發刊辭
對主後1872年偕牧師到北部台灣設教到今，已經有53年久lah!論教會ê狀況，兄弟姊妹逐人知，毋免我詳細排列；不過佇即53年ê歷史中，咱北部ê教會有經過設教ê時期，照咱ê自覺kap所培ê力，佇教會中有濟濟法度ài促進咱ê教會，總是猶袂夠額。
論傳教ê事，咱若看過去ê歷史，就知各宗教佇in ê創始時代，攏是用口述ê方法（用喙傳）；後來就利用文字來做in宣教機關ê一項。
今咱北部ê教會已經有hiah久ê歷史，若講有啥物文字章ê刊行物來做培養新的ê路用á無？實在真少。佇濟濟年ê中間，咱會內兄弟姊妹teh欣慕，koh中會也有計劃ài家己經營一個教會報thang加添咱擴張教會ê機關。
到今年ê春季中會有議定beh實行創設，有託幾若位擔當這个工。今in有盡力包辦好勢已經beh發行創刊號，實在thang感謝上帝。
所ǹg望就是上主ê引chhōa kap會內兄弟姊妹ê盡力，hō͘這粒芥菜子得著茂盛。
北部中會議長
郭希信 |
