KI-TOK-TÔ͘ TIO̍H CHÁIN-IŪN HÙN-TÒ͘
Kán-lio̍k hun 5 hāng lâi-lūn:－
1. Sū-gia̍p-siōng ê hùn-tò͘,
2. Ha̍k-su̍t-siōng ê hùn-tò͘,
3. Khoân-kéng-siōng ê hùn-tò͘,
4. Jîn-keh-siōng ê hùn-tò͘,
5. Chin-tō-siōng ê hùn-tò͘,
Chit sè-kan chiū-sī chiàn-tiûⁿ, lâng chiū-sī lāi-tiong ê peng-sū, nā-sī ài tit-tio̍h tek-sèng, tek-khak tio̍h ài chhut la̍t hùn-tò͘. Ta̍t-ní-bûn ū kóng "Boē hùn-tò͘--ê chiū su"
Hún-tò͘ sī sím-mi̍h? Chiū-sī hiān-chāi ê lán, hiòng-chêng iàu-kiû lán ê seng-oa̍h, koé-chō sì-uî, í-ki̍p khì-èng khùn-lân. It-poaⁿ ê sè-jîn ēng hùn-tò͘ choè iàu-kín, lán choè Ki-tok-tô͘ kiám thang tiām-tiām teh chē? Ki-tok-tô͘ nā boē oē hùn-tò͘ lâi ín-chhoā siā-hoē ji̍p sin ê seng-oa̍h, beh cháiⁿ-iūⁿ oē hō͘ Thian-kok si̍t-hiān? Thok-ní-su-thài kóng, "Jîn-seng ê ì-gī chiū-sī uī-tio̍h Siōng-tè hùn-tò͘, tuì choē-ok-tiong kiù lâng chhut lâi"; koh kóng, "Jîn-seng sī hûn-tò͘ ê seng-oa̍h, khì-èng sì-bīn, kiám-chió sàu-tû hāi lâng ê mi̍h." Só͘-í Ki-tok-tô͘ tek-khak tio̍h ū hiòng-chêng ê cheng-sîn, bô tehn̂g ê oa̍h-tāng, bô hān ê hùn-tò͘.
Taⁿ chhiáⁿ lâi saⁿ-kap siūⁿ Ki-tok-tô͘ tio̍h cháiⁿ-iūⁿ lâi hùn-tò͘:-
1. Sū-gia̍p-siōng ê hùn-tò: Sū-gia̍p ê sêng-kong, sit-pāi, lóng sī hùn-tò͘ ê khoán-sit. Au-bí bu̍t-chit bûn-bêng ê chhiong-sēng, khoàⁿ in kin-ná-ji̍t tī ta̍k hong-bīn hoat-tián ê chōng-hóng, chiū chai bô m̄-sī in ê hùn-tò͘ ê kiat-kó. Lán choè Ki-to̍k-tô͘ ài chiâⁿ toā ê sū-gia̍p, nā-sī ēng hùn-tò͘ choè cheng-sîn chiū boē-oē; Chóng-sī m̄-thang uī-tio̍h sit-pāi lâi sit-chì, chi̍t-pái ê sit-pāi sī ke-thiⁿ chi̍t-pái ê iat-le̍k, chit-pái ê khùn-lân, ke-thiⁿ chi̍t-pái ê kiàn-sek, "Sit-pāi sī sêng-kong ê lāu-bú" siū sún-sit sī boâ-liān eng-hông lāi-khì. Kì-jiân ū kian-siú kàu-toé ê ióng-la̍t, sêng-kong lī lán bô hn̄g. Tāi-pi̍t oē tit-thang chiâⁿ uí-toā ê kong-gia̍p choè kài-sè ê eng-hiông; mô͘-se oē thang hō͘ Í-sek-lia̍t lâng thoat-lī Ai-ki̍p ê pé-pa̍k lâi hióng-siū chū-iû ê hēng-hok; Pó-lô͘ oē tit thang khui thoân-kàu ê Mn̂g-hō͘, choè thoân sú-bēng ê ióng-chiong; Lîm-khéng thàu-pàng o͘-bīn ê lâng; Lō͘-tek-má-teng kái-kek chong-kàu: lóng-chóng to sī hùn-tò͘ ê kiat-chiⁿ.
