kò͘-iûⁿ lâng lâi hóng-būn Chú, ū tang-hng ê phok-sū lâi pài Iâ-so͘ , soà hiàn in ta̍k lâng só͘ pī-pān choè-hó ê lé-mi̍h tī I ê bīn-chêng. Tī chia lán oē thang khoàⁿ-tio̍h ngiâ-chih Sèng-tàn ê cheng-sîn. Tī Sèng-tàn ê sî-chiat lâng khah oē kì-tit tio̍h khui lāu-jia̍t ê chiok-hō-hoē, chiū-sī âng-hoe-liú-le̍k ê sek-tiûⁿ kap sèng-tàn-chhiū, hó-thiaⁿ ê si-koa kap sim-sek ê hì-chhut, choē-choē hit khoán nā hō͘ lâng oē sim-sek kap hoaⁿ-hí , sui-jiân bô ha̍h chú-toê iā bô iàu-kín ê chhut-thâu. Chóng-sī tī ngiâ-chih Sèng-tàn ê sî, tio̍h koh-khah oē kì-tit lán ê Chú Iâ-so͘ chhut-sì hit sî tī bé-thâu, chiū-sī chí-ū chháu-pîⁿ thang jia hong-hō͘, chí-ū bé-chô choè chhn̂g-pho͘ ê sek-tiûⁿ, koh-chài tio̍h koh-khah oē kì-tit tī hit ê sek-tiûⁿ lāi jîn-bu̍t kap hiah ê jîn-bu̍t ê cheng-sîn kap thài-tō͘, tī hit ê sek-tiûⁿ ê tiong-sim ū uī-tio̍h choē-jîn hoaⁿ-hí hi-seng lâi chhut-sì ê Chú Iâ-so͘ , tī hit ê téng-bīn ū thiⁿ-sài kap choē-choē ê thian-kun ê o-ló, tī hit ê chiu-uî ū Má-lī-a ê kèng-khiân, Iok-sek ê gī, ū kò͘-iûⁿ ê khûn-bián, khiam-pi, sìn-nāi kap thoân-tō cheng-sîn, ū tang-hng ê phok-sū tuì Chú Iâ-so͘ ê chun-kèng kap hōng-hiàn.
Cha̍p-jī ge̍h 25 ji̍t sī Kiù-chú Sèng-tàn , chóng-sī chin thang khó-lîn ê, chiū-sī choē-choē lâng bô ū chin-si̍t ê Kiù-chú Sèng-tàn , tī la̍h-ji̍t chiūⁿ ū Kiù-chú Sèng-tàn, tī lâng ê sîn-lêng chiūⁿ bô ū sèng-tàn tī-teh! Lán ta̍k lâng nā ū Sèng-tàn hó ê cheng-sîn , chiū-sī sìn-nāi Chú, o-ló I, chun-kèng I, hōng-hiàn choè-hó ê mi̍h tī I ê bīn-chêng, soà o̍h I ê hi-seng, ū kèng-khiân, kong-gī, khiam-pi kap thoân hok-im, sui-jiân bô ū lāu-jia̍t ê sek-tiûⁿ kap chhut-thâu, í-keng ū ha̍h tī ngiâ-chih Sèng-tàn.
Tī chit ê kok-ka khùn-lân ê nî, tī chhèng-āu ê kok-bîn só͘ khiàm ê chiū-sī chin-si̍t ê kèng sîn, kong-gī , hi-seng kap khûn-bián. Lán tī chit ê sî beh tuì chin-si̍t ngiâ-chih 1941 nî ê Kiù-chú Sèng-tàn lâi êng-kng Siōng-tè , tuì án-ni beh kiong-kip tī choè kok-bîn tī chit ê hui-siông-sî bô boē ēng tit ê mi̍h.
