LÂM SÌ HOAN
Chit-pái góa khì Hoe-liân-káng hù Hùn-heng-hōe, sūn ki-hōe góa gián-kiù Làm-sì-hoan ê chōng-hóng, put-chí ū chhù-bī, taⁿ lâi pâi-lia̍t siá tī ē-tóe, pò hō͘ tāi-ke chai-iáⁿ.
1. Lūn in ê chó͘-sian. In ta̍k ê lóng kóng m̄-chai iáⁿ, ū chi̍t ūi ê phok-sū khì kā in thiu-huih lâi gián-kiú, kóng sī kap Má-lâi cho̍k saⁿ-tâng, án-ni phah-sǹg sī tùi Lâm-iûⁿ lâi khah tōa-bīn, in-ūi kap bêng-chheng iā saⁿ ha̍h: tī Hoe-liân káng thiaⁿ hit-pêng, ta̍k ê lóng kiò in lâm-sì-á.
2. Lūn in ê khiā-khí. Lóng sī pîⁿ-iûⁿ; In ê hoan-siā chin chheng-khì siùⁿ, lō͘ chin tōa tiâu, tiâⁿ chin khui-khoah, ū tek-ûi, ū chhiū chin hó khòaⁿ. Chhù, sī ēng chháu khí ê, kē-kē; kūn-lâi put-chí chìn-pō͘, ū ê kah-tàng khí, chhù téng khàm iân-phiáⁿ put-chí chhù-sū, iā ū khan tiān-teng.
3. Lūn in ê seng-o̍ah. Tāi-khài kap lâng saⁿ-tâng, put-kò teh chia̍h ê sî, bô ēng tī ngeh, sī ēng chhiú ni; ū 3 hāng in chin tùi-tiōng; chiū-sī chiú, hun, kap pin-nn̂g; bô chia̍h bōe ēng-tit.
In ê hun chi̍t ki chhit poeh chhùn tn̂g, chin tōa kho͘, lâm lú lóng ài chia̍h, put-sî chi̍t ki tu tī chhùi-ni̍h, nā bô chia̍h hun iā tio̍h chia̍h pin-nn̂g, nā bô bōe khòaⁿ-o̍ah. Tī in ê hoan-siā chhiⁿ-á chèng chin-chōe, tī in ê hn̂g iā chèng hun-hio̍h: in-ūi chit khóan ê mi̍h, in put-sî khiàm-ēng.
4. Lūn in ê sū-gia̍p. Lóng-sī choh-sit, chòe kang, lâm lú lóng ū khùi-la̍t thang chòe; ū-ê hō͘ lâng chhiàⁿ, ū-ê khi pok-chāi, ū ê hō͘ koaⁿ-thiaⁿ chhiàⁿ sàu ke-lō͘. Só͘ thàn ê chîⁿ, chin ài bóe chiú, iā ài bóe gû-chhia, khah ōe tit kè ê ta̍k ke ū gû-chhia, siông-siông thang chài mi̍h khì koe-chhī bōe.
5. Lūn in ê siā-kui. Chin chun-kèng lāu-hoan, i ê bēng-lēng chin thiaⁿ m̄-káⁿ ûi-ke̍h, tī lō͘-ni̍h saⁿ-tn̄g-thâu, siàu-liân ê, tio̍h seng mn̄g lāu ê, nā beh kéng thâu-ba̍k iā sī kéng lāu--ê, iā hit ê siū kéng ê lāu hoan beh chòe thâu-ba̍k, tio̍h ū sè-lek, gâu kóng ōe, hoah ōe tāng, chia̍h ōe ēng-tit. Nā ū tú-tio̍h tāi-chì, tio̍h hō͘ lāu hoan, kong-phòaⁿ, nā hōan-tio̍h kan-îm ê sū, tio̍h ho̍at chiú kap ti á-sī gû; nā hōan-tio̍h oan-ke, saⁿ phah, thau-the̍h, tio̍h ho̍at kim; nā thâi lâng tio̍h kek-chhut siā, i só͘ ū ê mi̍h tio̍h chhiong-kong.
