BÊ-SÌN Ê KÒ͘-SŪ
Tī Kui-jîn-pak ê tē-hng, "Gô͘ Lo̍k. Chhî Thòaⁿ." Tāi-ke lóng chai sī chhiò-khe bê-sìn. Chit ê liû-thôan í-keng chin kú, chiū-sī Chheng-tiâu ê sî, Gô͘ Lo̍k, Chhî Thòaⁿ, ūi-tio̍h tāi-chì hō͘ Chheng-tiâu koaⁿ kā in chhiong-kun, chiū-sī kek kòe chúi, tòa pa̍t só͘-chāi; chin kú bô tò-lâi, lâng phah-sǹg in sī sí-khì. Só͘-í ta̍k-pái chng-siā ū lâng phòa-pīⁿ, mn̄g pu̍t chiū kóng, sī Gô͘ Lo̍k Chhî Thòaⁿ beh lâi thó-chia̍h, kau-tîⁿ. Ta̍k sian pu̍t lóng sī án-ni kóng, tì-kàu chin chhut-miâ, hiuⁿ-ian bô tn̄g, tâu-hē ê lâng chin-chē. Nā chháu-khám ū lâng hē liáu Phòa-pīⁿ hó, chiū kā in thâi-ti, tó-iûⁿ, ngiâ-pu̍t chò lāu-jia̍t.
Ū nn̄g-ê lāu-lâng tùi hn̄g-hn̄g lâi khòaⁿ lāu-jia̍t, chiū mn̄g siáⁿ-sū; ū lâng kā in kóng, lí kiám m̄-chai, Gô͘ Lok Chhî Thòaⁿ ê lêng-kám,------? Nn̄g-ê lāu lâng thiaⁿ liáu, chiū cháu ji̍p chèng-lâng ê tiong-kan kóng, "Góan chiū-sī Gô͘ Lo̍k, Chhî Thòaⁿ."
Chèng-lâng thiaⁿ liáu hōa-hōa kún, ū lâng ài khòaⁿ, ū lâng ài mn̄g, ū kúi-nā ê lāu lâng lâi jīn khòaⁿ, kó͘-jiân sī, mn̄g liáu kó͘-jiân tùi. Hit-sî tāi-ke hoah pe̍k-chha̍t pu̍t, phah-phiàn lâng, ū lâng beh lia̍h sai-kong, ū-ê beh phah âng-î, lāu-jia̍t soah, seng-lé siu.
Sio̍k chit khóan ê bê-sìn Tâi-ôan kài-chē. Tùi án-ni thang chai, Lâng teh húi-pòng ji̍p-kàu-kúi, thau lia̍h ti, tì-kàu ti tio̍h un-e̍k che iû-gôan sī chhiò-khe pe̍h-chha̍t ê bê-sìn.
Lán ū tek-chōe Siōng-tè chē-chē khóan. Siōng-tè chhe Iâ-so͘ chhōa lán kap Siōng-tè hô. Hō͘ lán tùi Iâ-so͘ ê kong-lô, tit-tio̍h sià-chōe. I ū thòe lán pī-pān só͘-chāi, beh hō͘ lán tiàm tī I, I tiàm tī lán. Só͘-í ji̍p-kàu lâng sí, lêng-hûn bô tiàm tī sè-kan, sī tiàm tī Siōng-tè tau. (Iok-hān 14:14.)
Iûⁿ Sè-chù
