首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 教會的練成
教會的練成
卷期：第681期 本次： 日期：1941/12 刊名：台灣教會公報/北部教會 頁數：20-24
篇名：教會的練成 [ Kàu-hoē ê Liān-sêng ]
作者：黃六點 N̂g La̍k-tiám
  顯示 : 漢羅 全羅 並列  

教會的練成

黃六點

1941年12月681期     20-24

 

  今仔日的時代「練成的問題」，真對重有青年的練成，指導者的練成，宗教家的練成，相佮聚集佇一所在幾若日久受訓練。練成的問題通講是國民的再教育，指導者的再訓練，因為佇這个時國民著把握日本精神的精髓，來做一个無見笑的皇國民。向國家所囥的理想佮目標來進行，所以才著聚集chiah 的中心人物，chheng-chòng-chiá佇一所在來相佮食，相佮睏，相佮受教示，受造就得著liân-moâ人格。學堂，會社，團體，抑是保甲真對重勤勞奉事，也是欲涵養這款的精神，也這个是欲入佇新時代無袂用得的精神，因為舊的時代，舊有勢力佮思想teh過去，對這時起欲入佇指導的來受練成。

  國家著受練成，教會閣較著，也這个練成著覺悟甘願經過生產的艱苦才會達成所囥的目標。關係教會佮練成的事咱看馬可3：14，15所記，主耶穌揀12人的事，通看耶穌teh練成伊的學生，學生佮伊相佮佇teh ，一面通幫贊耶穌，siāng時佇佮耶穌相佮做陣的中間，也通受好的訓練。Chiah 的學生猶未受練成誣告是討魚抽餉的普通人，若是經過3年佇主身邊的練成，了後in會出去傳道理醫病趕鬼，行神跡(馬可6：7-13)。後來成使徒繼續主耶穌救靈的精神來建設初代堅固的教會。

咱欲想教會練成的問題，就是看咱欲怎樣佇主的身邊來受練成，予咱的教會綴信徒的腳步，得著耶穌的精神，倒轉到親像初代的教會。

為著欲到初代教會彼款永遠的發展，咱應該著有捌家己，捌教會，捌世界的大勢才會得全體的的理解，來達練成的目的。

    現時就是著睏醒的時，就是著徛佇全體來反省家己對教會的態度，捨小我就大同，看怎樣才會親像使徒時代的教會來榮光上帝的教會。信徒teh冷淡背道對教會無關心，明明是對信仰生活的訓練無夠額，因為咱真自由，放縱家己的私慾。所以保羅講，「我拍我的身軀到thiám-thiám予伊降服」(哥林多前書9：27)。咱的教會真欠拍身軀thiám-thiám實行的方面，卻咱毋是對這來得救，iáu-kú也是信仰生活的一要點。對耶穌40日久去曠野禁食祈禱，保羅3年久佇阿拉伯的生活，予咱通看見宗教tek練成的重要性。主耶穌佮保羅to著受練成何況咱今仔日的教會。

  教會的練成所向的目標，是欲造就kiān-si̍t無見笑會做耶穌基督的代表彼款的基督徒。按呢教會若受練成就會出濟濟實際的，不言實行的基督徒。對個人的講較明就是信徒一个一个受鍛鍊到會曉對顧家己，愛蘇爽，毋愛努力的身軀轉過來做有感覺使命，為道理有刻勤，刻苦，gâu吞忍的心，閣進到會掠背十字架做歡喜彼款的精神才是真的練成。因為忍苦，背十字架是基督徒的記號佮特權，佇這个精神，初代教會得著建立。基督教的歷史是迫害的歷史，佇這款的精神來受迫害的時教會會愈興旺。

保羅講：

  M̄-nā按呢，就佇患難也歡歡喜喜，因為知患難生出吞忍，吞忍生出老練，老練生出向望，也向望無致到見笑(羅馬5：3，4)