6. Lūn in ê hong-sio̍k. Chi̍t nî tio̍h kúi nā pái chòe-hiòng, ū ê kóng chòe saⁿ-la̍k-kiau, ū ê kóng chòe tiān, lóng saⁿ tâng; khah siông sī tī siu-tang liáu ê sî chòe, khah chá nā thâi-tio̍h Tāi-ló͘-kó͘ hoan ê sî iā chòe; beh chòe ê sî tio̍h chhiáⁿ lâng khòaⁿ, hiah ê beh chòe ê lâng tio̍h chhēng súi saⁿ, tì bō-á, chhah khî-koe bé, chhiú tāi-ke tio̍h saⁿ khan, chhut siaⁿ chhiùⁿ koa lâi thiàu, in ēng chit hāng chòe tē-it khòai-lo̍k, tē-it hoaⁿ-hí, lāu-jia̍t.
7. Lūn in ê sìn-gióng. In bô sìn iú-hêng ê sîn-pu̍t, sī kèng bô hêng ê sîn, chiū-sī thian-sîn, nā tú-tio̍h phoah-pīⁿ ê sî, bô ài chia̍h io̍h-á sī chòe kap-á-sai, sio̍k-gú kóng, hoan-á sai-kong, chiū-sī kiò hit khóan khah lāu-pòe chai iáⁿ ê lâi liām, ì-sù sī beh tùi thiⁿ-téng ê sîn kiû, hō͘ hit ê pīⁿ hó, in iā sìn ū sîn-hûn, sí sī khì im-kan, tio̍h chòe kap-á-sai kiò i sí tio̍h khì, m̄-thang koh tńg lâi saⁿ-chhē, iā tio̍h hō͘ góan pêng-an. koh-chài in kiaⁿ kúi, nā beh chhut mn̂g ê sî, phah-kha-chhiùⁿ chiū m̄-káⁿ khì; nā thiaⁿ tio̍h pháiⁿ chiáu siaⁿ, iā m̄-káⁿ khì, nā beh khì lia̍h hî ê sî, tio̍h tāi-seng ēng chi̍t môa-chî hiat tī chúi-tiong hō͘ chúi kúi, nā bô kiaⁿ liáu hō͘ i lia̍h khì.
8. Lūn in ê kàu-io̍k. Chá lóng m̄-bat jī, iā m̄-chai ji̍t-chí, sī kan-ta khòaⁿ ge̍h îⁿ, kap siu-tang, hiān-sî chèng-hú ū siat Kong-ha̍k-hāu hō͘ in tha̍k, tī Hoe-liân-káng hù-kūn ū 3 siā, chiū-sī Tāu-lān, Po̍k-po̍k-á, Lí-lāu, chi̍t 3 siā, ū 700 gōa hō͘, ū 550 ê gín-ná teh tha̍k, tī pa̍t-siā iā ū, siū tiong-téng ê kàu-io̍k ū 7, 8, ê; ū ê tùi Su-hōan ha̍k-hāu chhut-sin, ū ê tùi Lông-ha̍k-hāu chhut-sin, ū kúi nā ê teh chòe Kong-ha̍k-hāu ê sian-siⁿ; iā ū 12 ê teh chòe sûn-cha, hiān-chāi tùi Kong ha̍k-hāu chut-gia̍p ū 6, 7 pah lâng, chiàu khòaⁿ in ê kàu-io̍k ū chiām-chiām teh chìn-pō͘; bô kú ōe kap lâng saⁿ-tâng, in ê khóan, kap lâng chih-chiap, put-chí ài láu-si̍t.