2. Ha̍k-su̍t-siōng ê hùn-tò͘ Ha̍k-su̍t sī jîn-seng ê chí-lâm, iā sī hùn-tò͘ ê khì-khū. Ai-ki̍p chi̍t lâng hùn-tò͘, tek-khak tio̍h ū kap chi̍t lâng hùn-tò͘ tek-khak tio̍h ū kap hit lâng pîⁿ-téng ê ha̍k-su̍t; ài kap chit sè-kài su-iâⁿ, iā tek-khak tio̍h ū kap i tí-tek kàu-gia̍h ê kuì-la̍t; jiân-āu chiah thang khí-chhiú, nā bô sī khang-chhiú, khang-kûn, oē ka-kī chhú sit-pāi. Hô-hòng hiān tāi sī ha̍k-su̍t koân-moá ê sî-kî, Ki-tok-tô͘ nā bô chhiong-hun ê ha̍k-su̍t; beh cháiⁿ-iūⁿ eō èng siā-hoē ê iàu-kiû? Ki-tok-tô͘ tio̍h tì-ì tī chit hong-bīn lâi chek-thiok khuì-la̍t, thâi-iâⁿ, tit-tio̍h lâng-thang chhoā kàu Chú ê bīn-chêng.
3. Khoân-kéng siōng ê hùn-tò͘. Ū choē-choē ê chheng-liân siū khoân-kéng (chiu-uî) ê sok-pa̍k, sui-jiân ū iâⁿ kè lâng ê thian châi, koân-toā ê chì-khì, nā-sī si̍t-kó͘ ê mn̂g iáu boē ām boē tit chhun i ê châi-chêng, tián i ê chì-khì, eng-hiông bô ēng bú ê só͘-chāi "chí-ū khang-khang hoah bô ta-oâ nā tiāⁿ; Koh-chài siā-hoē-chiūⁿ ū choē-choē bô kiàn-sek ê siáu-jîn, ēng sêng-kong sit-pāi lâi lūn eng-hiông, bô choè ióng-kám kian-jím, ê kang-hu, choan-ēng kiaⁿ-uì sūn-chêng ê chhiú-toāⁿ, iām-liâng ê sè-kéng, chhián-po̍h ê jîn-chêng sit-chāi thang thó͘-khuì! Ki-tok-tô͘ tiàm tī chit-khoán ê khoân-kéng, choè lâng chin-oh; lāi-bīn ū ké ê hiaⁿ-tī ê guî-hiám, goā-bīn ū hui-ki-tok-tô͘ ê kong-kek. Chóng-sī che bô m̄-sī choè lán boâ lāi-khì ê khì-khū, bô pi-koan ê só͘-chāi." ge̍k-kéng chhin-chhiūⁿ hé-lô͘ liān thih chiàⁿ ngī-kǹg" to̍k-to̍k tio̍h ēng jím-nāi ê sim, khǹg khoah toā ê tō͘-liōng, ēng hó iâⁿ pháiⁿ ê kang-hu "chiong thoàⁿ-hé hē tī in ê thâu-khak-téng" lâi thâi-iâⁿ in; koh-chài ēng pit ê khuì-la̍t－25 pit sàu bān-kun－lâipiān-bêng chin-lí, kiò siā-hoē ê ní bo̍k; Ki-tok-tô͘ nā chhut-la̍t hùn-tò͘ tī chit hong-biān, chiū i ê hāu-kó m̄-sī sió-khoá, khoân-kéng ê kái-chō m̄-sī uî-lân.
