馬偕醫院新院長
上山生
1941年12月681期 25
北部教會所經營唯一的醫療機關，馬偕醫院對接收以來，雖然無有一時tek 的變化，總是漸漸有teh發展的勢面。照院長李達莊先生佇10月中已經辭職，理事會慎重chhoan-hêng 的結果，滿場一致決定愛聘請本院理事稻田天來(稻田天來)先生做後任院長。交涉的結果有得著伊歡喜承諾。佇10月25日已經就任，稻田先生對大正六年有去南洋英領北ボルネオ得著倫敦政府的免許任命，總督府病院醫官佮做タワオ政府病院的院長。後來有家己開業，得著真大的成功，到佇滿州事變的時才轉來台灣開業同仁醫院佇台北市太平町 ，亦是真有人氣，伊的專門是內科佮小兒科。這擺咱馬偕醫院會通得著伊來做院長，予咱大家真通安心的所在。
稻田先生現在是三重埔教會熱心的長老，對教會真出力奉事。伊的體格懸大閣不止有經營的才。大家對伊khē真大的期待，向望此去的院勢會大大發展。對稻田院長就任以來，院內的制度漸漸改善。對外來的患者每日診察。時間lē-hêng，毋免予患者等到過晝。用親切佮應患者的便利做第一。對按呢經營的成績漸漸teh向上。若照這款的勢面，實在有閣khóng中新設耳鼻咽喉科佮齒科的必要(現知計畫中)卻現時的施設佇島內私立綜合病院中，已經通講是第一位。現時病室眠床70頂，職員院長以下五十外名。馬偕醫院的傳統是產婦人科外科做第一出名，現時產婦人科的院長是醫學博士陳Kéng-siông先生。眼科院長周Siù-ngô͘先生。內，小兒科是院長稻田天來先生擔當。各科攏是有經驗老練的先生，予患者會通絕對安心信用。向望列位看報的兄姊大大為著咱的馬偕醫院宣傳招呼人來利用予in m̄-nā醫好in 的肉體亦會得著福音真的地理來救in 的靈魂。 |