對這句通知保羅對當時的信徒所第一高調的，就是吞忍的精神，練成就是鍛鍊，欲經過鍛鍊著有相當的吞忍。咱若有得著這款的精神，就毋免過頭掛慮咱的教會。

按呢練成是教會所袂通無--ê。Taⁿ教會欲怎樣來受練成，愛對實際方面來看幾若項。

  A. 精神方面的毛病。

以前的人看基督教是番仔教，信徒看教會是宣教師佮傳教者的，甚至也有傳教者想家己是予宣教師倩，所以愛看in 的頭面，這卻攏有緣故，總是這是咱真大的毛病。Taⁿ宣教師轉去，傳教者轉任，若是教會永遠佇咱中間，證明教會是咱的。信者若看教會是牧師的 ，彼間教會oh進步，對一到十攏著傳教者的工，連piàⁿ拜堂也是牧師的額，致到傳教者若有事故，教會運行的機關攏著停起來。這毋是kan-ta傳者佇牧會上oh吐氣的問題nā-tiāⁿ，就所努力的也是袂起色，萬年袂進步，予主teh艱苦，親像目睭內袂通容允一粒土沙的款。新時代的教會也袂通容允這款毛病佇教會中。教會毋是傳教者的，in是指導者nā-tiāⁿ，也長執，會友著相協力，大家看教會是咱的，精神按呢180度的大變換，來鼓舞教會才會振興。願咱有疼教會的心無較輸佇疼家己的家的心佇teh。

  B. 信仰的幼稚。

咱的信仰是信耶穌會得著，上帝是咱的天父，耶穌是咱的救主......這自然是咱信仰的根基，iáu-kú你所teh信的若是照人所講予你按呢去信nā-tiāⁿ，就這款的信仰是幼稚，實在有欠體驗。關係信仰方面你捌深想上帝的恩典，耶穌佮你的關係等等抑無？若毋捌你的信仰無顧是聖經的蓄音器，信仰的機器的理解佮模仿nā-tiāⁿ。無有體驗的信仰實在是幼稚，因為咱的信仰幼稚，所以承認咱的教會無力。請想初代教會信仰的特色，是個個的使徒，個個的基督徒攏有體驗的信仰teh做in 的大氣力。In所體驗的內容雖無相同，iáu-kú所共通的就是活活的基督有佇in中間佮in相佮teh做工。抹大拉的馬利亞，彼得，約翰，Í-má-ngó͘路上的學生，僥疑的多馬，抑是後來的保羅，in雖然平平有體驗見著閣活的主，若是彼个方法，樣式是一人一款。這不止通幫贊咱理解，要緊著有體驗的信仰。你怎樣知上帝是天父，耶穌是救主，聖神是先生？若會用你的體驗來理解，就這款的信仰欲得著大氣力。

西洋人所理解傳予咱的基督教，咱若無消化全部共接納來，就這款欲變做模仿，抑是講加圇吞的基督教，袂合佇咱的新時代。今仔日的聲teh提倡著建設日本tek基督教，就是這个因端。

  C. 教會的財政著確立。

  教會的財政就是對信徒的獻金，信徒若有盡獻金的本份，教會的財政就會確立。過去咱的教會對獻金無甚物慣勢，教會攏是對外國信徒的獻金來teh維持。Taⁿ這款的時代過了，咱會料理家己的教會。較早teh招人來聽道理，共in講毋免錢閣通省燒金紙的所費。這款的宣傳不止合佇台灣民族的心理，因為台灣人真歡迎省本閣道理，拜上帝毋免錢閣通得著救，為著按呢獻金的精神無涵養。

  Taⁿ著大大練成咱獻金的精神。

佇今年拄著宣教師的引揚，各教派有受財政tek真大的打擊。欲繼續in 的傳道機關，有教派比佇宣教師時代著加獻9倍；4倍，2倍，至少有ka-gō͘的加添。若是台灣的教會，對宣教師歸國後咱加獻偌濟。In轉去上帝用較重的責任交託佇咱，咱有加擔當偌濟。咱的獻金欲親像前的款用chhun才欲獻，抑是chhìn-chhái la̍k袋仔角摸一sián來獻，彼款佇這个時著通相佮反省。聖經講，「恁的錢佇遐，恁的心也佇遐。」

佇近日的福音新報有寫朝鮮教會攏有teh實行十份一的獻金，所以雖拄著宣教師的引揚，in 的教會也是徛在，也有夠額的力通建設，袂輸宣教師所設法--ê。前也捌讀著in 的信徒賣牛來獻金，也父囝做牛來teh犁chhân，這夠額通做咱他山的石。總講。台灣教會的獻金的確著進步，傳教者佮長執著出現實行十份一的獻金示範佇眾信徒。舊約獻十份一的精神毋是用chhun，抑是chhìn-chhái，著揀上好的 sèng-pia̍t才來獻。新約的獻金用アーメン的精神，無拄拄著獻偌濟，若有用心所歡喜，所以新約時代咱的獻金的確毋是感覺重擔。咱若有這款的練成，教會的財政通樂觀。