4. Jîn-keh-siōng ê hùn-tò͘. Lâng oa̍h tī sè-kan, chóng-kóng sī tī hó kap pháiⁿ ê tiōng-kan teh kau-chiàn, thâi-iâⁿ choē-ok--ê chiū-sī kun-chú, thâi-su choē-ok--ê chiū-sī siáu-jîn, sī chhin-chhiūⁿ peh chiūⁿ soaⁿ-chiam, siáu-jîn chhin-chhiūⁿ poa̍h-lo̍h chhim-kheⁿ. Nā-sī ài kiàn-siat ka-tī ê jîn-keh, tio̍h ài chīn-la̍t hiòng-siōng, chhut-la̍t peh chiūⁿ koan-soaⁿ ê bé-liu. An-jiân tī chhim-khiⁿ ê sî choē-ok ê cheng-chhé, siūⁿ beh chhut phe-sí ê la̍t lâi peh chiūⁿ koân-soaⁿ sī chhám-hoé ê jîn-keh. Tī sè-kan, thin siⁿ-chiâⁿ ê jîn-keh sī chīn chió, hùn-tò͘ chhám-hoé ê jîn-keh ê chiū-sī thang choè kuì-khì; khoàⁿ Thok-ní-su-thài. Ò-kó͘-su-teng, Lû-so͘ oē chiâⁿ kiān-choân ê jîn-keh bô m̄-sī tuì chhám-hoé lâi--ê, chhám-hoé sī hiòng-hó ê tōng-ki, iā sī san-tû choē-ok ê khì-khū, siu-ióng jîn-keh khì-hâi. Ki-tok-tô͘ ah! Tio̍h sî-siông chhám-hoé, chhám-hoé sī lín sin oa̍h-miā ê sèng-hé, chiò kng tī lín pîⁿ-tháⁿ ê chiân-tô͘ Ki-tok-tô͘ ah! Tio̍h chhám-hoé, chhám-hoé sī lín toā lô-le̍k ê goân-thâu, lâi khí-chō chi̍t ê chì toā chhàn-lān bē lâi ê sè-kài. In uī án-ni choè Ki-tok-tô͘ ê tek-khak tio̍h ū hùn-tò͘ ê cheng-sîn, chiong jîn-keh hiòng-siōng oa̍h-tāng, hiòng-siōng koé-chō, jiân-āu chiah oē tit-tio̍h kiān-choân ê jîn-keh.
5. Chin-tō-siōng ê hùn-tò͘. Ki-tok-tô͘ tē it ko-siōng ê bo̍k-tek, chiū-sī ài tek-tō, tō chiū-sī oa̍h-miā ê goân-thâu, lêng-hûn ê bí-niû, nā tit-tio̍h, chiū ū hong-hù bí-moá ê jìn-seng. Thok-ní-su-thài kóng "Lâng nā bô tit-tio̍h tō (Ki-tok), jîn-seng chiū bô ì-gī; jîn-seng kì-jiân bô ì-gī, chiū chhn-chhiūⁿ chhiⁿ-mî" Koh kóng "Lâng bē tit-tio̍h Ki-tok ê sî, hui-siông ê iu-būn kan-khó͘, bô it-tēng ê sî, chiū oē chū-chīn; khiok nā hut-jiân jīn bat Ki-tok, chhoē kàu Siōng-tè, chiū têng koh tit-tio̍h jîn-seng ê ì-gī, hit sî sim koaⁿ an-uì, chha-put-to tâng í-keng sí ê lâng tit-tio̍h koh-oa̍h chi̍t-iūⁿ" Pó-lô kóng, "In-uī goá jīn-bat goá ê Chú Iâ-so͘ Ki-tok, choè pó-poè, goá uī-tio̍h I í-keng pàng-sak bān-sū khoàⁿ choè pùn-thô͘, sī uī-tio̍h ài tit-tio̍h Ki-tok. In-uī án-ni lán uī-tio̍h Ki-tok, tek-khak tio̍h chīn-la̍t tui-kiû ta̍t-kàu bo̍k-te̍k-tiám, jiân-āu chiah soah; in-uī tō-lí koâiⁿ chi̍t-chhioh, mô͘-kuí chiū koâiⁿ chi̍t-tn̄g. Lán tī bêng-pe̍k tō-lí tek-tō ê sî, tek-khak ū choē-choē ê chhì-liān, tio̍h choè kong-kiông ê lâng, chhēng Siōng-tè sù ê kun-chong chiah oē tí-tng mô͘-kuí ê khuí-kè. ēng kî-tó, tha̍k Sèng-keng choè sok-chēng ê siu-ióng. Ka-kī kì-jiân tit-tio̍h ki-tok bí-boán ê seng-oa̍h, chiū-tio̍h chhut-la̍t thoân-pò hō͘ bān-lâng. Che chiū-sī lán choè Ki-tok-tô͘ ê bo̍k-tek.