9. Lūn in ê kè-chhōa. Tōa pō͘-hūn sī chū-iû kiat-hun, kap pē-bú chham-siông iā ū, beh kè-chhōa ê sî, sī ta-po͘ nā khòaⁿ tī bó͘ ke ū cha-bó͘ gín-á i nā ài kap i kiat-hun, chiū khì in ê mn̂g-kháu, tôaⁿ chhùi-khîm, chhù lāi ê cha-bó͘ gín-á nā thiaⁿ-kìⁿ chiū chhut khì kap in kóng ōe, chham-siông kiat-hun ê sū; nā tāi-ke ōe saⁿ kah-ì, chiū ōe tiāⁿ-tio̍h: nā bōe ha̍h-ì, chiū kóng āu ji̍t chiah koh chham-siông, nā ōe tiāⁿ-tio̍h chiū kéng chi̍t ji̍t ha̍p-hun, sī ta-po͘ tio̍h ji̍p-khì cha-bó͘ hia, chhin-chhiūⁿ hō͘ i chio ê khóan, beh khì ê sî, tio̍h chio kúi-nā ê pêng-iú chòe tīn taⁿ chhâ khì, chi̍t tàⁿ tiāⁿ-tio̍h sī 8 ki, chi̍t thâu 4 ki tāi-khài tio̍h 8 tàⁿ, chiong chiah ê chhâ chòe phèng-kim, tāi-ke tī hia hō͘ in chhiáⁿ, chia̍h liáu hiah ê pêng-iú chiū tńg-khì, i chiū án-ni tiàm teh. Kôan, kap hō͘-chú lóng sī cha-bó͘ ê, só͘-í in nā-sī siⁿ cha-bó͘ kiáⁿ sim khah hoaⁿ-hí; siⁿ ta-po͘ ê, khah bô ài: in-ūi pa̍t-ji̍t tio̍h khì hō͘ lâng chio. Kūn-lâi ū sió-khóa teh kóe ōaⁿ, bô ēng chhâ chòe phèng-kim, sī ēng chîⁿ chòe phèng-kim, tāi-khài ēng 20 kho͘ á-sī 30 kho͘. Kè-chhōa liáu nā bōe ha̍h, oan-ke ta-po͘ chòe i chhut lâi, āu-lâi koh tò-tńg lâi, hô, iā ū, nā bōe koh hô cha-bó͘ koh chio pa̍t lâng; ta-po͘ koh khì hō͘ pa̍t lâng chio, kūn lâi ū sió-khóa kóe ōaⁿ, hiah-ê siū kàu-io̍k ê m̄-ài hō͘ cha-bó͘ chòe hō͘-chú, ū ê taⁿ ēng ta-po͘ chòe hō͘-chú. Hiām-kim chèng-hú ū kā in chō hō͘-chi̍p, taⁿ beh lî-iân, khah bô hiah lī-piān, nā tú-tio̍h seng-sán ê sî, bô chhin-chhiūⁿ lâng chia̍h môa-iû, koe-chiú, sī chia̍h koaⁿ-bâng sim kap chhài, nā tú-tio̍h lân-sán ê sî, bô ài hō͘ i-seng ēng ki-khì siⁿ, ài chòe kap-á-sai.
10. Lūn in ê chòng-gî. Nā tú-tio̍h sí-sit ê sî, khah-chá sī tâi tī mn̂g-kháu, bô ēng koan-bo̍k, sī ēng chhio̍h kap pang lâi kńg, ēng pin-nn̂g kap môa-chî lâi chè. Hiān-kim ū kóe-ōaⁿ ēng koan-chhâ, iā tâi tī kong-kiōng ê bō͘-tōe, in bô hun-piat tōa lâng kap gín-ná chit hāng put-chí khó-chhú.
I-siōng sī tāi-lio̍k lâi kóng nā-tiāⁿ iáu ū put-chí chōe-hāng, tiāu-cha bōe liáu, ǹg-bāng āu-pái ū ki-hōe thang koh tiāu-cha.
Tân Chheng-gī