  D. 對禮拜的態度通考慮。

  靈性的生活就是人佮上帝交陪，上帝佇起頭照伊的形狀來創造人，就是欲予人佮伊接接交陪來敬拜伊。咱有疼教會好的精神，有體驗活活的信仰是要緊，也chiah 的精神信仰是欲予咱對上帝有四正的態度來禮拜伊。

  Taⁿ咱現時教會靈tek生活的狀況啥款？寫幾若項排列相佮反省：─

  1. 咱對禮拜早起的禮拜逐位是較choē-cháⁿ，m̄-kú暗時的禮拜真少人，不止通掛慮。Kiám是早起時的上帝有較大仙，抑是咱欲去做禮拜已經成做習慣的的都合主義。

  2. 對聖日的禮拜是真要緊的聚會，總是真濟信徒；甚至長執有的也真久毋捌到拜堂。咱遮人來拜上帝較常人會teh無閒，魔鬼猶原會用這來迷惑信徒，致到信徒猶原閒才欲禮拜，抑是都合好勢，心適hèng 的時才欲來。也人起頭聽道理真致意守禮拜，若是無久看見某會友聽道幾十年，某人當職to攏無有致意禮拜--ê，予hoan心肝生起僥疑的時，就liâm-piⁿ受傳染。

  3. 毋是袂曉對重嚴守聖日，紲俗化禮拜日。有濟濟基督徒猶原堂堂佇禮拜日做生理。公休日m̄-nā無來禮拜，反轉佮一般siāng款去享受世間的娛樂。

  4. 有時人想無去禮拜對牧師真袂得過，因為伊來十招八招；閣一款對牧師約欲來，若是10擺毋捌來一擺這款牧師禮拜，予人招也毋來，禮拜實在真可傷。

  5. 有人雖然有teh守禮拜，若是離開禮拜的精神真遠，毋捌禮拜的精神真遠，毋捌禮拜的真意，to逐禮拜行慣勢，若無來跤ngiau-ngiau，到拜堂就講閒仔話，攏無teh想欲備辦敬虔的心，到禮拜中有的猶teh講話，有的出出入入，有的紲tuh-ku，致到禮拜袂莊嚴，聽道理無致意liâm-piⁿ袂記得。有的時間無遵守，到欲閉會的時才到位。這款雖然有來禮拜，也是袂通得著靈的米糧。

  以上這款的現象，實在予牧者不止通掛慮。也咱的大牧者主耶穌看了毋知欲怎樣，請咱體貼耶穌的心，大家對上帝有四正的態度來敬拜伊。

  E. 全體的教會。

  佇舊年忽然間宣教師引揚歸國彼時，有人不止毋慣勢，對教會的前途真掛慮。我想這是上帝欲練成咱有自主獨立，家己通做指導者的一个真好的機會。

宣教師引揚後有神學校的鬧動，醫館的問題往來佇咱的頭腦中，一時袂免得有淡薄風評。若是遮也是欲chhoā咱入佇新時代的一个過度期nā-tiāⁿ。佇教會政治中有種種意見的對立，有這位彼位見解的無siâng。這派彼派主張的各樣，致到袂免得有淡薄紛爭佮衝突。若是欲入佇新時代--ê，taⁿ袂通閣容允按呢，因為時代佮背景攏換，咱看國家的政黨攏kái-siau來成做這个統一的運動。本國的教會攏成做一个合同的教團lah！咱佇教會中袂通閣親像自由思想的時代，來主張我屬基督，你屬阿波羅。卻過去咱佇自由思想的背景中受培養到今仔日，若是現時袂通有這款的偏見來主張黨派。無論基督黨，保羅黨以及一切的黨攏kái-siau，大家佇基督的內面相佮做成信仰復興有意義的救靈運動。

  以上所寫抄了嶄然長，閣是佇病床中寫--ê，袂免得所講散散，不過予咱知現實的教會是無完備，袂通釘上帝的意，練成的 鍊是鍛鍊，成是成，教會的 練成是將今仔日這款無完備的教會，大家相佮協力鍛鍊到成做上帝所期待歡喜的教會。

求主賞賜咱得著這款的力。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461