首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 咱看囡仔有著無？
咱看囡仔有著無？ 影像(3)
卷期：第 1 號 本次： 日期：1925/7 刊名：芥菜子 頁數：20-22
篇名：咱看囡仔有著無？ [ LÁN KHOÀN GÍN-NÁ Ū TIOH2 BÔ? ]
作者：陳芳本 Tân Hong-pún
  顯示 : 漢羅 全羅 並列  

咱看囡仔有著無？

     愛連荊女士teh講20世紀就是囡仔ê世界。今仔日ê傳教，猶久救大人，攏無致意救囡仔，按呢咱teh傳救道，beh建設天國佇地裡一款ê方法是不完全。請看（箴言22:6.）「著用道理教示細囝到老無倍」按呢thang知教示囡仔是真要緊，也是根本的傳教ê方法，就是家庭ê基礎教會ê地基，宗教ê大石磐。照咱所知北部教會今仔日論宗教教育thang講無啥teh設法。囡仔怎樣著救in？有5項：－

1.      「囡仔kap大人平平是罪人」（羅馬5: 12.）人既然有罪，囡仔也是人。耶穌ê教示是beh救有罪ê人，無講干但beh救大人若定。

2.     救囡仔是上帝ê旨意，也是伊所要緊--ê。「失落遮个細囝 ê一个，毋是恁天父ê旨意」（馬太18: 14）

「予信我ê細囝去犯罪，彼個人著用牛帽石吊tiām-kún：填落深海是khah好」（馬太18:6.）按呢就是叫咱致意救囡仔。

3.     救囡仔是耶穌ê旨意，koh再是伊本身已經實行--ê。「容允囡仔就近我莫得禁伊」（馬可10:13.）

咱常常開演說會，佈道會幾若日，幾若禮拜幾若月日久beh救大人，按呢是真好；毋過毋捌開兒童傳道一日久á是屬佇宗教教育ê事，來救伊。有時反轉阻擋囡仔毋thang來拜堂擾吵。這是咱ê失錯，是親像歹ê牧者對重羊羔，無對重羊仔囝。

4.     救囡仔是天國ê經濟學：有4項:-

A.     財政ê經濟。用小可ê費用會拯救囡仔真濟。照北部大正13年ê報告，為著4430人ê信者，一年開出70517,00箍；伊ê利益有限，真無經濟；倒爿用遮个錢來鼓舞宗教教育，主日學á是兒童傳道，就彼個功效的確比大人khah大。這是小生深信無僥疑ê所在。

B.     時間經濟。照咱大人已經有濟濟項歹ê流傳、歹ê習慣、舊ê宗教塞稠佇伊ê頭殼內，致到真阻擋伊聽真；beh來改舊換新是真重難；所以beh引chhōa一个大人到伊會得著完全ê信仰來做盡忠ê教會著規世人ê時間，來引chhōa勸勉伊，也無的確達目的。囡仔就毋是按呢，囡仔無遮个阻擋，伊ê頭路真清氣相親像白ê紙猶寫字，ūi痕佇the；所以這个用新ê宗教、新ê道理真快刻稠佇伊ê頭路。

C.     機會ê經濟。咱知大人有家庭ê事務，國家ê事務，有士、農、工、商ê阻擋，致到真無機會thang來聽道理。囡仔無遮个事務ê阻擋，真有機會thang來讀主日學，á是聽道理。

D.    氣力ê經濟。照高萬先生teh講演中，有講一項，就是講起引chhōa一个45歲大人，kap引chhōa 10歲ê囡仔10人，彼個氣力是平平。請咱來想北部教會，53年久開錢數百萬，做工ê先生數百人，若照高萬先生所講來算，將遮个氣力來鼓舞主日學á是兒童傳道，的確會得著引chhōa 44300人。按呢thang知囡仔khah快來做教會。koh再有先生講：「恁著記得，今仔日主日學ê聖道就是明仔日ê教會。」

5.     救囡仔比救大人khah有價值。有4項：－

A.     規世人得著救。

B.     做歹陷落罪惡來害社會khah少。

C.     會做到會ê柱石、地基、棟樑khah久。

D.    會做主ê干證用伊ê光引chhōa人khah久；比並全支ê蠟燭火kap半支á是三分一，來比點光ê時間，增差真濟；所以救囡仔是親像人去買全支ê蠟燭。同僚kap兄弟ah！咱著來khah盡心出力佇這个工。

陳芳本
 
 
 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461